Mateus 5:1-48

  • JAMITA DI DOLOK (1-48)

    • Jesus mangajari di dolok (1, 2)

    • Sia las ni roha (3-12)

    • Sira dohot panondang (13-16)

    • Jesus ro laho pasauthon Patik (17-20)

    • Poda taringot tu muruk (21-26), mangalangkup (27-30), parsirangan (31, 32), marsumpa (33-37), mambalos (38-42), mangkaholongi musu (43-48)

5  Tingki diida Jesus halak natorop i, nangkok ma ibana tu dolok. Dung i, hundul ma ibana jala ro ma angka siseanna mandapothon ibana.  Dung i, diajari ibana ma nasida jala ninna ma,  “Marlas ni roha ma na mamboto ringkot ni marale-ale tu Debata,* ai nasida do nampuna harajaon banua ginjang i.  “Marlas ni roha ma na marsak, ai siapulon do nasida.  “Marlas ni roha ma na lambok roha, ai nasida do na laho manean tano on.  “Marlas ni roha ma na mauas male tu hasintongan, ai pabosuronna do nasida.  “Marlas ni roha ma parasi roha, ai na laho dapotan asi ni roha do nasida.  “Marlas ni roha ma na ias roha, ai idaon ni nasida do Debata.  “Marlas ni roha ma sibahen dame,* ai goaron do nasida angka anak ni Debata. 10  “Marlas ni roha ma halak na manaon na hansit alani hasintongan, ai nasida do nampunasa Harajaon banua ginjang. 11  “Marlas ni roha ma hamu molo dileai, dibahen na hansit tu hamu, jala dipatubu-tubu hata na so tutu dompak hamu alani ahu. 12  Ai songon i do angka panurirang manaon angka na hansit najolo. Marlas ni roha jala marolop-olop ma hamu, ai balga do upamuna di banua ginjang. 13  “Hamu do sira ni tano on, alai molo mago ansim ni sira i, aha be bahenon paansimhon i? Ndang adong be guna ni i, sibolongkonon nama i tu dalan asa didegei halak. 14  “Hamu do panondang ni portibi on. Sai na patar do tarida huta na di atas ni dolok. 15  Ndang bahenon ni halak lampu na galak tu toru ni karanjang.* Alai, bahenonna do i tu inganan na timbo asa disondangi sude na di jabu i. 16  Dos songon i, marsinondang ma hatiuronmuna di jolo ni halak, asa molo diida nasida pambahenanmuna na denggan, pujionna ma Amamuna na di banua ginjang. 17  “Unang ma dirimpu hamu ro ahu laho mangagohon Patik manang na Sinurat ni angka Panurirang. Ndang ro ahu laho mangagohon i, alai na laho pasauthon i do. 18  Situtu do na hudok on tu hamu, saleleng adong dope langit dohot tano on, ndang na laho mago nanggo sada leter manang sada titik pe sian Patik i, sahat tu na saut sude isina. 19  Alani i, manang ise na mangalanggar sada sian patik na ummetmet i jala diajari na asing mangulahon songon i, didok ma ibana na ummetmet di Harajaon banua ginjang. Alai manang ise na mangulahon jala na mangajarhon i, didok ma ibana na umbalga di Harajaon banua ginjang. 20  Alani i hudok ma tu hamu, molo ndang umtigor hamu sian angka siboto surat dohot angka halak Parise, ndang parsidohot hamu tu Harajaon banua ginjang. 21  “Dibege hamu do hata tu angka ompumuna najolo, ‘Unang ho mambunu, ai manang ise na mambunu, ingkon diboan do ibana tu pengadilan.’ 22  Alai hudok ma tu hamu, ganup halak na sai muruk tu donganna, boanon do ibana tu pengadilan. Manang ise na mangaleai donganna, ingkon boanon do ibana tu Pengadilan na Tumimbo. Jala manang ise na mandok tu donganna, ‘Na oto do ho!’ uhumon do ibana di Gehena* na marsigorgor. 23  “Molo diboan ho silehon-lehonmu tu langgatan, jala disi gabe diingot ho adong donganmu na marsogo ni roha tu ho, 24  tadingkon ma silehon-lehonmi di jolo ni langgatan i. Laho ma ho mardame dohot donganmi. Dung pe i, asa ro ho muse pasahathon silehon-lehonmi. 25  “Hatop ma pasae parsoalanmu tu halak na mamboan ho tu pengadilan binsan rap dope hamu di tonga dalan, asa unang dipasahat ho tu hakim, gabe dipasahat hakim i ho tu petugas pengadilan, jala ujungna boanonna ma ho tu penjara. 26  Situtu do na hudok on tu hamu, na so boi ho kaluar sian i sahat tu na digarar ho limper* na parpudi. 27  “Dibege hamu do hata na mandok, ‘Unang ho mangalangkup.’ 28  Alai hudok ma tu hamu, manang ise na sai mamereng sahalak borua huhut marsangkap na so denggan, nunga mangalangkup ibana di bagasan rohana. 29  Alani i, molo mata siamunmi mambahen ho tartuktuk, pulsikkon jala bolongkon ma i. Tumagon do mago sada ruas ni dagingmu, unang apala sude dagingmi disampathon tu Gehena.* 30  Jala molo tangan siamunmi mambahen ho tartuktuk, ponggol jala bolongkon ma i. Tumagon do mago sada ruas ni dagingmu, unang apala sude dagingmi disampathon tu Gehena.* 31  “Didok do muse, ‘Manang ise na manirangkon tunggane boruna, ingkon lehononna do surat sirang.’ 32  Alai hudok ma tu hamu, molo sasahalak manirangkon tunggane boruna hape ndang alani na mangulahon seks na so patut,* gabe dibahen ibana do tunggane boruna i mangalangkup, jala manang ise na marhasohotan tu borua na disirangkon i, dohot do ibana mangalangkup. 33  “Dibege hamu do muse hata tu ompumuna najolo, ‘Unang ho marsumpa molo ndang ulahononmu. Alai, ingkon gararonmu do janjim tu Jahowa.’ 34  Alai hudok ma tu hamu, unang ma hamu marsumpa marhite manang aha pe, nang marhite banua ginjang, ai habangsa ni Debata do i. 35  Manang marhite tano on, ai sidegean ni patna do i, manang marhite Jerusalem, ai kota ni raja na sangap i do i. 36  Unang ma ho marsumpa marhite ulum, ai ndang boi bahenonmu sada obuk pe gabe bontar manang birong. 37  Molo olo dok ma ‘Olo’, molo ndang dok ma ‘Ndang’, lobi sian i sian Sibolis* do i. 38  “Dibege hamu do hata na mandok, ‘Mata ganti ni mata, ngingi ganti ni ngingi.’ 39  Alai hudok ma tu hamu, unang ma alo hamu parjahat. Molo adong na mamastap hurummu siamun, tarehon ma nang hurummu sihambirang. 40  Molo adong na mamboan ho tu pengadilan jala naeng buatonna abitmu, lehon ma nang abit luar na pinangkem. 41  Jala molo adong parhuaso na mamaksa hamu mamboan siboanon sakilometer,* boan ma i dua kilometer. 42  Lehon ma tu halak na mangido tu ho, jala unang ma tulak halak na maminjam* tu ho. 43  “Dibege hamu do hata na mandok, ‘Haholongi ma donganmu jolma jala hasogohon ma musum.’ 44  Alai hudok ma tu hamu: Tongtong ma haholongi musum jala tangiangkon ma halak na mambahen na hansit tu hamu, 45  asa gabe anak ni Amamuna na di banua ginjang i hamu. Ai dipabinsar Ibana do mata ni ari tu angka parjahat dohot tu na burju. Jala diparo do udan tu halak na mangulahon na sintong dohot tu halak na mangulahon na jahat. 46  Molo holan halak na mangkaholongi hamu do dihaholongi hamu, dia ma upa sijaloon muna? Gari angka sijalo pajak,* nda diulahon sisongon i? 47  Jala molo holan angka donganmu do didongani hamu, dia ma hasurunganmuna? Gari angka halak sian bangso na asing pe, nda diulahon songon i? 48  Ingkon sun denggan* do hamu, songon Amamuna na di banua ginjang i na sun denggan.

Surat na di toru

Manang “halak na pogos tondi”.
Manang “parroha dame”.
Manang “hirang”.
Ida di Kamus.
As. “kwadrans”, hepeng logam na mansai otik argana.
Ida di Kamus.
Ida di Kamus.
Manang “parmainanon”. Di bahasa Junani porneia. Ida di Kamus.
As. “sijahat”.
As. “mil”. Ida di Kamus.
Pinjaman na so marbunga.
Manang “sijalo beo”.
Manang “singkop”.