Mateus 25:1-46

  • TANDA HARORO NI KRISTUS (1-46)

    • Tudosan taringot tu namarbaju (1-13)

    • Tudosan taringot tu talenta (14-30)

    • Biru-biru dohot hambing (31-46)

25  “Tudos do Harajaon banua ginjang i tu sampulu namarbaju na mamboan lampu laho manomu-nomu pangoli.  Adong lima na oto jala na lima nai marbisuk.  Diboan na oto i do lampu nasida alai ndang diboan nasida miakna.  Alai anggo na marbisuk i, diboan nasida do miak di botol rap dohot lampu ni nasida.  Ala leleng ro pangoli i, gabe mondok-ondok ma nasida sude jala tarpodom.  Di tonga borngin, adong ma na manggorahon, ‘Nunga ro be pangoli i! Tomu hamu ma ibana.’  Dungo ma sude namarbaju i jala dibuat be ma lampu ni nasida.  Didok angka na oto i ma tu na marbisuk i, ‘Lehon ma di hami deba miakmuna i, ai nunga naeng mintop lampunami.’  Dialusi na marbisuk i ma, ‘Ra, ndang sae be on di hita. Tumagon ma hamu laho tu panggadis miak jala tuhor ma di hamu.’ 10  Tingki laho nasida manuhor miak, ro ma pangoli i. Masuk ma angka namarbaju naung mangarade i rap dohot pangoli i tu pesta parbogason, jala ditutup ma pintu. 11  Dung i, ro ma namarbaju na lima nai, ninna nasida ma, ‘Tuan, Tuan, bungka jo pintu on di hami!’ 12  Dialusi ibana ma, ‘Ndang hutanda hamu.’ 13  “Alani i, jaga ma hamu, ai ndang diboto hamu ari manang jamna. 14  “Tudos do muse Harajaon banua ginjang i tu sahalak baoa na naeng mardalani tu na dao. Dijou ma angka hatobanna jala disuru ma nasida mangaradoti angka artana. 15  Dilehon ma tu na sada lima talenta,* tu na asing dua talenta, tu na sada nai sada talenta, hombar tu na tolap ni nasida. Dung i, borhat ma ibana tu na dao. 16  Pintor laho ma na manjalo lima talenta i jala dipangke ma i martiga-tiga, gabe maruntung ma ibana lima talenta nai. 17  Songon i ma muse na manjalo dua talenta, maruntung ma ibana dua talenta nai. 18  Alai na manjalo sada talenta i, dihali ma tano jala ditabunihon ma tusi hepeng* ni tuanna i. 19  “Dung leleng, mulak ma tuan ni angka hatoban i jala maretong ma ibana tu nasida. 20  Ro ma hatoban na manjalo lima talenta i jala diboan ma lima talenta nai untungna, ninna ma, ‘Tuan, nunga dilehon ho lima talenta siradotanku. Ida ma, maruntung do ahu lima talenta nai.’ 21  Dung i, ninna tuanna i ma tu ibana, ‘Denggan ma i hatoban na burju jala haposan! Haposan do ho di na otik. Lehononku ma tu ho gumodang muse siradotanmu. Marlas ni roha ma ho rap dohot tuanmu.’ 22  Dung i, ro ma hatoban na manjalo dua talenta i jala ninna ma, ‘Tuan, nunga dilehon ho dua talenta siradotanku. Ida ma, maruntung do ahu dua talenta nai.’ 23  Dung i, ninna tuanna i ma tu ibana, ‘Denggan ma i hatoban na burju jala haposan! Haposan do ho di na otik. Lehononku ma muse tu ho gumodang siradotanmu. Marlas ni roha ma ho rap dohot tuanmu.’ 24  “Ujungna ro ma hatoban na manjalo sada talenta, ninna ma, ‘Tuan, nunga huboto hian maol do pasonangkon roham, marpanen do ho nang pe ndang manabur jala papunguhon do ho nang pe ndang karejo. 25  Alani i, mansai mabiar ma ahu gabe hutabunihon ma talentami tu bagasan tano. On ma, hupaulak ma hepengmi.’ 26  Dialusi tuanna i ma ibana, ‘Hatoban na jahat jala na malas do ho, nunga diboto ho marpanen do ahu nang pe ndang manabur jala papunguhon do ahu nang pe ndang karejo. 27  Aturanna, simpanonmu hian do hepengki* di bank asa tingki ro ahu, jaloonku ma i rap dohot bungana. 28  “‘Alani i, buat ma talenta i sian ibana jala lehon ma tu na maniop sampulu talenta i. 29  Ai tu ganup halak na adong di ibana, lehonon do gumodang, asa ganda di ibana. Alai sian halak na so adong di ibana, buaton ma sian ibana molo tung adong. 30  Sampathon ma hatoban na so marguna i tu luar, tu na holom. Disi ma ibana mangangguhi jala muruk situtu.’* 31  “Molo ro Anak ni jolma di bagasan hasangaponna jala sude suru-suruan rap dohot ibana, hundul ma ibana di habangsana na sangap i. 32  Papunguonna ma sude bangso tu jolona jala sirangonna ma angka jolma, na sada tu na asing, songon parmahan na manirang biru-biru sian hambing. 33  Bahenonna ma biru-biru i di siamunna, alai hambing i di hambirangna. 34  “Dung i dohonon ni raja i ma tu angka na di siamunna i, ‘Ro ma hamu angka na mandapot pasu-pasu sian Damang, jalo hamu ma Harajaon naung pinarade tu hamu, sian mulai ditompa portibi on.* 35  Ai tingki male ahu, dilehon hamu do ahu mangan. Tingki mauas ahu, dilehon hamu do ahu minum. Nang pe ndang ditanda hamu, dijalo* hamu do ahu. 36  Tingki ndang marpangkean* ahu, dilehon hamu do pangkeanku. Tingki marsahit ahu, diparrohahon hamu do ahu. Tingki dipenjara ahu, diida hamu do ahu.’ 37  Dung i, alusan ni angka halak na mangulahon na sintong i ma ibana, ‘Tuan, nandigan do huida hami ho male gabe hulehon hami ho mangan, manang mauas gabe hulehon hami ho minum? 38  Nandigan do huida hami ho songon halak na so tinanda gabe hujangkon hami ho, manang ndang marpangkean gabe dilehon hami pangkeanmu? 39  Nandigan do huida hami ho marsahit manang di penjara gabe hutingkir hami ho?’ 40  Alusan ni raja i ma nasida, ‘Tutu do na hudok on tu hamu, sude na binahenmuna tu sahalak sian haha anggingku na metmet on, na tu ahu do na binahenmuna i.’ 41  “Dung i dohononna ma tu angka na di hambirangna, ‘Laho ma hamu angka na diuhum tu api sisaleleng-lelengna* naung diparade tu Sibolis dohot tu angka suru-suruanna. 42  Ai di tingki male ahu, ndang dilehon hamu ahu mangan. Tingki mauas ahu, ndang dilehon hamu ahu minum. 43  Tingki ro ahu songon halak na so tinanda, ndang dijalo* hamu ahu. Tingki so marpahean ahu, ndang dilehon hamu pangkeanku. Tingki marsahit jala dipenjarahon ahu, ndang ditingkir hamu ahu.’ 44  Dung i, dialusi nasida ma, ‘Tuan, nandigan huida hami ho male, mauas, ro songon halak na so tinanda, ndang marpangkean, marsahit manang dipenjarahon jala ndang dihobasi hami ho?’ 45  Alusanna ma nasida, ‘Tutu do na hudok on tu hamu, sude na so binahenmu tu sahalak sian haha anggingku na metmet on, na so dibahen hamu do i tu ahu.’ 46  Tu hamatean saleleng ni lelengna* ma halak sisongon i, alai ianggo angka halak na mangulahon na sintong tu hangoluan saleleng ni lelengna.”

Surat na di toru

Sada talenta ni halak Junani dos ma i tu 20,4 kg.
As. “perak”.
As. “perak”.
As. “patungoripon”.
Ida di surat na di toru na di 1 Petrus 1:20.
Manang “dijangkon”.
Manang “salang-salang”.
Na nidokna dison hamatean salelengna. Ida di Kamus “Gehena”.
Manang “dijangkon”.
As. “diponggol ma saleleng ni lelengna”, songon dangka ni hau na diponggol sian bonana.