Mateus 22:1-46

  • Tudosan taringot tu pesta parbogason (1-14)

  • Debata dohot Kesar (15-22)

  • Sungkun-sungkun taringot tu haheheon (23-33)

  • Dua parenta na umbalga (34-40)

  • Tutu do Kristus anak ni si Daud? (41-46)

22  Dipaboa Jesus ma sahali nai tudosan tu nasida, ninna ma,  “Tudos do Harajaon banua ginjang i tu sahalak raja na mambahen pesta parbogason ni anakna.  Disuru ma angka hatobanna manjou halak naung digokkon tu pesta parbogason i, alai ndang olo nasida ro.  Disuru ma muse angka hatoban na asing, jala ninna ma, ‘Paboa ma tu naung digokkon i, “Nunga huparade sipanganon, nunga huseat lombu dohot pinahan na pinamokmok jala nunga rade be sude. Ro ma hamu tu pesta parbogason i.”’  Alai ndang parduli nasida. Adong na laho tu ladangna, na sada tu partiga-tigaonna,  jala na deba manangkup angka hatoban i, dung i dipungkuli jala dipamate.  “Muruk situtu ma raja i, disuru ma angka tentarana laho pamatehon angka pambunu i jala manutung kota ni nasida.  Dung i, didok ma tu angka hatobanna, ‘Nunga rade pesta parbogason i, alai ndang tama ro angka halak na digokkon i.  Alani i, borhat ma hamu tu dalan siboluson na laho tu luar kota, gokkon ma manang ise na jumpangmuna tu pesta parbogason i.’ 10  Dung i borhat ma angka hatobanna i, dipapungu ma sude na jumpang ni nasida di angka dalan, na burju dohot na jahat, gabe gok ma tamu di parpestaan i. 11  “Tingki masuk raja laho mamereng angka tamu, diida ibana ma sahalak baoa na so marpangkean pesta. 12  Disungkun raja i ma ibana, ‘Dongan, boasa ndang marpangkean pesta ho tuson?’ Alai sip do ibana. 13  Dung i, didok raja i ma tu angka hatobanna, ‘Tali ma tanganna dohot patna jala sampathon ma ibana tu luar, tu na holom. Disi ma ibana mangangguhi jala muruk situtu.’* 14  “Ai godang do na dijou, alai otik do na tarpillit.” 15  Dung i, laho ma halak Parise jala mangkatai ma nasida laho manjorat Jesus marhite hatana. 16  Dung i, disuru nasida ma sisean nasida rap dohot angka halak na sian partai ni si Herodes mandapothon Jesus, ninna ma, “Guru, huboto hami do na sintong ho jala sai sintong do na niajarhonmu taringot tu dalan ni Debata, ndang dilului ho hasangapon sian jolma jala ndang dipaimbar-imbar ho jolma. 17  Paboa ma tu hami, songon dia do pandapotmu? Mangihuthon patik, boi do gararon pajak tu Kesar manang na ndang?” 18  Alai, diboto Jesus do pingkiran ni nasida na jahat, ninna ma, “Hamu halak na munafik, boasa ujionmuna ahu? 19  Patuduhon hamu ma tu ahu hepeng logam laho manggarar pajak i.” Diboan nasida ma tu ibana sada hepeng dinar.* 20  Disungkun ibana ma nasida, “Gombar dohot surat ni ise do on?” 21  Dialusi nasida ma, “Kesar.” Dung i ninna Jesus ma tu nasida, “Lehon ma tu Kesar ampuna ni Kesar jala tu Debata ampuna ni Debata.” 22  Dung dibege nasida i, longang ma roha ni nasida. Ditadingkon ma ibana jala laho ma nasida. 23  Laos di ari i, ro ma angka Saduse na so porsea tu haheheon mandapothon Jesus, disungkun nasida ma ibana, 24  “Guru, didok si Musa, ‘Molo adong baoa na mate ndang marianakhon, ingkon olion ni anggina* do tunggane boruna i asa adong pinompar ni hahana naung mate i.’ 25  Hea do adong pitu na marhaha maranggi dison. Mangoli ma siangkangan, alai mate ma ibana ndang marianakkon. Ditadingkon ma tunggane boruna i tu anggina. 26  Songon i do na masa tu na paduahon dohot tu na patoluhon sahat tu na papituhon. 27  Na parpudi muse, mate ma dohot borua i. 28  Antong, di ari haheheon i, ise do sian na pitu i gabe tunggane doli ni borua i? Ai sude do nasida hea mangoli tu ibana.” 29  Dialusi Jesus ma nasida, “Sala do hamu, ai ndang diantusi hamu Surat na Badia i dohot huaso ni Debata. 30  Di ari haheheon, ndang masa be mangoli manang muli, ai songon suru-suruan na di banua ginjang nama nasida. 31  Taringot tu ari haheheon ni halak naung mate, na so hea do dijaha hamu na nidok ni Debata na mandok, 32  ‘Ahu do Debata ni si Abraham, Debata ni si Isak, dohot Debata ni si Jakkob’? Ndang Debata ni na mate Ibana, alai Debata ni na mangolu do.” 33  Longang ma roha ni natorop i mambege pangajarionna i. 34  Dung dibege halak Parise naung hohom angka Saduse i dibahen Jesus, rap ro ma nasida mandapothon ibana. 35  Adong ma sahalak sian siboto patik manungkun tu Jesus laho manguji ibana, ninna ma, 36  “Guru, dia do parenta na umbalga sian angka Patik i?” 37  Dialusi Jesus ma ibana, “‘Ingkon haholonganmu do Jahowa Debatam sian nasa roham, sian nasa ngolum dohot sian nasa pingkiranmu.’ 38  I ma parenta na umbalga jala na parjolo. 39  Na paduahon na dos tusi, i ma, ‘Ingkon haholonganmu do donganmu jolma doshon dirim.’ 40  Parenta na dua on do ojahan ni sude Patik dohot na Sinurat ni Angka Panurirang.” 41  Tingki marpungu dope halak Parise i, disungkun Jesus ma nasida, 42  “Songon dia do pandapotmuna taringot tu Kristus? Anak ni ise do ibana?” Dialusi nasida ma, “Anak ni si Daud.” 43  Dung i, ninna Jesus ma tu nasida, “Antong, marhite panogu-noguon ni tondi parbadia, boasa dijou si Daud ibana Tuan tingki mandok, 44  ‘Didok Jahowa do tu Tuanku, “Hundul ma ho di siamunku paima hubahen angka musum sidege-degean ni patmu”’? 45  Molo didok si Daud do ibana Tuan, songon dia ma ibana gabe anak ni si Daud?” 46  Ndang adong na boi mangalusi ibana, jala dungkon i, ndang adong be na barani manungkun ibana.

Surat na di toru

As. “patungoripon”.
Hepeng logam perak ni halak Rom. Ida di Kamus.
Ndang tangkas dipaboa di Bibel na mate i siangkangan manang sianggian.