Mateus 21:1-46

  • Manjangkon haroro ni Jesus (1-11)

  • Dipalao Jesus partiga-tiga sian bagas joro (12-17)

  • Diburai Jesus hau ara (18-22)

  • Dialo ma huaso ni Jesus (23-27)

  • Tudosan taringot tu dua anak (28-32)

  • Tudosan taringot tu angka pangula na jahat (33-46)

    • Batu parsuhi-suhi na dibolongkon (42)

21  Dung lam jonok nasida tu Jerusalem, sahat ma nasida di Betpage na di Dolok Jetun. Disuru Jesus ma dua siseanna,  ninna ma, “Laho ma hamu tu huta na di jolo an, jumpangmuna ma disi sada halode na tartambat rap dohot anakna. Bungka ma talina i jala boan ma duansa tu ahu.  Molo adong na manungkun tu hamu, dok hamu ma, ‘Na porlu do i di Tuan i.’ Dung i, pintor loasonna do hamu mamboan i.”  Masa pe songon i asa saut do na nidok ni panurirang,  “Paboa ma tu boru Sion, ‘Na ro do rajami mandapothon ho, na lambok do ibana jala hundul do ibana di sada halode, halode na poso, anak ni halode boban.’”  Dung i, laho ma angka sisean i jala diulahon nasida ma songon na nidok ni Jesus.  Diboan nasida ma halode dohot anakna i. Dibahen nasida ma pangkean ni nasida tu halode i jala hundul ma Jesus di atasna.  Torop ma halak na pahembangkon pangkean ni nasida di dalan, na asing mamonggoli ranting ni hau, jala dipampeakkon di dalan.  Sude natorop i, na mardalan di jolo dohot di pudina manggorahon, “Sai lehon ma haluaon tu Anak ni si Daud! Dipasu-pasu ma na ro di bagasan goar ni Jahowa! Sai lehon ma haluaon tu ibana, Ho na di banua ginjang!” 10  Dung masuk ibana tu Jerusalem gabe gaor ma kota i. Ninna angka jolma na disi ma, “Ai ise do i?” 11  Dipandok angka na mangihuthon Jesus i ma, “On ma Jesus, panurirang na sian Nasaret di Galilea!” 12  Masuk ma Jesus tu bagas joro jala dipalao ibana ma sude angka partiga-tiga dohot panuhor na adong di bagas joro i. Ditunggalingkon ma meja ni angka situngkar hepeng dohot bangku ni partiga-tiga darapati. 13  Didok ibana ma tu nasida, “Tarsurat do, ‘Bagas partangiangan do didok bagashu’, alai gabe inganan* ni angka pangarampok do dibahen hamu.” 14  Marroan ma muse angka na mapitung dohot na pangpang mandapothon ibana di bagas joro. Dung i, dipamalum ibana ma nasida. 15  Gabe muruk ma angka malim kepala* dohot siboto surat dung diida nasida angka halongangan na binahen ni Jesus dohot angka dakdanak baoa di bagas joro na sai manggorahon, “Sai lehon ma haluaon tu Anak ni si Daud!” 16  Ninna nasida ma tu Jesus, “Dibege ho do na nidok ni nasida i?” Dialusi ibana ma, “Hubege. Na so hea do dijaha hamu, ‘Dibahen ho do pamangan ni angka dakdanak dohot angka poso-poso pasahathon puji-pujian’?” 17  Dung i, ditadingkon ma nasida, laho ma ibana tu kota Betania jala marborngin disi. 18  Laho mulak tu Jerusalem di manogotna i, male ma dihilala ibana. 19  Diida ibana ma hau ara di pinggir ni dalan jala laho ma ibana tusi, alai ndang dapotna agia aha, asing ni angka bulungna. Gabe didok ma tu hau i, “Tung so marparbue be ho sian saonari.” Laos satongkin i, malos ma hau ara i. 20  Tingki diida angka siseanna i, longang ma nasida jala ninna ma, “Boasa boi pintor malos hau ara i?” 21  Dialusi Jesus ma nasida, “Tutu do na hudok on tu hamu, molo porsea do hamu jala ndang ganggu rohamuna, ndang holan na hubahen tu hau ara i na boi bahenonmu. Gariada, molo didok hamu tu dolok on, ‘Hinsat ma ho jala dabu ma ho tu laut,’ sai na saut do i. 22  Molo porsea hamu, jaloonmuna do sude na pinangidomuna di bagasan tangiang.” 23  Dung i, masuk ma Jesus tu bagas joro. Tingki mangajari ibana, didapothon angka malim kepala* dohot angka pangituai ma ibana jala ninna ma, “Huaso ni ise do dipangke ho mangulahon on? Ise do na marsuru ho mangulahon on?” 24  Dialusi Jesus ma nasida, “Ahu pe adong do sisungkunonku tu hamu. Molo dialusi hamu ahu, paboaonku ma tu hamu marhite huaso ni ise ahu mangulahon i sude. 25  Sian ise do huaso ni si Johannes laho mandidihon? Sian banua ginjang do manang sian jolma?” Masisungkunan ma nasida, ninna ma, “Molo tadok sian banua ginjang, dohononna ma tu hita, ‘Antong boasa ndang porsea hamu tu ibana?’ 26  Alai molo tadok, ‘Sian jolma,’ habiaranta do natorop i, ai sude do nasida mandok si Johannes sahalak panurirang.” 27  Dialusi nasida ma Jesus, “Ndang huboto hami.” Dung i, didok Jesus ma tu nasida, “Ahu pe, ndang paboaonku tu hamu marhite huaso ni ise ahu mangulahon i sude. 28  “Songon dia do didok rohamuna? Adong ma sahalak baoa nampuna dua anak. Didapothon ma anakna siangkangan, ninna ma, ‘Laho ma jolo ho amang mangula sadari on tu porlak anggur.’ 29  Dialusi anakna i ma ibana, ‘Ndang olo ahu,’ alai manolsoli ma rohana jala laho ma ibana. 30  Dung i didapothon ibana ma anakna na paduahon, laos didok do muse songon i. Dialusi anakna i ma, ‘Olo Bapa,’ alai ndang laho ibana. 31  Ise do sian na dua i na mangulahon na pinangido ni amana?” Dialusi nasida ma, “Siangkangan i.” Didok Jesus ma tu nasida, “Tutu do na hudok on tu hamu, parjolo do sijalo pajak dohot boru-boru na so hasea masuk tu Harajaon ni Debata unang apala hamu. 32  Ai ro do si Johannes tu hamu di dalan sintong, alai ndang dihaporseai hamu ibana. Hape sijalo pajak dohot boru-boru na so hasea, dihaporseai do ibana. Diida hamu do i nian, alai ndang manolsoli rohamuna jala porsea tu ibana. 33  “Bege hamu ma tudosan na asing: Adong ma sahalak nampunasa tano, na mamungka porlak anggur jala dihandangi ma humaliang ni porlak i, dibahen ma pamoroan ni anggur jala dipajongjong ma sada manara inganan ni panjaga. Dipasewahon ma i tu angka pangula, dung i laho ma ibana tu luat na asing. 34  Dung jumpang laho mambuat parbuena, disuru ma angka hatobanna tu angka pangula i laho mambuat parbagiananna. 35  Alai, ditangkup angka pangula i ma angka hatobanna i. Dipungkuli ma na sada, na sada nai dipamate jala na asing didangguri dohot batu. 36  Dung i, disuru ibana ma muse hatoban na asing gumodang sian na parjolo i, alai dos do dibahen tu nasida. 37  Ujungna, disuru ma anakna tu nasida ai ninna rohana, ‘Habiaran ni nasida do ra anakki.’ 38  Alai dung diida nasida anakna i, didok angka pangula i ma sama nasida, ‘On do anakna i.* Beta tapamate ma ibana asa di hita parbagiananna i!’ 39  Dung i, ditangkup nasida ma ibana, disarat tu luar ni porlak i jala dipamate ma ibana. 40  Antong, tingki ro nampuna anggur i, aha ma bahenonna tu angka pangula i?” 41  Dialusi nasida ma ibana, “Ala jahat do nasida, pamateonna ma nasida jala pasewahononna ma porlak anggur i tu angka pangula na asing na olo mangalehon parbuena tu ibana dung dapot tingkina.” 42  Ninna Jesus ma tu nasida, “Na so hea do dijaha hamu di Surat na Badia, ‘Batu na binolongkon ni tukang nunga gabe batu parsuhi-suhi na rumingkot.* Sian Jahowa do i jala halongangan do i di hita’? 43  Alani i hudok ma tu hamu, buaton ma Harajaon ni Debata sian hamu, jala lehonon ma i tu sada bangso na mangulahon lomo ni roha ni Debata. 44  Masarsar ma manang ise na madabu tu batu i jala ropuk ma manang ise na hona tipa batu i.” 45  Dung dibege angka malim kepala* dohot Parise angka tudosan i, diboto nasida ma, taringot tu nasida do na nidokna. 46  Naeng tangkupon ni nasida do nian Jesus. Alai mabiar do nasida tu natorop i, ai panurirang do ibana didok roha ni nasida.

Surat na di toru

Manang “liang”.
Ida di Kamus.
Ida di Kamus.
As. “On do panean i”.
Ida di Kamus.
Ida di Kamus.