Mateus 19:1-30

  • Mardongan saripe dohot marsirang (1-9)

  • Ndang marhasohotan, sada silehon-lehon (10-12)

  • Dipasu-pasu Jesus angka dakdanak (13-15)

  • Sungkun-sungkun ni doli-doli na mora (16-24)

  • Na nilehon tu Harajaon (25-30)

19  Dung sae dihatahon Jesus taringot i, laho ma ibana sian Galilea tu parbatasan ni Judea na di bariba ni Sunge Jordan.  Torop do halak mangihuthon ibana jala dipamalum ma nasida disi.  Dung i, ro ma halak Parise laho manguji ibana jala disungkun ma, “Mangihuthon patik, boi do sirangkonon ni sahalak baoa tunggane boruna asal ma adong alana?”  Dialusi Jesus ma, “Na so hea do dijaha hamu, sian mulana i do ditompa Panompa i baoa dohot borua?  Jala didok do, ‘Alani i, tadingkonon ni baoa ma amana dohot inana asa rap* dohot tunggane boruna, jala gabe sada ma nasida na dua.’  Jadi, ndang dua be nasida alai sada* nama. Alani i, naung pinadomu ni Debata,* ndang jadi sirangon ni jolma.”  Didok nasida ma, “Antong, boasa do bahenon ni si Musa parenta asa dilehon surat sirang laho manirangkon tunggane boruna?”  Didok Jesus ma tu nasida, “Alani tangkang ni rohamuna do umbahen na diloas si Musa hamu manirangkon tunggane borumuna. Alai, ndang songon i hian sian mulana.  Hudok ma tu hamu, manang ise na manirangkon tunggane boruna molo so alani na mangulahon seks na so patut* jala mangoli muse tu na asing, na mangalangkup do ibana disi.” 10  Didok angka sisean i ma tu Jesus, “Molo songon i do hape pardongan saripeon, dumenggan ma ndang marhasohotan.” 11  Didok ibana ma tu nasida, “Ndang sude halak boi mangihuthon i, holan halak na manjalo silehon-lehon i do. 12  Adong do na so marhasohotan ala nunga songon i partubuna,* adong do ala na binahen ni halak, alai adong do na mamillit ndang marhasohotan asa boi mangulahon ulaon Harajaon banua ginjang. Manang ise na boi mangihuthon i, diulahon ma.” 13  Dung i, diboan ma angka dakdanak tu Jesus asa diampehon tanganna tu nasida jala ditangiangkon, alai dimuruki angka sisean i ma nasida. 14  Alai ninna Jesus ma, “Loas ma angka dakdanak i. Unang orai nasida ro tu ahu, ai angka halak sisongon i do nampuna Harajaon banua ginjang.” 15  Diampehon Jesus ma tanganna tu angka dakdanak i jala laho ma ibana sian i. 16  Dung i, ro ma sasahalak mandapothon Jesus, ninna ma, “Guru, dia do ulaon na denggan na ingkon siulahononku asa dapothu hangoluan na salelengna?” 17  Didok Jesus ma ibana, “Boasa sungkunonmu tu ahu taringot tu na denggan? Holan sada do na denggan. Alai molo naeng dapotmu hangoluan, tongtong ma oloi angka parenta ni Debata.” 18  Disungkun ibana ma muse, “Parenta na dia ma i?” Dialusi Jesus ma, “Unang ho mambunu, unang ho mangalangkup, unang ho manangko, unang ma dok hata na so tutu, 19  pasangap ma amangmu dohot inangmu jala haholongi ma donganmu jolma doshon dirim.” 20  Didok baoa na poso i ma tu Jesus, “Nunga huulahon sudena i, aha dope na hurang?” 21  Didok Jesus ma tu ibana, “Molo naeng sun denggan* do ho, laho ma ho, gadis ma artam jala lehon ma tu na pogos asa adong artam di banua ginjang. Dung i, ihuthon ma ahu.” 22  Mambege i, laho ma baoa i di bagasan arsak ni roha, ai godang do artana. 23  Didok Jesus ma tu angka siseanna, “Tutu do na hudok on tu hamu, maol do halak na mora masuk tu Harajaon banua ginjang i. 24  Hudok ma muse tu hamu, ummura do unta masuk tu lubang ni jarum sian apala sahalak na mora masuk tu Harajaon ni Debata.” 25  Dung dibege angka sisean i hata ni Jesus i, tarsonggot ma nasida, ninna ma, “Antong, ise ma na boi malua?” 26  Huhut diida Jesus tu nasida, ninna ma, “Ndang tarbahen ni jolma i, alai sude do tarbahen ni Debata.” 27  Dung i, didok si Petrus ma mangalusi, “Nunga hutadingkon hami sude laho mangihuthon ho, antong aha ma jaloonnami?” 28  Ninna Jesus ma tu nasida, “Tutu do na hudok on tu hamu, paimbaruonna ma sude tingki hundul Anak ni jolma i di habangsana na marmulia. Jala hamu angka na mangihuthon ahu, dohot do hundul di 12 habangsa laho manguhumi 12 marga ni Israel. 29  Ganup halak na manadingkon jabuna, haha anggina, ibotona, amana, inana, ianakhonna manang tanona alani goarhu, jaloonna ma 100 hali lompit gumodang jala dapotna ma hangoluan saleleng ni lelengna. 30  “Alai, torop do na parjolo gabe na parpudi jala na parpudi gabe na parjolo.

Surat na di toru

As. “Di bahasa Junani, lapatanna songon na dilem”.
As. “sada daging”.
As. “naung binahen ni Debata di sada auga”.
Manang “parmainanon”. Di bahasa Junani porneia. Ida di Kamus.
Martihas sian mulai tubu.
Manang “singkop”.