Mateus 15:1-39

  • Dipapatar taringot tu adat ni jolma (1-9)

  • Sian roha do kaluar angka na ramun (10-20)

  • Borua Penisia na balga haporseaonna (21-28)

  • Godang na cacat dipamalum Jesus (29-31)

  • Dilehon Jesus mangan 4.000 baoa (32-39)

15  Dung i ro ma halak Parise dohot siboto surat sian Jerusalem mandapothon Jesus, ninna ma,  “Boasa ndang diihuthon angka siseanmi adat ni angka ompunta? Umpamana, ndang disunsi* nasida tanganna laho mangan.”  Dialusi Jesus ma nasida, “Boasa ndang diihuthon hamu parenta ni Debata alani adatmuna?  Umpamana, didok Debata do, ‘Pasangap ma amangmu dohot inangmu,’ jala, ‘Manang ise na mangaleai* amangna manang inangna ingkon pamateon do.’  Alai didok hamu do, ‘Manang ise na mandok tu amangna dohot inangna, “Sude na ingkon lehononku hian tu hamu, nunga hubahen gabe silehon-lehon tu Debata,”  ndang ingkon pasangaponna be amana.’ Alani i, gabe ndang marlangku be hata ni Debata alani adatmuna i.  Halak na munafik do hamu. Toho ma na nidok ni panurirang Jesaya taringot tu hamu,  ‘Holan di pamanganna do bangso on pasangaphon ahu, alai dao do roha ni nasida sian ahu.  Ndang adong gunana nasida tongtong manomba ahu, ai parenta ni jolma do diajarhon nasida.’” 10  Dijou Jesus ma natorop i, ninna ma tu nasida, “Tangihon jala parrohahon ma on: 11  Ndang na masuk tu pamangan ni sasahalak na mambahen ibana ramun, alai na kaluar sian pamanganna do.” 12  Dung i, didapothon angka siseanna ma Jesus jala ninna ma, “Diboto ho do naung hansit roha ni halak Parise i mambege na nidokmi?” 13  Dialusi Jesus ma, “Sibutbuton do ganup suan-suanan na so sinuan ni Damang na di banua ginjang i. 14  Pasombu ma disi. Panogu-nogu na mapitung do nasida. Molo na mapitung manogu-nogu na mapitung, tarrobung do duansa.” 15  Ninna si Petrus ma, “Patorang ma tudosan i tu hami.” 16  Dung i ninna Jesus ma, “Tong do ndang mangantusi hamu? 17  Na so diboto hamu do, sude na masuk tu pamangan ni halak, masuk do i tu butuha jala kaluar do i muse? 18  Alai, sude na kaluar sian pamangan ni halak, na ro sian roha do i jala i do na mambahen ramun. 19  Umpamana, sian roha do tubu pingkiran na jahat, mambunu, mangalangkup, mangulahon seks na so patut,* manangko, mandok hata na so tutu dohot mangaleai. 20  Angka i do na mambahen ramun sasahalak, alai na so manunsi* tanganna laho mangan, ndang i na mambahen ramun sasahalak.” 21  Ditadingkon Jesus ma inganan i jala laho ma ibana tu luat Tirus dohot Sidon. 22  Ro ma sahalak borua Penisia* jala jou-jou ma ibana mandok, “Asi ma roham di ahu ale Tuan, Anak ni si Daud. Mansai hansit do dihilala borungku ala disonggopi suru-suruan na jahat ibana.” 23  Alai ndang dialusi Jesus ibana. Alani i, ro ma angka siseanna mandok, “Palao ma ibana, ai sai jou-jou do ibana di pudinta.” 24  Didok Jesus ma, “Holan tu halak Israel na songon biru-biru na lilu i do ahu disuru.” 25  Alai, ro ma borua i marsinggang tu ibana, ninna ma, “Urupi ma ahu Tuan!” 26  Didok Jesus ma mangalusi, “Ndang patut buaton roti ni dakdanak jala sampathonon tu anak ni biang.” 27  Didok borua i ma tu ibana, “Toho do i Tuan, alai roti na madabu sian meja ni tuanna i do diallang anak ni biang i.” 28  Dung i, didok Jesus ma tu ibana, “Balga do haporseaonmu, saut ma na pinangidomi.” Laos di tingki i malum ma boruna i. 29  Sian i, laho ma Jesus tu jonok ni Laut Galilea. Dung i, nangkok ma ibana tu sada dolok jala hundul disi. 30  Ro ma mansai torop halak mandapothon Jesus. Dipamboan ma halak na pangpang, na martihas, na mapitung, na ngungu, jala godang dope angka na marsahit. Dipeakkon nasida ma i di pat ni Jesus jala dipamalum ibana ma nasida. 31  Longang ma natorop i dung diida nasida boi mangkatai na ngungu, malum na martihas, mardalan na pangpang, jala marnida na mapitung, gabe dipuji nasida ma Debata ni Israel. 32  Dijou Jesus ma angka siseanna jala ninna ma, “Asi do rohangku tu natorop on, ai nunga tolu ari nasida rap dohot ahu jala ndang adong sipanganon ni nasida. Ndang suruonku nasida mulak ala male do nasida, so tung pingsan annon di dalan.” 33  Alai ninna siseanna ma, “Lungun do inganan on. Sian dia ma dapotta roti asa sae allangon ni natorop on?” 34  Ninna Jesus ma tu nasida, “Piga do roti na adong di hamu?” Dialusi nasida ma, “Pitu jala adong do manang na piga dengke na gelleng.” 35  Dung i disuru ma natorop i hundul di tano, 36  dibuat ibana ma roti na pitu i dohot dengke i. Dung mandok mauliate tu Debata, diponggoli ma roti i jala dibagihon ma tu siseanna asa dilehon tu natorop i. 37  Mangan ma nasida sude jala butong. Dung i, dipapungu ma lobi-lobi ni roti i, gok pitu karanjang na balga.* 38  Torop ni na mangan i hira-hira 4.000 baoa, ndang dope angka borua dohot dakdanak. 39  Dung disuru mulak natorop i, nangkok ma ibana tu parau jala laho ma ibana tu luat Magadan.

Surat na di toru

Manang “diburi”. Halak Parise dohot halak Jahudi manunsi tangan nasida mangihuthon adat ni halak Jahudi.
Manang “mamburai”.
Manang “parmainanon”. Di bahasa Junani porneia. Ida di Kamus.
Manang “mamburi”. Halak Parise dohot halak Jahudi manunsi tangan nasida mangihuthon adat ni halak Jahudi.
Manang “Kanaan”.
Manang “karanjang inganan manimpan sipanganon”.