Mateus 13:1-58

  • TUDOSAN TARINGOT TU HARAJAON (1-52)

    • Sahalak panabur (1-9)

    • Boasa Jesus mamangke tudosan (10-17)

    • Dipatorang tudosan taringot tu sahalak panabur (18-23)

    • Eme dohot simareme-eme (24-30)

    • Batu ni siarum dohot ragi (31-33)

    • Mamangke tudosan manggohi surirang (34, 35)

    • Dipatorang tudosan taringot tu eme dohot simareme-eme (36-43)

    • Arta na buni dohot mutiara na arga (44-46)

    • Jala (47-50)

    • Arta na imbaru dohot arta na leleng (51, 52)

  • Jesus ndang dijalo di hutana (53-58)

13  Di ari i, laho ma Jesus sian jabu i jala hundul di topi ni laut.  Torop ma halak mangkaliangi Jesus, dung i nangkok ma ibana tu sada parau jala hundul disi. Alai, jongjong do natorop i di topi ni laut.  Dung i, godang ma diajarhon ibana tu nasida marhite tudosan, ninna ma, “Kaluar ma sahalak panabur laho manaburhon boni.  Tingki na manabur i ibana, madabu ma deba boni i tu topi dalan jala ro ma angka pidong mangallang i.  Deba madabu di tano na marbatu na so pola godang tanona. Hatop do i tubu ala ndang bagas tano disi.  Alai dung lam mohop mata ni ari, malos ma i ala ndang bagas dope uratna.  Deba madabu di tonga-tonga ni suga-suga. Dung lam balga suga-suga i, dihapit ma suan-suanan i.  Na deba nai madabu di tano na denggan, marparbue ma i, adong na 100 hali lompit, adong na 60 hali lompit, jala na asing 30 hali lompit.  Manang ise na marpinggol, dibege ma i.” 10  Dung i, ro ma angka sisean ni Jesus manungkun ibana, “Boasa tudosan bahenonmu mangajari nasida?” 11  Dialusi ibana ma, “Dilehon do tu hamu pangantusion laho mamboto rahasia* na badia taringot tu Harajaon banua ginjang, alai ndang dilehon i tu nasida. 12  Ai tambaan do tu halak na adong di ibana, alai buaton do sian halak na so adong di ibana, gari na di ibana hian pe buaton do. 13  Ai marnida do nasida alai ndang adong gunana, marbinege do nasida alai ndang adong gunana jala ndang diantusi lapatanna. Alani i do marhite tudosan ahu mangajari nasida. 14  Alani i, saut ma surirang ni si Jesaya tu nasida na mandok, ‘Dibege hamu do nian, alai ndang diantusi hamu lapatanna. Diida hamu do nian, alai ndang diantusi hamu. 15  Ai ndang bungka be roha ni bangso on. Ditangihon nasida do marhite pinggolna alai dipanengel-nengel, ditutup nasida do matana gabe ndang marnida, ndang marbinege pinggol ni nasida, ndang mangantusi nang rohana jala ndang mulak nasida tu ahu. Alani i, ndang pamalumonku nasida.’ 16  “Alai, marlas ni roha ma hamu ala marnida do matamuna, jala marbinege do pinggolmuna. 17  Situtu do na hudok on tu hamu, lomo do roha ni torop panurirang dohot angka halak na mangulahon na sintong naeng mangida na niidamuna alai ndang diida nasida, jala naeng mambege na binegemuna alai ndang dibege nasida. 18  “Saonari, tangihon hamu ma lapatan ni tudosan taringot tu halak na manabur i. 19  Halak na mambege barita taringot tu Harajaon alai ndang diantusi lapatanna, tudos ma i tu boni na madabu di topi dalan. Dung i, ro ma Sibolis* mambuat boni naung disabur di rohana i. 20  Boni na madabu di tano na marbatu, tudos ma i tu sasahalak na mambege jala na manjalo barita i di bagasan las ni roha. 21  Alai ndang marurat i di bagasan rohana, holan parsatongkinan do. Tingki masa hasusaan manang sitaonon alani barita i, gabe tartuktuk do ibana. 22  Boni na madabu di suga-suga, tudos ma i tu halak na mambege barita i alai ndang marparbue, ala paholsohu tu parngoluon di tingki on* jala holongan tu hamoraon mangkapit barita i. 23  Boni na madabu tu tano na denggan i, tudos ma i tu halak na mambege barita i, mangantusi lapatanna jala marparbue. Adong na 100 hali lompit, na asing 60 hali lompit, jala na sada nai 30 hali lompit.” 24  Dipaboa ibana ma tudosan na asing tu nasida, ninna ma, “Harajaon banua ginjang i tudos do i tu sasahalak na manabur boni na denggan di ladangna. 25  Tingki modom angka jolma, ro ma musuna jala disabur ma simareme-eme* di tonga-tonga ni eme* i, dung i laho ma ibana. 26  Dung tubu jala marparbue eme i, tubu ma nang simareme-eme i. 27  Dung i, ro ma angka hatoban ni nampunasa ladang i, ninna ma, ‘Tuannami, nda boni na denggan do disabur ho di ladangmu? Sian dia do ro simareme-eme i?’ 28  Didok ibana ma tu nasida, ‘Sahalak musu do na mangulahon on.’ Disungkun angka hatoban i ma tu ibana, ‘Denggan do di roham, butbuton jala papunguonnami i?’ 29  Didok ibana ma, ‘Unang, so tung dohot tarbutbut eme i tingki dibutbut hamu simareme-eme i. 30  Pasombu hamu ma i rap tubu sahat tu na panen, jala tingki panen dohononku ma tu panabi asa jumolo dipapungu simareme-eme i jala dirahut dung i ditutung ma tu api. Dung i, papungu ma eme i tu poti.’” 31  Dipaboa ibana ma muse tudosan na asing tu nasida, ninna ma, “Tudos do Harajaon banua ginjang i tu boni na gelleng* na binuat ni sasahalak jala disuan tu ladangna. 32  On ma boni na ummetmet sian nasa boni, alai dung tubu umbalga do i sian sude sayur. Gabe songon hau ma i, jala ro ma angka pidong na martonga-tonga langit marasar di angka dangkana.” 33  Didok ibana ma tudosan na asing tu nasida, “Tudos do Harajaon banua ginjang i tu ragi na sinampur ni sahalak borua tu sampulu kilogram topung sahat tu na kambang adonan i.” 34  Sudena i diajarhon Jesus tu natorop i marhite tudosan. Sasintongna, ndang mangkatai ibana tu natorop i molo ndang marhite tudosan, 35  asa saut hata ni panurirang na mandok, “Hatahononku do angka tudosan. Paboaonku do angka na buni sian najolo.”* 36  Dung disuru mulak natorop i, masuk ma Jesus tu sada jabu. Ro ma siseanna tu ibana, ninna ma, “Patorang ma tu hami tudosan taringot tu simareme-eme na di ladang i.” 37  Dialusi ibana ma, “Na manabur boni na denggan, i ma Anak ni jolma i. 38  Ladang, i ma portibi on. Boni na denggan, i ma angka anak Harajaon. Alai simareme-eme, i ma angka anak ni Sibolis.* 39  Musu na manabur, i ma Sibolis. Panabi, i ma angka suru-suruan. Jala panen, i ma panutup ni jaman on.* 40  Songon simareme-eme na dipapungu jala ditutung, on ma na laho masa di panutup ni jaman on.* 41  Suruon ni Anak ni jolma i ma angka suru-suruan pakaluarhon sian Harajaonna sude na mambahen na asing mardosa dohot angka halak na mangalanggar patik. 42  Disampathon ma nasida tu api na marsigorgor. Disi ma nasida mangangguhi jala muruk situtu.* 43  Di tingki i, marsinondang ma angka halak na mangulahon lomo ni roha ni Debata di Harajaon ni Ama nasida, songon mata ni ari na marsinondang. Manang ise na marpinggol, dibege ma i. 44  “Tudos do Harajaon banua ginjang i tu arta na buni di ladang. Adong ma sasahalak na mandapot i, alai ditanom ma muse. Alani las ni rohana, laho ma ibana manggadis sude artana laho manuhor tano i. 45  “Tudos do muse Harajaon banua ginjang i tu sahalak partiga-tiga na mangalului mutiara na arga. 46  Dung dapotna sada mutiara na arga, laho ma ibana jala hatop ma digadis sude na adong di ibana laho manuhor i. 47  “Tudos do muse Harajaon banua ginjang i tu jala na sinampakkon tu laut, dung i dapot ma marragam dengke. 48  Dung gok, ditarik nasida ma jala i tu darat. Hundul ma nasida laho papunguhon dengke na denggan tu karanjang, alai dengke na so denggan dibolongkon do. 49  Songon i ma na masa di panutup ni jaman on,* ro ma angka suru-suruan manirang parjahat sian halak na mangulahon na sintong. 50  Disampathon ma parjahat i tu api na marsigorgor. Disi ma nasida mangangguhi jala muruk situtu.* 51  “Nunga diantusi hamu be sudena i?” Dialusi nasida ma, “Nunga.” 52  Dung i didok ibana ma tu nasida, “Sude guru* naung diajari taringot tu Harajaon banua ginjang, tudos ma i tu sahalak nampuna jabu na pakaluarhon arta na imbaru dohot arta na leleng sian panimpanan ni artana.” 53  Dung sae dipaboa sude tudosan i, laho ma Jesus sian i. 54  Dung sahat ibana tu hutana, mangajari ma ibana di sinagoga* ni nasida. Gabe longang ma halak na disi, ninna ma, “Sian dia do dapotna habisuhon dohot tanda halongangan* sisongon i? 55  Nda anak ni tukang hau ibana? Nda si Maria do inana, jala si Jakobus, si Josep, si Simon, dohot si Judas do angka anggina? 56  Nda rap dohot hita do angka ibotona? Ai sian dia do dapotna sudena i?” 57  Gabe ndang porsea be nasida tu ibana, dung i ninna Jesus ma tu nasida, “Sai dipasangap do panurirang, alai ndang sangap ibana di hutana dohot di jabuna sandiri.” 58  Ndang dibahen ibana be godang tanda halongangan* disi, ala ndang porsea nasida.

Surat na di toru

Manang “hahomion”.
As. “sijahat”.
Manang “di jaman on”. Ida di Kamus.
Na nidokna dison, i ma suan-suanan na songon gandum alai marrasun.
Na nidokna dison, suan-suanan na songon eme na tubu di Israel na jotjot dipangke mambahen roti.
Na nidokna dison, i ma boni na songon batu ni siarum na boi tubu gabe hau na timbona opat meter.
Manang boi do “sian mula ni portibi on”.
As. “sijahat”.
Manang “hasiangan on”. Ida di Kamus.
Manang “hasiangan on”. Ida di Kamus.
As. “patungoripon”.
Manang “hasiangan on”. Ida di Kamus.
As. “patungoripon”.
As. “siboto surat”. Na nidokna dison, i ma angka sisean na mangajari di jolo ni natorop.
Manang “di parguruan”. Ida di Kamus.
Manang “mukjizat”.
Manang “mukjizat”.