Markus 2:1-28

  • Jesus pamalumhon na lumpu (1-12)

  • Dipillit Jesus ma si Lepi (13-17)

  • Sungkun-sungkun taringot tu na marpuasa (18-22)

  • Jesus do “Tuan ni Ari Sabbat” (23-28)

2  Dung manang na piga ari, ro ma muse Jesus tu Kapernaum jala tarboto ma naung di sada jabu ibana.  Torop ma halak marpungu di inganan i, gabe gok ma inganan i sahat tu pintu. Dung i, dibaritahon ibana ma barita na uli tu nasida.  Adong ma opat halak na ro mamboan sahalak na lumpu.  Alani natorop i, ndang boi be nasida mamboan ibana tu Jesus. Gabe dibungka ma atap na di ginjang ni Jesus jala dipaturun ma na lumpu i peak di tandu.  Dung diida Jesus haporseaon ni nasida, ninna ma tu na lumpu i, “Ale anaha, nunga disesa dosam.”  Alai didok deba siboto surat na hundul disi ma di bagasan rohana,  “Boasa didok ibana songon i? Mangaleai do ibana disi. Nda holan Debata do na boi manesa dosa?”  Alai diboto Jesus do na di roha ni nasida i. Alani i, ninna ma, “Boasa songon i dipingkiri hamu di bagasan rohamuna?  Dia do ummura dohonon tu na lumpu on, ‘Nunga disesa dosam,’ manang ‘Hehe ma ho, angkat ma tandumi, jala mardalan ma ho’? 10  Alai asa diboto hamu, marhuaso do Anak ni jolma i manesa angka dosa di tano on.” Dung i ninna ma tu na lumpu i, 11  “Hudok ma tu ho, hehe ma, boan ma tandumi, mulak ma ho tu jabum.” 12  Dung i hehe ma ibana, diangkat ma tanduna i jala mardalan ma ibana di jolo ni natorop i. Gabe longang ma sude nasida jala dipuji ma Debata, ninna ma, “Ndang hea dope taida sisongon on.” 13  Laho ma Jesus muse tu topi ni laut. Marroan ma torop halak mandapothon ibana jala diajari ma nasida. 14  Tingki mardalan ibana, diida ma si Lepi anak ni si Alpeus hundul di kantor pajak. Ninna Jesus ma tu ibana, “Ihuthon ma ahu.” Jongjong ma ibana jala diihuthon ma Jesus. 15  Di pudian ni ari, mangan ma Jesus di jabu ni si Lepi. Torop do sijalo pajak* dohot angka pardosa mangan raphon Jesus dohot angka siseanna, ai godang do sian nasida gabe mangihuthon Jesus. 16  Diida angka siboto surat sian punguan ni Parise ma na mangan Jesus raphon angka pardosa dohot sijalo pajak. Gabe didok nasida ma tu sisean ni Jesus, “Boasa mangan ibana rap dohot sijalo pajak dohot angka pardosa?” 17  Mambege i, ninna Jesus ma tu nasida, “Ndang porlu pangubati tu halak na sehat, alai tu halak na marsahit do. Ai ndang na laho manjou halak na mangulahon na sintong ahu umbahen na ro, alai manjou pardosa i do.” 18  Somal do sisean ni si Johannes dohot halak Parise marpuasa. Alani i, ro ma nasida manungkun Jesus, “Boasa sisean ni si Johannes dohot sisean ni halak Parise marpuasa, hape angka siseanmi ndang marpuasa?” 19  Gabe didok Jesus ma tu nasida, “Ndang tagamon marpuasa angka ale-ale ni pangoli saleleng rap dope nasida dohot pangoli i, ndang i ? Tingki rap dope nasida dohot pangoli i, ndang boi nasida marpuasa. 20  Alai na ro ma tingkina, buatonna ma pangoli i sian nasida, dung i pe asa marpuasa nasida. 21  Ndang adong halak na mandungkaphon abit na imbaru tu abit naung buruk. Ai maribak do abit na buruk bahenon ni i, gabe lam bidang ma na maribak i. 22  Jala ndang adong halak na mambahen anggur na baru tu inganan* naung buruk. Ai molo dibahen songon i, sega ma ingananna i bahenon ni anggur i, gabe bolong ma anggur i, songon i nang ingananna i. Alai tu inganan na imbaru do bahenon anggur na baru.” 23  Di sada tingki, mamolus ma Jesus sian ladang gandum di ari Sabbat. Diputikkon angka siseanna ma biur ni gandum jala diallang huhut mardalan. 24  Gabe didok halak Parise ma tu Jesus, “Boasa diulahon siseanmi ulaon na so boi diulahon di ari Sabbat?” 25  Alai didok Jesus ma tu nasida, “Na so hea do dijaha hamu taringot tu na niulahon ni si Daud tingki male ibana dohot angka donganna? 26  Mangihuthon hatorangan taringot tu si Abiatar malim kepala i, masuk do si Daud tu bagas ni Debata jala diallang do roti pelean na so boi allangonna, ai mangihuthon patik holan malim do na boi mangallang i. Dung i, dilehon ibana do muse roti i allangon ni angka donganna.” 27  Ninna Jesus ma muse, “Dibahen Debata do ari Sabbat laho parohon laba tu jolma, alai ndang na laho mandalanhon ari Sabbat umbahen ditompa Debata jolma.” 28  Alani i, Anak ni jolma i do Tuan ni ari Sabbat.

Surat na di toru

Manang “sijalo beo”.
Tas na sian kulit ni binatang.