Markus 15:1-47

  • Jesus di jolo ni si Latus (1-15)

  • Direhe-rehei di jolo ni godang halak (16-20)

  • Dipakkuhon tu sada hau di Golgata (21-32)

  • Hamamate ni Jesus (33-41)

  • Jesus dikuburhon (42-47)

15  Dung torang ari, marrapot ma angka malim kepala,* angka pangituai dohot angka siboto surat dohot sude Sanhedrin.* Ditali nasida ma Jesus jala dipasahat tu si Latus.  Disungkun si Latus ma ibana, “Raja ni halak Jahudi do ho?” Dialusi Jesus ma, “Tutu, songon na nidokmi ma.”  Alai, dipandok angka malim kepala* do godang hatorangan na so tutu taringot tu Jesus.  Gabe disungkun si Latus ma muse tu Jesus, ninna ma, “Ndang alusanmu i? Na so dibege ho do godang ni hatorangan ni nasida mangalo ho?”  Alai ndang dialusi Jesus nanggo sangkababa pe, gabe longang ma si Latus.  Di ganup perayaan Paska, somal do dipalua si Latus sasahalak sian penjara, mangihuthon na pinangido ni natorop i.  Di tingki i, adong ma sahalak na margoar si Barabas. Rap dipenjarahon do ibana dohot angka donganna panggunturi jala mambunu do nasida tingki na manggunturi i.  Dung i, didapothon natorop i ma si Latus jala dipangido ma asa dibahen songon na somal diulahon ibana.  Disungkun si Latus ma nasida, “Lomo do rohamuna molo hupalua Raja ni halak Jahudi i?” 10  Ai diboto si Latus do, dipasahat angka malim kepala* i pe Jesus, ala na mangiburu do roha nasida. 11  Alai dijujui angka malim kepala* ma natorop i asa si Barabas na dipalua tu nasida. 12  Ninna si Latus ma muse mangalusi nasida, “Antong, songon dia ma bahenonku tu halak na nidokmuna Raja ni halak Jahudi i?” 13  Marsurak ma muse nasida mandok, “Uhum mate ibana tu hau!” 14  Didok si Latus ma tu nasida, “Boasa? Ai hajahaton aha diulahon ibana?” Alai lam gogo do didok nasida, “Uhum mate ibana tu hau!” 15  Ala naeng mambuat roha ni natorop i, dipalua si Latus ma si Barabas. Disuru ma asa dilinsingi Jesus jala dipasahat laho diuhum mate di hau. 16  Dung i, diboan angka tentara i ma Jesus tu alaman ni jabu ni gubernur jala dijou ma sude tentara asa marpungu. 17  Dibahen nasida ma pangkeonna abit na piolet, didandan ma suga-suga gabe songon mahkota jala dibahen tu uluna. 18  Dijouhon nasida ma tu ibana, “Horas,* Raja ni Jahudi!” 19  Dung i diantuk nasida ma uluna mamangke hau-hau, ditijuri ma ibana jala marsinggang ma nasida marsomba tu ibana. 20  Dung direhe-rehei nasida ibana, ditanggal nasida ma abit na piolet i jala dipangkehon ma abit luarna i tu ibana. Dung i, diboan ma ibana asa dipakkuhon tu hau. 21  Mamolus do sian i sahalak na ro sian huta di luat i, i ma si Simon halak Kirene amang ni si Aleksander dohot si Rupus. Dipaksa nasida ma ibana mamboan hau partinaonan* i. 22  Dung i, diboan nasida ma Jesus tu inganan na digoari Golgata, lapatanna, “Inganan ni Tangkurak.” 23  Disi, dilehon nasida ma tu ibana anggur na marsampur mir* alai ndang olo ibana manginum i. 24  Dipakkuhon nasida ma Jesus tu hau jala dibagi-bagi nasida ma abit luarna marhite undi, laho manontuhon manang na dia bagian ni nasida. 25  Hira-hira jam sia manogot,* dipakkuhon ma ibana tu hau. 26  Jala disurat do di papan di atas ni uluna alani aha ibana diuhum, “Raja ni halak Jahudi,” i ma na patuduhon ala ni aha ibana diuhum mate. 27  Rap dohot ibana dipakkuhon do dua halak pangarampok, sada di siamunna jala sada nai di hambirangna. 28  *—— 29  Dohot do angka halak na mamolus sian i mangaleai ibana huhut mangupir-upir. Ninna nasida ma, “E ho na naeng mangarumpakkon bagas joro jala pajongjongkon i muse di bagasan tolu ari, 30  palua ma dirim, turun ma ho sian hau partinaonan* i!” 31  Laos songon i do nang angka malim kepala* dohot siboto surat mangarehei Jesus. Ninna nasida ma, “Ia na asing dipalua, alai dirina ndang boi dipalua! 32  Molo Kristus do ibana, Raja ni Israel, turun ma ibana sian hau partinaonan* i, asa taida jala porsea ma hita tu ibana.” Laos dohot do na rap dipakkuhon di lambungna i mangarehei ibana. 33  Hira-hira jam 12 arian,* mangkolom ma sude luat i sahat tu jam tolu botari.* 34  Hira-hira jam tolu botari, gogo ma dijouhon Jesus, “Eli, Eli, lama sabakhtani?” lapatanna, “Debatangku, Debatangku, boasa tadingkononmu ahu?” 35  Mambege i, deba halak na jongjong disi mandok, “Dijou ibana do si Elia.” 36  Dung i marlojong ma sasahalak, disornophon ma bunga karang tu anggur na asom, jala dibahen ma tu hau-hau laho dilehon inumonna. Alai ninna ma, “Pasombu ma jolo! Taida ma manang na ro do si Elia paturunhon ibana.” 37  Dung i, gogo ma Jesus marsoara laos tos ma hosana.* 38  Jala ribak dua ma tire ni bagas joro sian ginjang sahat tu toru. 39  Dung diida komandan ni tentara na jongjong di jolo ni Jesus i sude na masa tingki parmate ni Jesus, didok ma, “Tutu do ibana Anak ni Debata.” 40  Adong do disi angka borua na manatap-natap sian na dao, i ma si Maria Magdalena, si Maria ina ni si Jakobus na umposo dohot si Joses, dohot si Salome. 41  Nasida ma na mangihuthon jala na manarihon Jesus tingki di Galilea. Jala torop dope borua na asing na rap ro dohot ibana tu Jerusalem. 42  Ala nunga botari jala ari Sabbat do marsogotna i, 43  ro ma si Josep sian Arimatea. Ibana sahalak anggota ni Pengadilan Agama Jahudi* na tongtong maima-ima tu Harajaon ni Debata. Dibaranihon ibana ma dirina mandapothon si Latus laho mangido bangke ni Jesus. 44  Alai, ndang pos dope roha ni si Latus naung mate Jesus. Dijou ma sahalak perwira jala disungkun ma tu ibana manang naung tutu Jesus mate. 45  Dung dibege si Latus hatorangan ni perwira i, diloas ibana ma buaton ni si Josep bangke ni Jesus. 46  Dituhor si Josep ma abit linen na halus, dung i dipaturun ma bangke ni Jesus jala dibungkus tu abit linen i. Dipeakkon ma bangke i tu bagasan kuburan, i ma dolok batu naung diliangi. Digulingkon ma batu laho manutup kuburan i. 47  Alai, sai dipanotnoti si Maria Magdalena dohot si Maria ina ni si Joses do kuburan ni Jesus i.

Surat na di toru

Ida di Kamus.
Ida di Kamus.
Ida di Kamus.
Ida di Kamus.
Ida di Kamus.
Manang “Jangkon ma”.
Ida di Kamus.
Siinumon na mambahen mabuk.
Di tingki ni Jesus tudos ma on tu jam patoluhon. On dietong sian parbinsar ni mata ni ari.
Ida Mateus 17:21, surat na di toru.
Ida di Kamus.
Ida di Kamus.
Ida di Kamus.
Di tingki ni Jesus tudos ma on tu jam paonomhon. On dietong sian parbinsar ni mata ni ari.
Di tingki ni Jesus tudos ma on tu jam pasiahon. On dietong sian parbinsar ni mata ni ari.
Manang “mate ma ibana”.
Manang “Sanhedrin”.