Markus 11:1-33

  • Manjangkon haroro ni Jesus (1-11)

  • Diburai Jesus hau ara (12-14)

  • Dipalao Jesus partiga-tiga sian bagas joro (15-18)

  • Parsiajaran sian hau ara na masak (19-26)

  • Dialo huaso ni Jesus (27-33)

11  Dung lam jonok nasida tu Jerusalem, di Betpage dohot di Betania na di Dolok Jetun, disuru Jesus ma dua halak siseanna,  ninna ma, “Laho ma hamu tu huta na di jolo an. Dung sahat hamu tusi, jumpangmuna ma disi sada halode na tartambat, na so hea dope dihunduli halak. Bungka ma talina i jala boan ma tuson.  Molo adong na manungkun hamu, ‘Boasa dipalua hamu halode i?’ dok ma, ‘Na porlu do i di Tuan i jala hatop do i paulahonna muse tuson.’”  Laho ma angka sisean i jala jumpang nasida ma halode i, tartambat di jolo ni pintu ni sada jabu di pinggir dalan. Dung i, dibungka nasida ma talina i.  Alai, adong ma manang na piga halak na jongjong disi manungkun nasida, “Boasa dipalua hamu halode i?”  Dialusi nasida ma songon na nidok ni Jesus, gabe dipaloas ma nasida laho.  Diboan nasida ma halode i tu Jesus, dibahen nasida ma pangkean ni nasida tu halode i jala hundul ma Jesus di atasna.  Torop do halak na pahembangkon pangkean ni nasida di dalan i jala na deba mamonggoli ranting ni hau sian ladang.  Angka halak na mardalan di jolo dohot di pudi ni Jesus sai manggorahon, “Sai lehon ma haluaon! Dipasu-pasu ma na ro di bagasan goar ni Jahowa! 10  Dipasu-pasu ma Harajaon ni amangta si Daud na laho ro! Sai lehon ma haluaon, Ho na di banua ginjang!” 11  Dung sahat Jesus tu Jerusalem, masuk ma ibana tu bagas joro. Diida ibana ma humaliang, ala nunga botari laho ma ibana tu Betania rap dohot apostel na 12 i. 12  Marsogotna i, tingki borhat nasida sian Betania male ma dihilala Jesus. 13  Sian na dao, ditatap ibana ma sada hau ara naung marbulung. Didapothon ibana ma tusi laho mangida atik boha adong parbuena. Alai dung sahat tusi, ndang adong dapotna agia aha asing ni angka bulungna, ai ndang dapot dope tingkina marparbue. 14  Dung i didok ma tu hau i, “Tung so adong be na mangallang parbuem salelengna.” Dibege angka siseanna i do hatana i. 15  Dung sahat nasida di Jerusalem, masuk ma Jesus tu bagas joro. Dipalao ibana ma sude angka partiga-tiga dohot panuhor na adong di bagas joro i. Ditunggalingkon ma meja ni angka situngkar hepeng dohot bangku ni partiga-tiga darapati. 16  Jala ndang dipaloas ibana manang ise pe mamboan siboanon mamolus sian bagas joro i. 17  Laos ninna do mangajari nasida, “Nda tarsurat do, ‘Bagas partangiangan ni saluhut bangso do didok bagashu’? Alai dibahen hamu do i gabe inganan* ni angka pangarampok.” 18  Dibege angka malim kepala* dohot siboto surat do i, gabe dilului nasida ma dalan laho mambunu Jesus. Alai mabiar do nasida tu ibana, ai sude do natorop i longang alani na niajarhonna. 19  Dung botari, laho ma Jesus dohot angka siseanna sian kota Jerusalem. 20  Alai tingki mamolus nasida manogotna i, diida nasida ma nunga masak hau ara i sahat tu uratna. 21  Diingot si Petrus ma hau ara i, ninna ma tu Jesus, “Guru, ida ma! Nunga masak hau ara na binuraanmi.” 22  Didok Jesus ma tu nasida, “Haporseai ma Debata. 23  Tutu do na hudok on tu hamu, manang ise na mandok tu dolok on, ‘Hinsat ma ho jala dabu ma ho tu laut,’ sai na saut do i asal ma porsea ibana na laho saut na nidokna i jala ndang ganggu rohana. 24  Alani i do hudok tu hamu, jaloonmuna ma sude na tinangiangkon dohot na pinangidomuna, molo porsea hamu na jaloonmuna i. 25  Tingki jongjong hamu laho martangiang, sesa hamu ma sala ni donganmuna tu hamu, asa disesa Amamuna na di banua ginjang i salamuna.” 26  *—— 27  Ro ma muse nasida tu Jerusalem. Tingki mardalan Jesus di bagas joro didapothon angka malim kepala,* angka siboto surat dohot angka pangituai ma ibana. 28  Ninna ma tu Jesus, “Huaso ni ise do dipangke ho mangulahon on? Ise do na marsuru ho mangulahon i?” 29  Dialusi Jesus ma nasida, “Ahu pe adong do sada sisungkunonku tu hamu. Alusi hamu ma ahu, dung i paboaonku ma tu hamu marhite huaso ni ise ahu mangulahon i sude. 30  Pandidion ni si Johannes i, sian banua ginjang do manang sian jolma? Alusi ma ahu.” 31  Masisungkunan ma nasida, ninna ma, “Molo tadok sian banua ginjang, dohononna ma, ‘Antong boasa ndang porsea hamu tu ibana?’ 32  Manang, dohononta do i sian jolma?” Mabiar do nasida mandok songon i, ai sude do porsea si Johannes i sahalak panurirang. 33  Dialusi nasida ma Jesus, “Ndang huboto hami.” Didok Jesus ma tu nasida, “Ahu pe, ndang paboaonku tu hamu marhite huaso ni ise ahu mangulahon i sude.”

Surat na di toru

Manang “liang”.
Ida di Kamus.
Ida Mateus 17:21, surat na di toru.
Ida di Kamus.