Markus 10:1-52

  • Mardongan saripe dohot marsirang (1-12)

  • Dipasu-pasu Jesus angka dakdanak (13-16)

  • Sungkun-sungkun ni sahalak doli-doli na mora (17-25)

  • Na nilehon tu Harajaon (26-31)

  • Disurirangkon muse taringot tu hamamate ni Jesus (32-34)

  • Pangidoan ni si Jakobus dohot si Johannes (35-45)

    • Jesus ma tobusan humongkop torop jolma (45)

  • Dipamalum si Bartimeus na mapitung (46-52)

10  Borhat ma Jesus sian i jala sahat ma ibana di parbatasan ni Judea di bariba ni sunge Jordan. Torop ma muse halak mandapothon ibana jala diajari ma nasida songon na somal.  Ro ma angka halak Parise manguji ibana. Disungkun nasida ma tu Jesus, “Mangihuthon patik, boi do sahalak baoa manirangkon tunggane boruna?”  Dialusi Jesus ma nasida, “Songon dia do diparentahon si Musa tu hamu?”  Didok nasida ma, “Diloas si Musa do sasahalak mambahen surat sirang laho manirangkon tunggane boruna.”  Ninna Jesus ma tu nasida, “Alani tangkang ni rohamuna do disurathon si Musa parenta i tu hamu.  Alai sian mula ni panompaon i do ‘ditompa Ibana nasida baoa dohot borua.  Alani i, tadingkonon ni baoa ma amana dohot inana,  jala gabe sada* ma nasida na dua.’ Jadi, ndang dua be nasida alai sada nama.  Alani i, naung pinadomu ni Debata,* ndang jadi sirangon ni jolma.” 10  Dung masuk nasida tu sada jabu, disungkun angka sisean i ma muse Jesus taringot i. 11  Didok Jesus ma tu nasida, “Manang ise na manirangkon tunggane boruna jala mangoli tu na asing, na mangalangkup do ibana disi jala mardosa maradophon tunggane boruna. 12  Laos songon i, molo adong sahalak borua na manirangkon tunggane dolina jala muli tu na asing, na mangalangkup do ibana disi.” 13  Dipamboan halak ma angka dakdanak tu Jesus, alai dimuruki angka sisean i do nasida. 14  Marnida i, muruk ma Jesus jala ninna ma tu angka sisean i, “Loas ma angka dakdanak i ro tu ahu, unang orai hamu nasida. Ai angka halak sisongon i do nampuna Harajaon ni Debata. 15  Tutu do na hudok on tu hamu, manang ise na so manjalo Harajaon ni Debata songon dakdanak on, ndang boi masuk ibana tusi.” 16  Dung i, dihaol ibana ma angka dakdanak i, diampehon ma tanganna huhut dipasu-pasu ma nasida. 17  Tingki ditorushon Jesus pardalananna, ro ma sahalak baoa marlojong jala marsinggang tu jolona. Disungkun ibana ma, “Guru na Burju, aha do na ingkon huulahon asa dapothu hangoluan na salelengna?” 18  Didok Jesus ma tu ibana, “Boasa didok ho ahu na burju? Ndang adong na burju asing ni Debata. 19  Diboto ho do angka patik i, ‘Unang mambunu, unang mangalangkup, unang manangko, unang mangkatindangkon na so tutu, unang manipu, pasangap ma amangmu dohot inangmu.’” 20  Didok baoa i ma tu ibana, “Guru, nunga huulahon i sude sian dakdanak dope ahu.” 21  Diida Jesus ma ibana. Alani holongna tu ibana, ninna ma, “Sada do na hurang di ho. Laho ma ho, gadis ma sude artam, jala lehon ma tu angka na pogos asa adong artam di banua ginjang. Dung i, ihuthon ma ahu.” 22  Umbege i, lungun ma rohana jala laho ma ibana di bagasan arsak ni roha, ai godang do artana. 23  Dung diida humaliang, ninna Jesus ma tu angka siseanna, “Maol do parhepeng masuk tu Harajaon ni Debata!” 24  Tarsonggot ma angka sisean umbege hata ni Jesus i. Didok ibana ma muse, “Ale angka anaha, maol do masuk tu Harajaon ni Debata! 25  Ummura do unta masuk tu lubang ni jarum unang apala sahalak na mora masuk tu Harajaon ni Debata.” 26  Lam tarsonggot ma nasida jala ninna ma tu ibana,* “Ise ma na boi malua?” 27  Huhut diida tu angka siseanna, ninna Jesus ma, “Ndang tarbahen ni jolma i, alai sude do tarbahen ni Debata.” 28  Didok si Petrus ma tu Jesus, “Nunga hutadingkon hami sude laho mangihuthon ho.” 29  Dung i, didok Jesus ma muse, “Tutu do na hudok on tu hamu, manang ise na manadingkon jabuna, haha anggina, ibotona, amana, inana, ianakhonna manang tanona alani ahu dohot alani barita na uli, 30  jaloonna do di tingki on 100 hali lompit gumodang jabu, haha anggi, iboto, ina, ianakhon dohot tano, nang pe mardongan haporsuhon. Jala jaloonna do hangoluan saleleng ni lelengna di tingki na naeng ro.* 31  Alai, torop do na parjolo gabe na parpudi jala na parpudi gabe na parjolo.” 32  Di tingki i, di pardalanan do nasida laho tu Jerusalem jala di jolo ni nasida do Jesus mardalan. Longang do roha ni angka apostel i alai gabe mabiar do angka na asing na mangihuthon nasida. Pulik ma muse ditogihon Jesus angka siseanna na 12 i jala dipaboa ma tu nasida aha na laho masa tu ibana, 33  “Na laho nangkok ma hita tu Jerusalem jala pasahatonna ma Anak ni jolma i tu angka malim kepala* dohot siboto surat. Bahenon ni nasida ma tu ibana uhuman mate jala pasahatonna tu tangan ni angka bangso. 34  Direhei ma ibana, ditijuri, dilinsingi jala dipamate. Alai, hehe do ibana dung tolu ari.” 35  Didapothon si Jakobus dohot si Johannes angka anak ni si Sebedeus ma Jesus, jala ninna ma, “Guru, lehon ma tu hami na laho pangidoonnami tu ho.” 36  Didok ibana ma tu nasida, “Aha na pinangidomuna?” 37  Dialusi nasida ma ibana, “Loas ma hami hundul, sada di siamunmu jala sada di hambirangmu di hasangaponmi.” 38  Didok Jesus ma tu nasida, “Ndang diboto hamu manang aha na pinangidomuna. Boi ma tarinum hamu sian mangkuk panginumanki? Manang, boi ma hamu tardidi songon pandidion na tu ahu i?” 39  Dialusi nasida ma, “Boi do.” Dung i didok Jesus ma tu nasida, “Inumonmuna do sian mangkuk panginumanki jala didionna do hamu songon pandidion na tu ahu i. 40  Alai ndang ahu na manontuhon ise na laho hundul di siamun manang di hambirangku. Debata do na mamillit halak na laho hundul disi.” 41  Tingki dibege sisean na sampulu nai taringot i, muruk ma nasida tu si Jakobus dohot tu si Johannes. 42  Gabe dijou Jesus ma nasida jala ninna ma, “Diboto hamu do, angka halak na gabe parhuaso ni angka bangso mamarenta do tu rayatna. Jala, marhuaso do angka na sangap ni nasida tu rayatna. 43  Alai unang ma songon i hamu, manang ise na naeng umsangap ingkon gabe parhobas ma tu hamu. 44  Jala manang ise sian hamu na naeng parjolo, ingkon gabe hatoban ni saluhut ma ibana. 45  Gari Anak ni jolma i, ndang na sihobasan ibana umbahen na ro, alai na laho marhobas do jala mangalehon ngoluna bahen tobus ni torop jolma.” 46  Dung i sahat ma nasida di Jeriko. Alai tingki kaluar Jesus dohot angka siseanna sian Jeriko rap dohot natorop i, adong ma sahalak na mapitung na margoar si Bartimeus (anak ni si Timeus) na hundul mangido-ido di pinggir dalan. 47  Tingki dibege ibana Jesus halak Nasaret i do na mamolus, jou-jou ma ibana mandok, “Jesus, Anak ni si Daud, asi ma roham di ahu!” 48  Gabe godang ma halak na muruk tu ibana, asa tung sip nian ibana, alai lam gogo do dijouhon, “Anak ni si Daud, asi ma roham di ahu!” 49  Jadi so ma Jesus, ninna ma, “Jou hamu ma ibana.” Gabe dijou ma na mapitung i, didok ma tu ibana, “Pos ma roham! Hehe ma ho, dijou ibana do ho.” 50  Hatop ma ibana jongjong, disampathon ma abit luarna, jala didapothon ma Jesus. 51  Disungkun Jesus ma ibana, “Aha do dipangido roham sibahenonku tu ho?” Dialusi baoa na mapitung i ma Jesus, “Gurunami,* bahen ma ahu marnida.” 52  Dung i didok Jesus ma tu ibana, “Mulak ma ho. Haporseaonmi do mambahen ho malum.” Pintor boi ma ibana marnida muse, jala mardalan ma ibana mangihuthon Jesus.

Surat na di toru

As. “sada daging”.
As. “naung binahen ni Debata di sada auga”.
Manang boi do “sama nasida”.
Manang “di jaman na laho ro”. Ida di Kamus.
Ida di Kamus.
As. “Rabbuni”.