Markus 1:1-45

  • Si Johannes Pandidi marbarita (1-8)

  • Jesus dididi (9-11)

  • Jesus diela-ela Sibolis (12, 13)

  • Jesus marbarita di Galilea (14, 15)

  • Dipillit ma angka sisean na parjolo (16-20)

  • Dipalao ma suru-suruan na jahat (21-28)

  • Godang na dipamalum Jesus di Kapernaum (29-34)

  • Martangiang di inganan na lungun (35-39)

  • Sahalak na marsahit kusta dipamalum (40-45)

1  On ma mula ni barita na uli taringot tu Jesus Kristus, Anak ni Debata.  Songon na sinurat ni panurirang Jesaya, “(Suruonku ma manjoloani ho suruanku, na laho paradehon dalan di jolom.)  Adong ma soara na jou-jou di padang pasir,* ‘Parade hamu ma dalan ni Jahowa! Patigor hamu ma angka dalan sidalananna.’”  Di padang pasir* do si Johannes Pandidi. Dibaritahon ibana ma, pandidion i do na patuduhon hamubaon asa disesa dosa ni nasida.  Alani i, ro ma sude halak sian luat Judea dohot sian Jerusalem mandapothon ibana. Dung i, dididihon* si Johannes ma nasida di Sunge Jordan jala diakkui nasida ma sude dosa ni nasida.  Sian imbulu ni unta do pangkean ni si Johannes jala sian kulit ni binatang do hohosna. Sihapor dohot situak ni loba* na sian tombak do sipanganonna.  Dibaritahon ibana do, “Na ro ma sahalak di pudingku na umbalga huasona sian ahu. Haru unduk laho mambungka tali ni sipatuna pe ndang tama ahu.  Aek do na hudidihon tu hamu, alai didihononna do tu hamu tondi parbadia.”  Tingki i, ro ma Jesus sian Nasaret na di luat Galilea jala dididihon si Johannes ma ibana di Sunge Jordan. 10  Dung kaluar sian aek, diida ibana ma bungka langit jala turun ma tu atasna tondi parbadia songon darapati. 11  Tarbege ma soara sian langit na mandok, “Ho do Anakku, haholonganki. Halomoan ni rohangku do ho.” 12  Ditogihon tondi parbadia ma Jesus tu padang pasir.* 13  Saleleng 40 ari ma ibana disi rap dohot angka binatang liar. Dung i, diela-ela Sibolis* ma ibana, alai ro do angka suru-suruan patoguhon ibana. 14  Dung ditangkup si Johannes, laho ma Jesus tu Galilea mamaritahon barita na uli taringot tu Debata. 15  Ninna ma, “Nunga jumpang tingki naung ditontuhon i, nunga jonok Harajaon ni Debata. Pauba hamu ma rohamuna jala haporseai ma barita na uli i.” 16  Tingki mardalan Jesus di topi ni Laut Galilea, diida ibana ma si Simon dohot si Andreas na marhaha maranggi. Pas manampakhon jala do nasida tingki i tu laut, ai sijala dengke do nasida. 17  Ninna Jesus ma tu nasida, “Ihuthon hamu ma ahu, asa hubahen hamu gabe sijala jolma.” 18  Dung i, pintor ditadingkon nasida ma jala ni nasida i, laos diihuthon ma Jesus. 19  Ndang dao sian i, tingki mardalan Jesus, diida ma si Jakobus dohot si Johannes anak ni si Sebedeus di bagasan parau padengganhon jala ni nasida. 20  Dijou Jesus ma nasida, dung i ditadingkon nasida ma ama ni nasida si Sebedeus di parau i rap dohot angka parkarejona jala diihuthon ma Jesus. 21  Dung i, laho ma nasida tu Kapernaum. Dung dapot ari Sabbat, masuk ma Jesus tu sinagoga* jala mangajari disi. 22  Longang do nasida mambege ibana mangajari, ai sian Debata* do na niajarhonna i, ndang songon angka siboto surat. 23  Adong ma disi sahalak baoa na sinonggopan ni suru-suruan na jahat, jou-jou ma ibana mandok, 24  “Marhua ho ro tuson, ale Jesus halak Nasaret? Na laho ripashononmu do hami? Huboto do manang ise ho, na Badia ni Debata do ho!” 25  Alai disonggak Jesus ma suru-suruan na jahat i, “Sip ho, kaluar ma sian ibana!” 26  Mangkutur ma baoa i dibahen suru-suruan na jahat i, gogo ma ibana marsurak, dung i kaluar ma i sian ibana. 27  Gabe longang ma sude halak na disi jala mangkatai ma nasida sama nasida, ninna ma, “Aha do on? Ajaran na imbaru do on. Marhuaso do ibana palaohon angka suru-suruan na jahat jala dioloi do ibana.” 28  Alani i, tarsar ma barita taringot tu ibana di sude luat Galilea. 29  Kaluar ma nasida sian sinagoga jala laho ma ibana raphon si Jakobus dohot si Johannes tu jabu ni si Simon dohot si Andreas. 30  Di tingki i, peak do di jabu i simatua boru ni si Simon ala marsahit mohop. Dipaboa nasida ma tu Jesus taringot i. 31  Didapothon Jesus ma na marsahit i, ditiop ma tanganna laho manogu ibana asa hehe. Pintor malum ma ibana jala diparade ibana ma sipanganon tu nasida. 32  Dung borngin, dung bonom mata ni ari, dipamboan ma tu Jesus sude angka na marsahit dohot na sinonggopan ni suru-suruan na jahat. 33  Jala marpungu ma sude halak na di kota i di jolo ni pintu. 34  Dung i, dipamalum Jesus ma marragam sahit ni godang halak jala torop do suru-suruan na jahat dipalao ibana. Alai, ndang diloas Jesus angka suru-suruan na jahat i paboahon taringot tu ibana, ai diboto nasida do ibana Kristus. 35  Sogot manogotna i, tingki holom dope, hehe ma ibana laho tu inganan na lungun, disi ma ibana martangiang. 36  Alai, dilului si Simon dohot angka donganna ma ibana. 37  Dung jumpang nasida ibana, ninna ma, “Sude do halak mangalului ho.” 38  Alai didok Jesus ma tu nasida, “Laho ma hita tu inganan na asing, tu angka kota na jonok tuson, asa marbarita ahu disi, ai alani i do umbahen na ro ahu.” 39  Dung i, laho ma ibana marbarita tu angka sinagoga di sude luat Galilea jala dipalao ibana ma angka suru-suruan na jahat. 40  Ro ma sahalak na hona kusta* mandapothon Jesus, marsinggang ma ibana huhut mangelek-elek, ninna ma, “Molo na olo ho, boi do ahu malum* bahenonmu.” 41  Asi ma roha ni Jesus, disurdukkon ma tanganna laos dijama ma ibana jala ninna ma, “Na olo do ahu! Malum ma ho.” 42  Satongkin i, mago ma kustana i, gabe ias ma ibana. 43  Dung i, disuru Jesus ma ibana laho jala tangkas ma didok, 44  “Unang paboa manang tu ise pe. Alai patuduhon ma dirim tu malim, jala pasahat ma silehon-lehon songon naung diparentahon si Musa patuduhon naung malum ho.” 45  Alai dung laho baoa i, dipaboa do na masa i jala rarat ma barita i. Gabe so boi be Jesus masuk tu kota i diida natorop. Tongtong ma ibana disi, di inganan na lungun, alai sai marroan do halak tu ibana sian sude inganan.

Surat na di toru

Manang “halongonan”.
Manang “halongonan”.
Manang “dibonomhon”.
Manang “madu”.
Manang “halongonan”.
As. “Setan”. Ida di Kamus.
Manang “parguruan”. Ida di Kamus.
As. “sian na marhuaso”.
Manang “huliton”.
Manang “ias”.