Lukas 5:1-39

  • Tanda halongangan tingki manangkup dengke; angka sisean na parjolo (1-11)

  • Sahalak na marsahit kusta dipamalum (12-16)

  • Jesus pamalumhon na lumpu (17-26)

  • Dipillit Jesus ma si Lepi (27-32)

  • Sungkun-sungkun taringot tu na marpuasa (33-39)

5  Di sada tingki jongjong ma Jesus di topi ni Tao Genesaret,* masisosahan do natorop i manjonohi Jesus laho manangihon hata ni Debata.  Diida ibana ma dua parau di topi ni tao i. Tingki i, nunga kaluar pardengke i sian parau manunsi jala ni nasida.  Nangkok ma ibana tu sada sian parau i, i ma parau ni si Simon jala dipangido ma tu si Simon asa dionjar saotik parau i mandao sian darat. Dung i, hundul ma Jesus jala diajari ma natorop i sian parau i.  Dung sae ibana mangkatai tu natorop i, ninna ma tu si Simon, “Boan ma parau on dompak na umbagas jala paturun ma jalamuna i.”  Dialusi si Simon ma, “Guru, nunga loja hami saborngin on, alai ndang adong manang aha dapotnami. Alai alani hatami, hupaturun hami pe jala on.”  Dipaturun nasida ma jala i, dung i dapot* ni nasida ma dengke mansai godang, pola do naeng ribak jala ni nasida.  Gabe dijou nasida ma dongan ni nasida na di parau na asing asa ro mangurupi. Ro ma nasida jala digohi ma parau na dua i pola naeng lonong duansa.  Marnida i, marsinggang ma si Simon Petrus di pat ni Jesus, ninna ma, “Laho ma ho sian ahu Tuan, ai jolma pardosa do ahu.”  Ai longang do ibana dohot angka donganna alani godang ni dengke na dapot ni nasida i, 10  songon i nang si Jakobus dohot si Johannes dongan ni si Simon, angka anak ni si Sebedeus i. Alai didok Jesus ma tu si Simon, “Unang mabiar. Mulai sian saonari, gabe sijala jolma ma ho.” 11  Dung i, diboan nasida ma mulak parau i tu darat jala ditadingkon nasida ma saluhutna laho mangihuthon Jesus. 12  Di tingki na asing tagan di sada kota Jesus, adong ma disi sahalak baoa na gok kustana. Tingki diida ibana Jesus, manungkap ma ibana jala mangelek, ninna ma, “Tuan, molo olo ho, boi do ahu malum* bahenonmu.” 13  Dung i, disurdukkon Jesus ma tanganna laos dijama Jesus ma ibana jala didok, “Olo do ahu, malum ma ho.” Satongkin i, mago ma kusta i sian ibana. 14  Dung i diorai Jesus ma ibana paboa-boahon manang tu ise pe, ninna ma, “Laho ma ho, patudu ma dirim tu malim, jala pasahat ma silehon-lehon songon na nidok ni si Musa patuduhon naung malum ho.” 15  Nang pe songon i, lam tarbarita do Jesus. Gabe marpungu ma torop halak laho manangihon Jesus jala asa pamalumonna angka sahit ni nasida. 16  Alai, sai laho do ibana tu inganan na lungun laho martangiang. 17  Di sada tingki, mangajari ma Jesus di sada jabu. Hundul do disi halak Parise dohot angka guru na mangajarhon Patik na ro sian ganup huta di Galilea, Judea, dohot sian Jerusalem. Dilehon Jahowa do huasona tu Jesus laho pamalumhon. 18  Dung i, adong ma na mamboan baoa na lumpu na peak di atas ni tandu. Marsitutu do nasida mambahen ibana tu jolo ni Jesus. 19  Alai, ndang dapot ni nasida dalan laho mamboan ibana alani natorop i. Nangkok ma nasida tu tarup jala sian i ma dipaturun baoa i peak di tanduna tu tonga-tonga ni natorop i di jolo ni Jesus. 20  Dung diida Jesus haporseaon ni nasida, didok ma, “Ale anaha, nunga disesa dosam.” 21  Dung i masipandohan ma siboto surat dohot halak Parise, ninna ma, “Ise do halak on umbahen dileai ibana Debata? Ise ma na boi manesa dosa asing ni Debata?” 22  Alai diboto Jesus do pingkiran ni nasida, ninna ma, “Boasa songon i dipingkiri hamu di bagasan rohamuna? 23  Dia do ummura dohonon, ‘Nunga disesa dosam,’ manang ‘Hehe ma jala mardalan ma ho’? 24  Alai, asa diboto hamu na marhuaso do Anak ni jolma i di tano on laho manesa dosa.” Dung i ninna ma tu na lumpu i, “Hudok ma tu ho, hehe ma, boan ma tandumi jala mulak ma ho tu jabum.” 25  Dung i hehe ma ibana di jolo ni nasida, diangkat ma tandu inganan hapeahanna i jala mulak ma ibana tu jabuna, dipuji ma Debata. 26  Longang ma sude halak i, alani biar ni roha ni nasida dipuji ma Debata, didok ma, “Tung halongangan do na taida sadari on!” 27  Dung i laho ma Jesus, diida ibana ma sahalak sijalo pajak* na margoar si Lepi hundul di kantor pajak. Didok Jesus ma tu ibana, “Ihuthon ma ahu.” 28  Jongjong ma si Lepi, ditadingkon ma saluhutna jala diihuthon ma Jesus. 29  Dung i, dibahen si Lepi ma pesta na balga tu Jesus di jabuna. Jala torop do sijalo pajak* dohot angka na asing rap mangan dohot nasida. 30  Alani i marungut-ungut ma halak Parise dohot siboto surat na sian punguan ni nasida tu angka sisean i, ninna ma, “Boasa mangan minum hamu rap dohot angka sijalo pajak* dohot angka pardosa?” 31  Dialusi Jesus ma nasida, “Ndang porlu pangubati tu halak na sehat, alai tu halak na marsahit do porlu. 32  Ai ndang na laho manjou halak na mangulahon na sintong ahu umbahen na ro, alai manjou pardosa i do asa muba nasida.” 33  Didok nasida ma tu Jesus, “Jotjot do marpuasa jala martangiang sisean ni si Johannes songon i nang sisean ni halak Parise, alai mangan minum do angka siseanmu.” 34  Didok Jesus ma tu nasida, “Tung tarsuru hamu ma ale-ale ni pangoli i marpuasa saleleng rap dope nasida dohot pangoli i? 35  Alai na ro ma tingkina, buatonna ma pangoli i sian nasida, dung i pe asa marpuasa nasida.” 36  Didok ibana ma muse tudosan na asing tu nasida, “Ndang adong na mangaribakkon abit na baru laho mandungkaphon i tu abit naung buruk. Molo dibahen songon i, gabe ribak ma abit na baru i jala ndang suman pandungkap na sian abit na baru i tu abit naung buruk i. 37  Jala ndang adong halak na mambahen anggur na baru tu inganan* naung buruk. Ai molo dibahen songon i, segaan ni anggur na baru i ma inganan ni anggur i, gabe bolong ma anggur i jala sega ma ingananna i. 38  Alai, tu inganan na imbaru do bahenon anggur na baru. 39  Ndang adong halak na manginum anggur naung leleng mangido anggur na baru. Ai dohononna do, ‘Na leleng i do na tabo.’”

Surat na di toru

Na nidokna dison i ma Laut Galilea.
As. “tarjaring”.
Manang “ias”.
Manang “sijalo beo”.
Manang “sijalo beo”.
Manang “sijalo beo”.
Tas na sian huling-kuling ni binatang.