Lukas 4:1-44

  • Jesus diela-ela Sibolis (1-13)

  • Jesus marbarita di Galilea (14, 15)

  • Ndang dijalo Jesus di Nasaret (16-30)

  • Di sinagoga di Kapernaum (31-37)

  • Dipamalum simatua ni si Simon dohot na asing (38-41)

  • Dijumpangi natorop Jesus di inganan na lungun (42-44)

4  Dung i gok tondi parbadia ma Jesus, ditadingkon ma Sunge Jordan jala ditogu-togu tondi parbadia ma ibana tu padang pasir,*  disi ma ibana saleleng 40 ari. Ndang adong dipangan ibana manang aha saleleng 40 ari i, gabe male ma dihilala ibana dung marujung angka ari i jala diela-ela Sibolis ma ibana.  Ninna Sibolis ma tu ibana, “Molo tutu do ho anak ni Debata, dok ma batu on gabe roti.”  Alai dialusi Jesus ma ibana, “Tarsurat do, ‘Ndang holan sian roti jolma mangolu.’”  Dung i, ditogihon Sibolis ma Jesus tu inganan na timbo jala dipatudu ma di bagasan satongkin sude harajaon ni portibi on.  Dung i ninna Sibolis ma tu ibana, “Lehononku ma tu ho huaso dohot hasangapon ni sude harajaon on, ai nunga dipasahat i tu ahu jala lehononku ma i tu manang ise lomo ni rohangku.  Alani i, molo disomba ho ahu holan sahali pe, di ho ma i sude.”  Ninna Jesus ma mangalusi, “Tarsurat do, ‘Jahowa Debatam do na ingkon sisombaonmu jala holan tu Ibana do ho marhobas.’”  Dung i, ditogihon Sibolis ma Jesus tu Jerusalem jala dibahen ma ibana tu punsu ni tembok* ni bagas joro, ninna ma, “Molo tutu ho anak ni Debata, timbung ma sian on tu toru, 10  ai tarsurat do, ‘Suruon ni Debata do angka suru-suruanna laho manjaga ho,’ 11  jala, ‘Toguon ni nasida do ho asa unang tartuktuk patmu tu batu.’” 12  Dialusi Jesus ma, “Ai didok do, ‘Ndang jadi unjunanmu* Jahowa Debatam.’” 13  Dung dipasae Sibolis sude ela-elana i, ditadingkon ibana ma Jesus paima dapot tingki na pas di ibana. 14  Mulak ma Jesus tu Galilea jala digohi tondi parbadia ma ibana. Sude ma halak di humaliang ni luat i mambege barita na denggan taringot tu ibana. 15  Mulai ma ibana mangajari di angka sinagoga* ni nasida jala sude do mamuji ibana. 16  Dung i laho ma ibana tu Nasaret, huta hagodanganna. Songon na somal diulahon ibana di ari Sabbat, masuk ma ibana tu sinagoga* jala jongjong laho manjaha. 17  Dilehon ma tu ibana gulungan* ni panurirang Jesaya. Dibungka ibana ma i jala dapotna ma ayat on, 18  “Songgop do tu ahu tondi parbadia ni Jahowa ala dipillit do ahu laho mamaritahon barita na uli tu na pogos. Disuru do ahu paboahon haluaon tu angka na tartaban, pamalumhon parnidaan ni na mapitung, paluahon na marsitaonon, 19  jala mamaritahon taon parasi ni rohaon ni Jahowa.” 20  Dung i, digulung ibana ma gulungan* i jala dilehon ma tu na martugas. Hundul ma ibana jala sude ma na di sinagoga* i mamereng dompak ibana. 21  Didok ma tu nasida, “Sadari on ma saut ayat na binegemuna on.” 22  Sude ma nasida mamuji-muji ibana jala longang ma nasida mambege angka hata na uli na kaluar sian pamanganna. Didok nasida ma, “Nda anak ni si Josep ibana tahe?” 23  Dung i didok ibana ma tu nasida, “Huboto do na naeng dohononmuna songon on tu ahu, ‘E pangubati, pamalum ma jo dirim. Bahen ma di hutam on songon naung hubege hami angka na binahenmu di Kapernaum.’” 24  Dung i didok ibana ma, “Tutu do na hudok on tu hamu, ndang adong panurirang na dijalo* di hutana sandiri. 25  Umpamana, ndang ro udan saleleng tolu satonga taon di tingki ni si Elia jala masa do haraparon di sude luat. Godang do na mabalu di Israel di tingki i. 26  Alai ndang disuru Debata si Elia tu angka na mabalu i, holan tu na mabalu na di Sarpat na di luat Sidon i do. 27  Jala godang do angka na hona kusta di Israel di tingki ni panurirang Elisa, alai ndang adong sahalak pe sian nasida dipamalum, holan si Naaman halak Siria i do.” 28  Gabe tarrimas ma sude halak na di sinagoga* i dung dibege nasida hatana i. 29  Hehe ma nasida, ditarik nasida ma ibana tu luar ni kota. Diboan nasida ma ibana tu punsu ni dolok inganan ni kota i dipajongjong laho mandabuhon ibana. 30  Alai, mamolus do Jesus sian tonga-tonga ni nasida jala ditorushon ma pardalananna. 31  Dung i laho ma Jesus tu Kapernaum, sada kota di Galilea. Diajari ibana ma angka halak disi tingki ari Sabbat. 32  Longang do nasida mambege ibana mangajari, ai sian Debata do na niajarhonna* i. 33  Di sinagoga* adong ma sahalak na sinonggopan ni suru-suruan na jahat, marsurak ma ibana, 34  “Ai marhua ho ro tuson, ale Jesus halak Nasaret? Na laho ripashononmu do hami? Huboto do manang ise ho, na Badia ni Debata do ho!” 35  Alai disonggak Jesus ma suru-suruan na jahat i, “Sip ho, kaluar ma sian ibana!” Ditompashon suru-suruan na jahat i ma baoa i tu tonga-tonga ni nasida, dung i laho ma suru-suruan na jahat i sian ibana jala ndang manang mahua baoa i dibahen. 36  Longang ma nasida sude jala dipandok ma sama nasida, “Hata aha do i? Ai marhite huaso dohot hagogoon do diparenta ibana angka suru-suruan na jahat i, jala kaluar do nasida!” 37  Gabe sude ma halak di humaliang ni luat i mamboto taringot tu ibana. 38  Dung ditadingkon sinagoga* i, masuk ma Jesus tu jabu ni si Simon. Tingki i, mohop situtu do simatua boru ni si Simon jala dipangido nasida ma tu Jesus asa dipamalum ibana. 39  Dung i jongjong ma Jesus di lambung ni borua i, dipamalum ma ibana sian sahitna i. Pintor hehe ma borua i jala diparade ibana ma sipanganon tu nasida. 40  Dung bonom mata ni ari, dipamboani sude halak ma tu Jesus angka na marsahitna be, na manaon marragam sahit. Diampehon ibana ma tanganna tu ganup na marsahit i laho pamalumhon nasida. 41  Kaluar be do muse suru-suruan na jahat sian torop halak, marsurak huhut mandok, “Anak ni Debata do ho.” Alai disonggak Jesus ma nasida jala ndang diloas paboahon taringot tu ibana, ala diboto nasida do ibana Kristus. 42  Dung torang ari, borhat ma Jesus jala laho tu inganan na lungun. Alai dilului natorop i ma ibana jala ro tu inganan i. Sai diambati do ibana asa unang ditadingkon nasida. 43  Alai didok ibana ma tu nasida, “Di angka kota na asing pe ingkon baritahononku do barita na uli taringot tu Harajaon ni Debata, ai alani i do ahu disuru.” 44  Dung i, laho ma ibana marbarita di angka sinagoga* di Judea.

Surat na di toru

Manang “halongonan”.
Manang “inganan na tumimbo”.
Manang “ujionmu”.
Manang “parguruan”. Ida di Kamus.
Manang “parguruan”. Ida di Kamus.
Ida di Kamus.
Ida di Kamus.
Manang “parguruan”. Ida di Kamus.
Manang “dijangkon”.
Manang “parguruan”. Ida di Kamus.
As. “marhuaso”.
Manang “parguruan”. Ida di Kamus.
Manang “parguruan”. Ida di Kamus.
Manang “parguruan”. Ida di Kamus.