Lukas 3:1-38

  • Dimulai ma ulaon ni si Johannes (1, 2)

  • Si Johannes paboahon taringot tu pandidion (3-20)

  • Dididi Jesus (21, 22)

  • Tarombo ni Jesus Kristus (23-38)

3  Dung 15 taon Kesar Tiberius mamarenta, tingki Pontius Latus gubernur di Judea, si Herodes* mamarenta Galilea, si Pilippus hahana mamarenta di luat Iturea dohot di Trakonitis, si Lisanias mamarenta di Abilene,  jala si Hannas dohot si Kayapas gabe malim kepala, ro ma hata ni Debata tu si Johannes anak ni si Sakaria di padang pasir.*  Dung i, ro ma ibana tu sude luat di humaliang ni Sunge Jordan. Dibaritahon ibana ma, pandidion i do na patuduhon hamubaon asa disesa dosa ni nasida.  Songon na tarsurat di buku ni panurirang Jesaya, “Adong ma soara na jou-jou di padang pasir, ‘Parade hamu ma dalan ni Jahowa! Patigor hamu ma angka dalan sidalananna.  Ingkon gohan do nasa rura jala pahornopon do angka dolok dohot dolok-dolok. Ingkon patigoron do angka dalan na marbelok-belok jala ingkon dipados-dos do angka dalan na marbatu-batu.  Idaon ni sude jolma ma haluaon na sian Debata.’”  Dung i torop ma halak na ro mandapothon si Johannes asa dididi. Ninna ibana ma tu nasida, “Hamu pinompar ni ulok na marbisa, ise na mandok na boi hamu malua sian ari rimas na naeng ro?  Alani i, patudu ma sian parniulaonmuna naung muba hamu. Unang ma sai dok tu dirimuna, ‘Pinompar ni si Abraham do hami.’ Hudok ma tu hamu, angka batu on pe boi do bahenon ni Debata gabe pinompar ni si Abraham.  Sasintongna, nunga rade kampak di bona ni hau. Ganup hau na so denggan parbuena, tabaon ma i jala sampathonon tu api.” 10  Dung i disungkun natorop i ma ibana, “Antong, aha ma na ingkon ulahononnami?” 11  Dialusi ibana ma nasida, “Molo adong nampuna dua baju dilehon ma sada tu na so adong bajuna, laos songon i ma bahenon ni halak na adong sipanganonna.” 12  Gariada marroan do angka sijalo pajak* asa didihononna, ninna nasida ma tu ibana, “Guru, aha do na ingkon ulahononnami?” 13  Didok ibana ma, “Unang ma pangido* hamu lobi sian arga ni pajak naung ditontuhon.” 14  Dohot do angka tentara manungkun ibana, “Aha do na ingkon ulahononnami?” Dialusi ibana ma nasida, “Unang susai manang unang dok hamu na so tutu taringot tu manang ise pe, alai halashon hamu ma gajimuna.”* 15  Tingki i, torop do halak na paima-imahon Kristus jala sungkun-sungkun do roha ni nasida taringot tu si Johannes, “Ibana do nuaeng Kristus i?” 16  Gabe didok si Johannes ma tu nasida sude, “Aek do hudidihon tu hamu, alai umbalga do huaso ni na ro dungkon ahu. Haru mambungka tali ni sipatuna pe ndang tama ahu. Didihononna do tu hamu tondi parbadia dohot api. 17  Nunga ditiop ibana pamurpur jala paiasonna ma pardegean i. Papunguonna ma gandum* tu poti jala tutungonna ma durame tu api na so ra mintop.” 18  Godang dope angka poda didok si Johannes jala tongtong do dibaritahon barita na uli tu angka halak. 19  Alai dipinsang si Johannes ma si Herodes na mamarenta di Galilea. Ai dioli ibana do si Herodias tunggane boru ni hahana jala diulahon ibana do godang hajahaton. 20  Diulahon ibana do muse sada nai hajahaton, i ma dipenjarahon ibana si Johannes. 21  Tingki tardidi sude natorop i, dohot do Jesus tardidi. Di na martangiang ibana, bungka ma langit, 22  jala turun ma tu atasna tondi parbadia songon darapati. Dung i tarbege ma soara sian langit na mandok, “Ho do Anakku, haholonganki. Halomoan ni rohangku do ho.” 23  Hira-hira 30 taon ma umur ni Jesus tingki dipungka ibana ulaonna. Mangihuthon pandapot ni angka halak, ibana anak ni si Josep, anak ni si Heli, 24  anak ni si Mattat, anak ni si Lepi, anak ni si Malki, anak ni si Jannai, anak ni si Josep, 25  anak ni si Mattatias, anak ni si Amos, anak ni si Nahum, anak ni si Esli, anak ni si Naggai, 26  anak ni si Maat, anak ni si Mattatias, anak ni si Semein, anak ni si Josek, anak ni si Joda, 27  anak ni si Joanan, anak ni si Resa, anak ni si Serubabel, anak ni si Sealtiel, anak ni si Neri, 28  anak ni si Malki, anak ni si Addi, anak ni si Kosam, anak ni si Elmadam, anak ni si Er, 29  anak ni si Jesus, anak ni si Elieser, anak ni si Jorim, anak ni si Mattat, anak ni si Lepi, 30  anak ni si Simeon, anak ni si Judas, anak ni si Josep, anak ni si Jonam, anak ni si Eliakim, 31  anak ni si Melea, anak ni si Mina, anak ni si Mattata, anak ni si Natan, anak ni si Daud, 32  anak ni si Isai, anak ni si Obed, anak ni si Boas, anak ni si Salmon, anak ni si Nahason, 33  anak ni si Aminadab, anak ni si Arni, anak ni si Hesron, anak ni si Peres, anak ni si Juda, 34  anak ni si Jakkob, anak ni si Isak, anak ni si Abraham, anak ni si Tera, anak ni si Nahor, 35  anak ni si Serug, anak ni si Reu, anak ni si Peleg, anak ni si Heber, anak ni si Sela, 36  anak ni si Kenan, anak ni si Arpaksad, anak ni si Sem, anak ni si Noak, anak ni si Lamek, 37  anak ni si Metusalah, anak ni si Henok, anak ni si Jared, anak ni si Mahalaleel, anak ni si Kenan, 38  anak ni si Enos, anak ni si Set, anak ni si Adam, anak ni Debata.

Surat na di toru

Na nidokna dison i ma si Herodes Antipas. Ida di Kamus.
Manang “halongonan”.
Manang “sijalo beo”.
Manang “buat”.
Manang “upamuna”.
Suan-suanan songon eme na tubu di Israel jala jotjot dipangke mambahen roti.