Lukas 22:1-71

  • Angka malim marsangkap laho mambunu Jesus (1-6)

  • Paradehon tu Paska na parpudi (7-13)

  • Parenta taringot tu Borngin Parningotan Hamamate ni Kristus (14-20)

  • “Na manjehehon ahu, rap do dohot ahu di meja on” (21-23)

  • Parsoalan taringot tu ise na umsangap (24-27)

  • Parjanjian ni Jesus taringot tu harajaon (28-30)

  • Surirang taringot tu si Petrus na so mangakkui Jesus (31-34)

  • Mamboan na dihaporluhon, dua podang (35-38)

  • Jesus martangiang di Dolok Jetun (39-46)

  • Jesus ditangkup (47-53)

  • Ndang diakkui si Petrus Jesus (54-62)

  • Direhe-rehei Jesus (63-65)

  • Diadili di jolo ni Sanhedrin (66-71)

22  Nunga jonok Perayaan Roti na So Marragi na digoari Paska.  Dilului angka malim kepala* dohot angka siboto surat ma dalan laho manangkup Jesus, ai mabiar do nasida tu angka halak.  Dung i dirajai Sibolis ma roha ni si Judas na digoari Iskariot, sahalak sian apostel na 12 i.  Didapothon ibana ma angka malim kepala* dohot angka kepala ni bagas joro laho mangkatai manang na songon dia pasahathon Jesus tu nasida.  Las ma roha ni nasida mambege i, jala dos ma roha ni nasida laho mangalehon hepeng perak tu ibana.  Dioloi si Judas ma i jala mulai sian i dilului ibana ma tingki na denggan laho manjehehon Jesus tu nasida sian na so pamotoan ni natorop i.  Jumpang ma ari Perayaan Roti Na So Marragi, ingkon dipelehon do pelean Paska di tingki i.  Disuru Jesus ma si Petrus dohot si Johannes, ninna ma, “Laho ma hamu jala parade hamu ma sipanganon Paska tu hita.”  Disungkun nasida ma ibana, “Didia do dipangido roham i paradeonnami?” 10  Didok Jesus ma tu nasida, “Tingki masuk hamu tu kota, jumpangmuna ma disi sahalak baoa na mamboan gunsi inganan ni aek. Ihuthon ma ibana tu jabu na dia pe ibana masuk. 11  Dung i dok ma tu nampuna jabu i, ‘Didok Guru i, “Dia do kamar inganan di ahu asa mangan Paska ahu rap dohot siseanku?”’ 12  Patuduhononna ma tu hamu kamar parginjang na bidang naung diatur laho pangkeonta. Disi ma parade hamu.” 13  Laho ma nasida jala dapot ni nasida do songon na nidok ni Jesus. Dung i, diparade nasida ma na porlu tu Paska. 14  Dung dapot tingkina, rap mangan ma Jesus dohot angka apostelna. 15  Dung i didok ibana ma tu nasida, “Nunga maima-ima rohangku laho mangan Paska rap dohot hamu andorang so marsitaonon ahu. 16  Ai hudok ma tu hamu, ndang na panganonku be i sahat tu na saut sudena i di Harajaon ni Debata.” 17  Dung dijalo ibana panginuman i, didok ma mauliate tu Debata jala ninna ma, “Buat ma on jala ganup ma hamu manginum sian on. 18  Ai hudok ma tu hamu, sian saonari ndang inumonku be anggur sahat tu na ro Harajaon ni Debata.” 19  Dung i dibuat Jesus ma roti, didok ma mauliate tu Debata, diponggoli ma i jala diparlehon tu nasida. Ninna ma, “On manggombarhon dagingku, na nilehon humongkop hamu. Tongtong ma ulahon on bahen parningotan di ahu.” 20  Songon i ma muse dibahen ibana tu panginuman i. Dung sae nasida mangan, ninna ma, “Panginuman on, i ma parjanjian na imbaru na hot marhite mudarhu na durus humongkop hamu. 21  “Alai na manjehehon ahu, rap do dohot ahu di meja on. 22  Tutu, laho mate do nian Anak ni jolma i songon naung ditontuhon, alai nang pe songon i marjea ma halak na manjehehon ibana!” 23  Dung i masisungkunan ma nasida, manang ise do sian nasida na mangulahon i. 24  Alai, tubu ma parsoalan di tonga-tonga ni nasida taringot tu manang ise na umsangap. 25  Gabe didok Jesus ma tu nasida, “Raja ni angka bangso mamarenta do tu rayatna jala manang ise na mangarajai, ditanda do nasida sibahen na denggan tu na asing. 26  Alai unang ma songon i anggo hamu. Manang ise na umbalga di tonga-tongamuna naeng ma gabe songon na umposo, jala manang ise na naeng manguluhon di tonga-tongamuna, naeng ma gabe songon parhobas. 27  Dia do na umbalga, halak na mangan do manang na marhobas? Nda na mangan i do? Alai songon sahalak parhobas do ahu di tonga-tongamuna. 28  “Hamu do na sai tongtong rap dohot ahu tingki tarunjun ahu. 29  Dung i, bahenonku ma parjanjian rap dohot hamu taringot tu harajaon songon parjanjian na binahen ni Damang tu ahu. 30  Asa boi hamu mangan dohot minum di mejangku di Harajaonki jala hundul di habangsa laho manguhumi halak Israel na 12 marga i. 31  “Simon, Simon, ida ma! Dipangido Sibolis i do asa dipiari hamu songon gandum. 32  Alai, nunga hubahen pangidoanku tu Debata taringot tu ho asa unang mago haporseaonmu. Dung mulak ho, patogu ma angka haha anggim.” 33  Dung i didok si Petrus ma tu Jesus, “Tuan, rade do ahu dipenjara jala mate rap dohot ho.” 34  Alai ninna Jesus ma, “Hudok ma tu ho Petrus, ndang martahuak dope manuk sadari on nunga tolu hali dohononmu na so ditanda ho ahu.” 35  Didok Jesus ma muse tu nasida, “Tingki husuru hamu laho so pola mamboan inganan ni hepeng, inganan ni sipanganon dohot sipatu, hurangan do hamu?” Dialusi nasida ma, “Ndang!” 36  Dung i didok ibana ma tu nasida, “Alai saonari, manang ise nampuna inganan ni hepeng manang inganan ni sipanganon, diboan ma. Manang ise na so adong podangna, digadis ma baju luarna laho manuhor podang. 37  Hudok ma tu hamu ingkon saut do na tarsurat taringot tu ahu na mandok, ‘Dietong do ibana parjahat.’ Ai na tarsurat taringot tu ahu, masa do i nuaeng.” 38  Dung i didok nasida ma, “Tuan, adong do dison dua podang.” Didok Jesus ma tu nasida, “Antong nunga sae be i.” 39  Dung i kaluar ma Jesus sian i. Songon na somal, laho ma ibana tu Dolok Jetun jala dohot do angka siseanna mangihuthon ibana. 40  Dung sahat disi didok Jesus ma tu nasida, “Tongtong ma hamu martangiang asa unang tarela-ela hamu mangulahon dosa.” 41  Dung i, laho ma ibana pulik sian nasida hira-hira tuk dangguron batu daona. Marsinggang ma ibana jala martangiang. 42  Ninna ma, “Amang, molo olo Ho, salpuhon ma panginuman on sian ahu. Alai unang ma lomo ni rohangku, lomo ni roham ma na saut.” 43  Dung i, ro ma sada suru-suruan sian banua ginjang jala dipatogu ma ibana. 44  Alai marsak situtu do ibana. Alani i, lam gomos ma ibana martangiang, pola songon mudar hodokna manetek tu tano. 45  Dung sae ibana martangiang, didapothon ma angka sisean i. Alai tarpodom do nasida didapot, ai loja do nasida alani arsak ni roha nasida. 46  Didok Jesus ma tu nasida, “Boasa modom hamu? Dungo ma hamu jala tongtong ma martangiang, asa unang tarela-ela hamu mangulahon dosa.” 47  Tingki mangkatai dope Jesus, ro ma sapunguan halak. Si Judas sahalak sian 12 apostel i do na mamimpin nasida. Didapothon ma Jesus jala diumma. 48  Alai ninna Jesus ma tu ibana, “Umma-umma do hape dibahen ho manjehehon Anak ni jolma i Judas?” 49  Tingki diboto na di lambung ni Jesus aha na laho masa, didok nasida ma, “Tuan, hualo hami ma nasida dohot podang on?” 50  Adong ma sahalak sian nasida mangaroro hatoban ni sintua ni malim jala ditallik ma pinggol siamunna. 51  Alai didok Jesus ma, “Sae ma i!” Dijama Jesus ma pinggolna i jala dipamalum ma ibana. 52  Dung i didok Jesus ma tu angka malim kepala,* tu angka kepala ni bagas joro dohot tu angka pangituai na laho manangkup ibana, “Na dirimpu hamu do ahu pangarampok umbahen diboan hamu podang dohot antuk-antuk laho manangkup ahu? 53  Ganup ari do ahu rap dohot hamu di bagas joro, ndang ditangkup hamu ahu. Alai on ma tingkina di hamu jala on ma huaso ni haholomon i.” 54  Dung i, ditangkup nasida ma Jesus jala diboan ma ibana tu jabu ni sintua ni malim. Alai diihuthon si Petrus do ibana sian na dao. 55  Di tonga-tonga ni alaman i dipagalak do api jala hundul ma angka halak disi. Hundul do nang si Petrus rap dohot nasida. 56  Alai, diida sahalak hatoban borua ma si Petrus hundul jonok tu api i. Dipanotnoti ma ibana jala ninna ma, “Dohot do baoa on raphon ibana.” 57  Alai margabus do si Petrus, ninna ma, “Ndang hutanda ibana.” 58  Ndang sadia leleng, diida na asing ma ibana jala ninna ma, “Ho pe, dohot do ho sahalak sian nasida.” Alai ninna si Petrus ma, “Ndang ahu i.” 59  Dung hira-hira sajom, ro ma halak na asing jala tangkas ma didok, “Toho, dohot do baoa on raphon ibana, ai halak Galilea do baoa on!” 60  Alai didok si Petrus ma, “Ndang huantusi manang aha na nidokmi.” Tingki na mangkatai i dope ibana, pintor martahuak ma manuk. 61  Diida Tuan i ma dompak si Petrus. Diingot si Petrus ma hata ni Tuan na mandok, “Andorang so martahuak dope manuk sadari on nunga tolu hali dohononmu na so ditanda ho ahu.” 62  Dung i laho ma ibana tu luar jala tumatangis situtu. 63  Alai direhe-rehei jala dipungkuli angka panjaga i ma Jesus. 64  Ditutup nasida ma bohina jala sai didok nasida ma, “Molo panurirang do ho, paboa ma tu hami ise na mamungkul ho!” 65  Jala godang dope angka na asing didok nasida mangaleai ibana. 66  Dung torang ari, marpungu ma angka pangituai ni bangso i, angka malim kepala,* dohot angka siboto surat. Diboan nasida ma Jesus tu inganan ni Sanhedrin* jala ninna ma, 67  “Molo na tutu do ho Kristus, paboa ma tu hami.” Alai ninna Jesus ma tu nasida, “Nang pe hupaboa tu hamu, tong do ndang porsea hamu. 68  Jala molo husungkun pe hamu, ndang na alusanmuna ahu. 69  Alai mulai sian tingki on, hundul ma Anak ni jolma i di siamun ni Debata na marhuaso i.” 70  Dung i sude ma nasida manungkun, “Antong, Anak ni Debata do ho?” Didok Jesus ma tu nasida, “Tutu, songon na nidokmuna i ma.” 71  Didok nasida ma, “Boasa pola luluanta be angka saksi? Ai nunga tabege sian pamanganna sandiri.”

Surat na di toru

Ida di Kamus.
Ida di Kamus.
Ida di Kamus.
Ida di Kamus.
Ida di Kamus.