Lukas 1:1-80

  • Tu si Teofilus (1-4)

  • Dipaboa suru-suruan Gabriel hatutubu ni si Johannes Pandidi (5-25)

  • Dipaboa suru-suruan Gabriel hatutubu ni Jesus (26-38)

  • Si Maria manjumpangi si Elisabet (39-45)

  • Dipuji si Maria do Jahowa (46-56)

  • Hatutubu ni si Johannes jala mambahen goarna (57-66)

  • Si Sakaria manurirangi (67-80)

1  Torop do halak na marsitutu papunguhon jala na manurathon hatorangan taringot tu angka na masa hombar tu na tahaporseai,  songon naung sinurathon ni angka na mamereng di mulana i dohot angka na mamaritahon* barita i tu hita.  Alani i, dung manat hutangkasi saluhutna sian mulana, jojor ma sude husurathon tu ho Teopilus, na pinarsangapan.  Asa tangkas botoonmu na sintong do angka na niajarhon i tu ho.  Tingki si Herodes* gabe raja di Judea, adong ma sahalak malim na margoar si Sakaria sian punguan Abia. Sian pinompar ni si Aron* do tunggane boruna, goarna si Elisabet.  Halak na mangulahon na sintong do nasida na dua di adopan ni Debata jala ndang adong siinsakan di nasida, ai diihuthon do sude parenta dohot uhum ni Jahowa.  Alai ndang mardakdanak nasida, ai mandul* do si Elisabet jala nunga matua nasida na dua.  Dung dapot tingki ni punguan ni si Sakaria marhobas di adopan ni Debata, mangulahon ulaon hamalimon ma si Sakaria.  Mangihuthon hasomalan di hamalimon, ibana ma na tarpillit masuk tu bagas joro ni Jahowa laho mamelehon daupa. 10  Torop do halak di luar martangiang tingki dipelehon daupa i. 11  Diida ibana ma suru-suruan ni Jahowa jongjong di siamun ni langgatan pardaupaan i. 12  Tarsonggot ma si Sakaria mangida i gabe mansai mabiar ma ibana. 13  Alai ninna suru-suruan i ma tu ibana, “Unang ho mabiar Sakaria, ai nunga ditangihon pangidoanmi. Tubuhonon ni si Elisabet tunggane borumi ma sada anak di ho, jala bahen ma goarna si Johannes. 14  Marlas ni roha ma ho jala marolop-olop. Jala torop dope halak na marlas ni roha alani hatutubuna. 15  Gabe sangap ma ibana di adopan ni Jahowa. Alani i, ndang boi inumonna anggur manang sude siinumon na maralkohol. Ai nunga digohi tondi parbadia ibana andorang so tubu dope.* 16  Bahenonna ma torop halak Israel mulak tu Jahowa, Debata ni nasida. 17  Mardalan ma ibana di jolo ni Debata di bagasan las ni roha dohot huaso ni si Elia, laho paubahon roha ni angka ama gabe songon roha ni angka dakdanak. Dung i, bahenonna ma halak na so mangoloi mandapot bisuk ni halak na sintong asa gabe bangso na rade di Jahowa.” 18  Didok si Sakaria ma tu suru-suruan i, “Sian dia ma botoonku na tutu i? Ai nunga matua ahu, songon i do nang tunggane borungku.” 19  Dialusi suru-suruan i ma ibana, “Si Gabariel do ahu, na jongjong di jolo ni Debata. Disuru do ahu laho paboahon barita na uli on tu ho. 20  Alai ndang porsea ho na laho masa hatangki hombar tu tingki naung ditontuhon. Alani i gabe ngungu* ma ho, ndang boi be ho mangkatai sahat tu na masa i.” 21  Alai, nunga sai dipaima-ima natorop i si Sakaria jala longang do nasida ala leleng hian ibana di bagas joro i. 22  Dung kaluar ibana, ndang boi be ibana mangkatai tu natorop i. Gabe diboto nasida ma naung mandapot parnidaan ibana di bagas joro i. Ala ndang boi ibana mangkatai, dibahen ibana ma tanda marhite tanganna laho mangkatai tu nasida. 23  Dung sae tingki pangkobasionna i, mulak ma ibana tu jabuna. 24  Alai ndang sadia leleng, mardenggan daging* ma si Elisabet tunggane boruna, jala saleleng lima bulan ndang hea ibana kaluar sian jabu, ai ninna do, 25  “On ma na binahen ni Jahowa tu ahu saonari. Diparrohahon ibana do ahu asa unang marlea di adopan ni jolma.” 26  Dung onom bulan ibana mardenggan daging, disuru Debata ma suru-suruan Gabariel tu Nasaret sada kota di Galilea, 27  mandapothon sahalak namarbaju na margoar si Maria, naung marjanji laho marhasohotan tu si Josep sahalak baoa sian pinompar ni si Daud. 28  Dung jumpang, didok suru-suruan i ma tu ibana, “Horas ma di ho na hinaholongan, didongani Jahowa ma ho.” 29  Tarsonggot ma ibana mambege hata i, gabe sungkun-sungkun ma rohana aha do lapatan ni tabi i. 30  Ninna suru-suruan i ma tu ibana, “Unang ho mabiar Maria, ai dihaholongi Debata do ho. 31  Ida ma! Gabe-gabean* ma ho jala tubuhononmu ma anak, bahen ma goarna Jesus. 32  Gabe sangap ma ibana, goaron ma ibana Anak ni Natumimbul i, jala lehonon ni Debata Jahowa ma tu ibana habangsa ni si Daud amana i. 33  Mamarenta ma ibana gabe Raja tu pinompar ni si Jakkob salelengna jala ndang na laho marujung Harajaonna i.” 34  Alai ninna si Maria ma tu suru-suruan i, “Songon dia ma i boi masa? Ai namarbaju dope ahu.” 35  Dialusi suru-suruan i ma ibana, “Songgopan ni tondi parbadia ma ho jala huaso ni Debata ma na mangalinggomi ho. Alani i ma, badia do dohonon na laho tubu i, Anak ni Debata. 36  Si Elisabet sisolhotmi pe, nunga onom bulan ibana gabe-gabean nang pe naung matua, jala didok do ibana borua na mandul.* 37  Ai ndang adong na so tarpatupa ni Debata.” 38  Ninna si Maria ma, “Naposo ni Jahowa do ahu! Sai saut ma tu ahu songon na nidokmi.” Dung i, ditadingkon suru-suruan i ma ibana. 39  Dung salpu angka ari i, hatop ma si Maria borhat tu sada kota di Juda, huta na adong di dolok-dolok. 40  Masuk ma ibana tu jabu ni si Sakaria, jala didok ibana ma hata horas-horas tu si Elisabet. 41  Tingki dibege si Elisabet hata horas-horas ni si Maria i, manggunjal ma poso-poso na di bortianna* i, gabe digohi tondi parbadia ma si Elisabet. 42  Gabe gogo ma dijouhon ibana, “Dapotan pasu-pasu ma ho di tonga-tonga ni angka borua jala tarpasu-pasu ma poso-poso na di bortianmi! 43  Hasangapon do di ahu, ro ina ni Tuanku mandapothon ahu! 44  Ai holan hubege tabimi, manggunjal do poso-poso na di bortianku alani las ni rohana. 45  Marlas ni roha ma ho ala porsea. Ai na laho saut do sude na nidok ni Jahowa tu ho.” 46  Didok si Maria ma, “Pujionku do Jahowa, 47  marganda do las ni rohangku alani Debata, Sipalua ahu. 48  Ai ditatap Ibana do ahu naposona na lea on. Sian saonari, dohonon ni sude sundut ma ahu na marlas ni roha. 49  Ai dibahen Debata na marhuaso i do angka ulaon na balga di ahu jala badia do goarna. 50  Ai marsundut-sundut do asi ni rohana tu angka halak na mangkabiari Ibana. 51  Marhite tanganna na gogo i dipanserakkon Ibana do angka siginjang roha. 52  Dipatutoru Ibana do halak na marhuaso sian habangsana, alai dipatimbo do angka na lea. 53  Dipabosur do halak na male marhite angka na denggan, dipalao do halak na mora ndang adong diboan manang aha. 54  Ai ro do Ibana mangurupi naposona halak Israel, patuduhon diingot Ibana do janjina. 55  Marjanji do Ibana laho patuduhon asi ni rohana tu si Abraham dohot tu angka pinomparna salelengna songon na nidokna tu angka ompunta.” 56  Laos tading do si Maria rap dohot si Elisabet hira-hira tolu bulan. Dung i mulak ma ibana tu jabuna. 57  Dung dapot tingki ni si Elisabet tubu-tubuan,* ditubuhon ibana ma sada anak. 58  Dibege angka hombar jabu dohot angka sisolhotna ma asi ni roha na pinatudu ni Jahowa tu ibana, gabe marlas ni roha ma nasida rap dohot ibana. 59  Di ari paualuhon, ro ma nasida laho pasunathon poso-poso i jala naeng dibahen nasida ma goarna si Sakaria mangihuthon goar ni amana. 60  Alai didok inana ma, “Ndang i! Si Johannes do bahenon goarna.” 61  Gabe didok nasida ma tu si Elisabet, “Alai so adong sisolhotmu na margoar sisongon i.” 62  Dung i dibahen nasida ma tanda marhite tangan ni nasida laho manungkun tu amana, ise dipangido rohana bahenon goarna. 63  Dung i, dipangido si Sakaria ma sada papan jala disurathon ma, “Si Johannes do goarna.” Gabe longang ma nasida sude. 64  Laos satongkin i, boi ma muse si Sakaria mangkatai.* Dung i dipuji ibana ma Debata. 65  Longang ma sude angka hombar jabuna, gabe sude ma halak na di luat Judea na adong di dolok-dolok mamboto na masa i. 66  Sude halak na mambege i sai mamingkiri jala sungkun-sungkun di bagasan rohana, ninna ma, “Na gabe songon dia do annon dakdanak on?” Ai tangkas do didongani Jahowa ibana. 67  Gok tondi parbadia ma si Sakaria, amangna i jala manurirangi ma ibana ninna ma, 68  “Pinuji ma Jahowa, Debata ni Israel. Ai nunga diparrohahon Ibana bangsona jala dipalua Ibana nasida. 69  Dilehon Ibana do tu hita sipalua na marhuaso* na sian pinompar* ni si Daud, naposona, 70  songon na nidokna marhite pamangan ni angka panurirangna na badia di tingki naung salpu. 71  Na paluaonna do hita sian angka musunta dohot sian tangan ni angka halak na mangkasogohon hita. 72  Dipatuduhon do asi ni rohana songon na nidokna tu angka ompunta jala diingot Ibana do parjanjianna na badia i, 73  songon sumpana tu ompunta si Abraham. 74  Dung dipalua Debata hita sian tangan ni angka musu, lehononna ma tu hita hasangapon asa unang adong biar ni roha marhobas tu Ibana, 75  alai asa marsihohot jala mangulahon na sintong di adopanna saleleng ni ngolunta. 76  Alai anggo ho anakku, goaron ma ho panurirang ni Natumimbul i. Ai mardalan ma ho di jolo ni Jahowa laho paradehon angka dalanna. 77  Lehononmu ma pangantusion tu bangsona taringot tu haluaon marhite manesa dosa ni nasida, 78  ala denggan basa ni Debata tu hita. Marhite denggan ni basana i, bahenonna ma binsar sinondang sian surgo tu hita. 79  Gabe disondangi ma angka halak na hundul di haholomon dohot na nilinggoman ni hamatean, jala ditogu-togu ma hita di dalan hadameon.” 80  Lam magodang ma dakdanak i jala lam matoras. Di padang pasir do ibana maringanan paima dapot tingkina patuduhononna dirina tu halak Israel.

Surat na di toru

As. “angka parhobas”.
Ida di Kamus.
As. “Sian angka boru ni si Aron”.
Manang “hol”.
Manang “tingki di bortian dope”.
Manang “bisu”.
Manang “hamil”.
Manang “hamil”.
Manang “hol”.
Manang “rahimna”.
Manang “partus”.
Manang “bungka ma pamanganna dohot rahut ni dilana”.
As. “tanduk haluaon”. Ida hata “Tanduk” di Kamus.
As. “bagas”.