Kolosse 3:1-25

  • Pangalaho na leleng dohot pangalaho na imbaru (1-17)

    • Pasiding angka pangalaho ni portibi on (5)

    • Holong do na mambahen jolma marsada (14)

  • Poda tu angka keluarga (18-25)

3  Molo nunga dipahehe hamu rap dohot Kristus, sai angka na di surgo i ma lului hamu. Ai disi do Kristus hundul, di siamun ni Debata.  Sai tu angka na di surgo i ma parrohahon hamu, unang angka na di tano on.  Ai nunga mate hamu, jala di tangan ni Kristus i do ngolumuna hombar tu lomo ni roha ni Debata.  Tingki dipapatar Kristus na mangalehon hangoluan,* papataronna ma hamu rap dohot ibana di bagasan hasangaponna.  Pasiding hamu ma sian dirimuna angka pangalaho ni portibi on, i ma seks na so patut, angka ulaon na ramun,* giot-giot ni daging* na so boi dirajai, roha na jahat, dohot hahisapon. Ai dos songon na manomba gana-ganaan do i.  Ai alani angka pangalaho sisongon on do ro rimas ni Debata.  Songon i do pangalahomuna najolo.  Alai saonari, pasiding hamu ma rimas, muruk, hajahaton, hata na mangaleai, dohot angka hata na so hasea sian pamanganmuna.  Unang ma masigabusan. Tanggalhon hamu pangalaho na leleng dohot angka na niulahonmuna najolo. 10  Jala pangke hamu ma pangalaho na imbaru na nilehon ni Debata dung ditanda hamu Ibana. Dung i, dipaimbaru ma pangalahomuna asa songon pangalaho ni Debata. 11  Molo nunga dipaimbaru pangalahomuna, ndang marimbar be di hamu halak Junani manang halak Jahudi, na marsunat manang na so marsunat, halak na ro, parhuta-huta,* hatoban, manang halak na merdeka. Alai Kristus i do saluhutna jala marsada ma hita sude di bagasan ibana. 12  Angka na pinillit ni Debata do hamu, na badia jala na dihaholongi. Alani i, patuduhon hamu ma holong ni roha, haburjuon, toruk ni roha, lambok ni roha, jala sabar. 13  Tongtong ma hamu sabar tu na asing, jala rade ma hamu manalpuhon hasalaan ni nasida nang pe dibahen hansit rohamuna. Songon Jahowa na rade manalpuhon hasalaanmuna, songon i ma ulahon hamu. 14  Asing ni i sude, patuduhon hamu ma holong. Ai holong ni roha do na boi mambahen jolma marsada. 15  Dame na sian Kristus i ma na mangarajai rohamuna. Ai nunga dijou Debata hamu asa gabe sada daging jala mardame. Jala tongtong ma hamu mandok mauliate. 16  Anggiat ma ajaran ni Kristus manggohi rohamuna, asa gabe marbisuk hamu. Masiajaran ma hamu jala masipatoguan marhite mangendehon psalmen, mamuji Debata dohot mangendehon ende puji-pujian. Endehon hamu ma puji-pujian tu Jahowa sian bagasan rohamuna. 17  Manang aha na dihatahon hamu jala na diulahon hamu, ulahon ma sudena i di bagasan goar ni Tuan Jesus. Jala mandok mauliate ma hamu tu Debata Ama i marhite ibana. 18  Hamu angka tunggane boru, oloi hamu ma tunggane dolimuna songon mangoloi tu Tuan. 19  Hamu angka tunggane doli haholongi hamu ma tunggane borumuna, jala unang ma kasar* tu nasida. 20  Hamu angka dakdanak, oloi hamu ma natua-tuamuna, ai i do na dihalomohon Debata. 21  Hamu angka ama, unang ma bahen jut roha ni ianakhonmuna, asa unang gabe marmetmet ni roha* nasida. 22  Hamu angka hatoban, oloi hamu ma tuanmuna na di tano on. Ndang holan tingki adong na mangida asa pasonangkon roha ni jolma, alai sian nasa roha ma mardongan biar mida Jahowa. 23  Manang aha pe diulahon hamu, ulahon ma i sian nasa roha songon tu Jahowa, ndang tu jolma. 24  Ai diboto hamu do, hamu sude mandapot upa sian Jahowa. Gabe hatoban ni Tuanta ma hamu, i ma Kristus i. 25  Uhumonna do halak na marsala hombar tu parniulaonna, ai ndang dipaimbar-imbar Debata manang ise pe.

Surat na di toru

As. “ngolunta”.
Ida di Kamus.
Manang “nafsu”.
Manang “halak Skit”.
Manang “tarrimas”.
Manang “mandele”.