Johannes 7:1-52

  • Jesus di Perayaan Tabernakel (1-13)

  • Jesus mangajari di perayaan i (14-24)

  • Marragam pandapot taringot tu Kristus (25-52)

7  Dung salpu i, didalani Jesus ma sude luat Galilea. Ai ndang olo ibana mandalani luat Judea ala naeng bunuon ni halak Jahudi do ibana.  Alai nunga jonok Perayaan Tabernakel* ni halak Jahudi.  Dung i didok angka anggi ni Jesus ma tu ibana, “Borhat ma ho sian on, laho ma ho tu Judea, asa diida angka siseanmi angka na naeng bahenonmu.  Ai ndang adong halak na mambahen ulaonna di na buni, molo naeng tarbarita ibana. Ala nunga diulahon ho angka i, patudu ma dirim tu portibi on.”  Sasintongna, ndang porsea angka anggina i tu ibana.  Ninna Jesus ma tu nasida: “Ndang jumpang dope tingkingku, alai anggo hamu, tongtong do adong tingkimuna.  Ndang adong na mambahen portibi on mangkasogohon hamu. Alai dihasogohon do anggo ahu, ala hupaboa do pambahenan ni nasida na jahat i.  Laho ma hamu tu perayaan i. Alai anggo ahu ndang laho dope tusi, ai ndang jumpang dope tingkingku.”  Dung didok ibana songon i tu nasida, tongtong dope ibana di Galilea. 10  Dung laho angka anggina tu perayaan i, borhat ma nang Jesus alai martabuni-tabuni do ibana laho. 11  Dilului halak Jahudi ma ibana di perayaan i jala disungkun nasida ma, “Didia do ibana?” 12  Godang do muse halak na marhusipi taringot tu ibana di tonga-tonga ni natorop i. Adong na mandok, “Halak na burju do ibana.” Na deba nai mandok, “Daong, dililuhon ibana do torop halak.” 13  Alai ndang adong nanggo sahalak pe na barani mangkatahon taringot tu ibana di jolo ni natorop, ai mabiar do nasida tu halak Jahudi. 14  Dung satonga dalan perayaan i, masuk ma Jesus tu bagas joro laho mangajari. 15  Gabe longang ma halak Jahudi jala ninna ma, “Sian dia do godang ni parbinotoan ni halak on taringot tu Surat na Badia, hape so hea ibana marsiajar di singkola agama?”* 16  Dialusi Jesus ma nasida, “Ndang sian ahu na huajarhon i, alai sian na marsuru ahu i do i. 17  Manang ise na olo mangulahon lomo ni roha ni Debata, botoonna do manang na sian Debata na huajarhon i manang na sian diringku sandiri. 18  Manang ise na mangkatai sian dirina sandiri, na mangalului hasangapon tu dirina sandiri do ibana. Alai manang ise na mangalului hasangapon tu na marsuru ibana, halak na sintong do ibana jala ndang adong gabus di ibana. 19  Nda dilehon si Musa do Patik i tu hamu? Alai ndang adong sian hamu na mangoloi Patik i. Boasa naeng bunuonmuna ahu?” 20  Dialusi natorop i ma, “Na sinonggopan ni suru-suruan na jahat do ho. Ise ma naeng mambunu ho?” 21  Didok Jesus ma tu nasida, “Holan sada dope tanda halongangan* hubahen nunga longang hamu sude. 22  Pingkirhon hamu ma on: Dilehon si Musa do tu hamu patik taringot tu sunat. Alani i, disunat hamu do halak di ari Sabbat. Hape ndang sian si Musa patik i, sian angka ompuna do. 23  Molo boi do disunat baoa di ari Sabbat asa unang dilanggar Patik ni si Musa, boasa ma gabe muruk hamu ala hupamalum na marsahit di ari Sabbat? 24  Unang ma uhumi hamu halak mangihuthon na tarida, alai tigor ma hamu manguhumi.” 25  Dung i adong ma deba penduduk ni Jerusalem na mandok, “Nda halak on do na naeng bunuon ni nasida i? 26  Alai ida ma! Mangkatai do ibana di jolo ni natorop jala ndang adong didok nasida manang aha tu ibana. Atik naung tangkas do diboto nasida na ibana do Kristus i? 27  Alai tahe, taboto do sian dia harorona. Hape molo ro Kristus i, ndang adong na mamboto sian dia harorona.” 28  Tingki na mangajari i Jesus di bagas joro, gogo ma didok ibana, “Ditanda hamu do ahu jala diboto hamu do sian dia ahu ro. Ahu ro ndang mangihuthon sangkaphu sandiri, jala na marsuru ahu i, tutu do Ibana adong alai ndang ditanda hamu Ibana. 29  Alai hutanda do Ibana, ai sian Ibana do ahu ro jala Ibana do marsuru ahu.” 30  Dung i dilului nasida ma dalan laho manangkup ibana, alai ndang boi nasida manangkup ibana ai ndang jumpang dope tingkina. 31  Nang pe songon i, godang do sian natorop i na porsea tu ibana jala didok nasida ma, “Molo ro Kristus i godang do bahenonna tanda halongangan.* Nda i do nuaeng na binahenna on?” 32  Dibege halak Parise do natorop i marhusipi taringot tu Jesus. Gabe disuru angka malim kepala* dohot halak Parise ma angka petugas manangkup Jesus. 33  Dung i didok Jesus ma, “Satongkin nai nama ahu rap dohot hamu, dung i laho ma ahu mandapothon Ibana na marsuru ahu. 34  Luluanmuna ma ahu, alai ndang jumpangmuna ahu, jala ndang boi hamu ro tu inganan sitopotonki.” 35  Didok halak Jahudi i ma sama nasida, “Naeng tudia do ibana laho umbahen na so boi jumpangta ibana? Na naeng laho do ibana mandapothon halak Jahudi na maringanan di tonga-tonga ni halak Junani? Jala na naeng ajaranna do halak Junani? 36  Aha do lapatan ni hata na nidokna i, ‘Luluanmuna ma ahu, alai ndang jumpangmuna ahu, jala ndang boi hamu ro tu inganan sitopotonki’?” 37  Di ari na parpudi, i ma ari na umbalga sian perayaan i, jongjong ma Jesus jala gogo ma didok, “Manang ise na mauas, ro ma ibana minum tu ahu. 38  Manang ise na porsea tu ahu, masa ma songon na nidok ni na tarsurat i, ‘Kaluar ma aek hangoluan marbuhal-buhal sian rohana.’” 39  Sasintongna taringot tu tondi parbadia do na nidok ni Jesus, i ma na laho jaloon ni halak na porsea tu ibana. Di tingki i, ndang dijalo nasida dope tondi parbadia ala ndang dilehon dope hasangapon i tu Jesus. 40  Deba sian natorop i na mambege hatana i mandok, “Tutu ma ibana Panurirang na naeng ro i.” 41  Na deba nai mandok, “Ibana do Kristus i.” Alai na deba nai mandok, “Ai ndang sian Galilea haroroan ni Kristus. 42  Nda didok na tarsurat i do molo Kristus i ro sian pinompar ni si Daud jala ro sian Betlehem huta ni si Daud?” 43  Gabe tubu ma parsoalan di tonga-tonga ni natorop i alani ibana. 44  Adong ma deba sian nasida na naeng manangkup ibana, alai ndang boi. 45  Dung i mulak ma angka petugas i, jala disungkun angka malim kepala* dohot halak Parise i ma nasida, “Boasa ndang diboan hamu ibana tuson?” 46  Dialusi angka petugas i ma, “Ndang hea dope adong halak na boi mangkatai songon i.” 47  Dung i didok halak Parise i ma tu nasida: “Na dohot do hamu dililuhon? 48  Ai adong diboto hamu sahalak pe sian angka pamimpin manang sian halak Parise na porsea tu ibana? 49  Alai natorop on, na so mananda Patik i, diburai Debata do nasida.” 50  Si Nikodemus, sahalak Parise na hea ro mandapothon Jesus, mandok tu nasida, 51  “Mangihuthon Patik, boi do uhumon sasahalak andorang so binege hatoranganna jala andorang so binoto manang na aha na binahenna?” 52  Dialusi nasida ma, “Ai dohot do ho halak Galilea? Pareso ma jolo di Surat na Badia i manang na adong do panurirang na ro sian Galilea.”*

Surat na di toru

Manang “Perayaan Parlape-lapean”. Ida di Kamus.
Na nidokna dison i ma singkola ni angka guru.
Manang “mukjizat”.
Manang “mukjizat”.
Ida di Kamus.
Ida di Kamus.
Deba sian manuskrip naung leleng na boi dihaporseai pamagohon ayat 53 sahat tu bindu ualu ayat 11.