Johannes 6:1-71

  • Dilehon Jesus mangan 5.000 baoa (1-15)

  • Jesus mardalan di ginjang ni aek (16-21)

  • Jesus do “roti hangoluan” (22-59)

  • Godang na tartuktuk alani hata ni Jesus (60-71)

6  Dung salpu i, laho ma Jesus tu bariba ni Laut Galilea manang Tiberias.  Torop do halak na sai mangihuthon ibana, ala nunga diida nasida dipamalum ibana na marsahit marhite tanda halongangan.*  Dung i, nangkok ma Jesus tu dolok jala hundul ma ibana disi rap dohot angka siseanna.  Di tingki i nunga jonok Perayaan Paska ni halak Jahudi.  Dung diida Jesus torop halak na ro mandapothon ibana, disungkun ibana ma tu si Pilippus, “Didia do tuhoronta roti laho allangon ni natorop on?”  Alai didok Jesus pe songon i laho manguji si Pilippus do, ai nunga diboto Jesus hian na laho sibahenonna.  Dialusi si Pilippus ma, “Tatuhor pe roti saarga 200 dinar,* ndang sae i nang pe sasaotik be nasida.”  Sahalak sian sisean na margoar si Andreas, dongan saama ni si Simon Petrus mandok tu ibana,  “Adong do sahalak dakdanak baoa dison, na mamboan lima roti barli dohot dua dengke na gelleng. Alai dia ma sae i tu jolma natorop on?” 10  Didok Jesus ma, “Suru ma nasida hundul.” Bidang do duhut-duhut disi jala hundul ma nasida. Adong do sian nasida hira-hira 5.000 halak baoa. 11  Dibuat Jesus ma roti i, didok ma mauliate tu Debata, dipambagihon ma tu angka na hundul i, songon i do muse dibahen tu dengke na gelleng i. Dung i mangan ma nasida sahat tu na butong. 12  Dung butong nasida, didok Jesus ma tu angka siseanna, “Papungu hamu ma angka na lobi i asa unang adong na bolong.” 13  Dung i, dipapungu nasida ma lobi-lobi ni roti barli na lima i na so habis ni natorop i. Gok 12 karanjang ma godangna. 14  Dung diida natorop i tanda halongangan* na binahenna i, didok nasida ma, “Tutu, ibana do Panurirang na naeng ro tu portibi on.” 15  Diboto Jesus ma na naeng paksaon ni nasida ibana gabe raja, alani i laho ma ibana muse tu dolok sahalakna. 16  Dung naeng borngin, laho ma angka sisean ni Jesus tu topi ni laut, 17  nangkok ma nasida tu parau jala taripar ma nasida tu Kapernaum. Nunga holom ari, alai ndang ro dope Jesus mandapothon nasida. 18  Jala nunga balga galumbang ni laut i alani alogo na gogo. 19  Tingki dilugai nasida parau i hira-hira lima sahat tu onom kilometer,* diida nasida ma Jesus mardalan di atas ni aek. Dung lam jonok Jesus tu parau i gabe mabiar ma nasida. 20  Didok Jesus ma tu nasida, “Ahu do on, unang mabiar hamu!” 21  Ujungna, las ma roha nasida manjalo ibana masuk tu parau i. Jala ndang sadia leleng sahat ma parau i tu inganan na tinuju ni nasida. 22  Marsogotna i, diida halak natorop na maringanan di bariba ni laut i ma na holan sada do parau disi. Diboto nasida do na so rap Jesus dohot angka siseanna i, ai holan angka siseanna i do na laho. 23  Alai ro ma angka parau sian Tiberias. Sahat ma angka parau i tu jonok ni inganan ni natorop i mangallang roti dung didok Tuan i mauliate tu Debata. 24  Dung diida natorop i ndang adong disi Jesus dohot angka siseanna, nangkok ma nasida tu parau jala borhat ma nasida tu Kapernaum laho mangalului Jesus. 25  Dung jumpang nasida Jesus di bariba ni laut, didok nasida ma tu ibana, “Guru, sadihari do ho tuson?” 26  Dialusi Jesus ma nasida, “Tutu do na hudok on tu hamu, dilului hamu pe ahu ala na butong i do hamu mangallang roti i, ndang ala naung diida hamu tanda halongangan* na hubahen. 27  Unang ma karejo hamu tu sipanganon na olo busuk. Alai karejo ma hamu tu sipanganon na so olo busuk na parohon hangoluan saleleng ni lelengna, na laho lehonon ni Anak ni jolma i tu hamu. Ai nunga dibahen Debata Ama i meterai tu ibana patuduhon na lomo rohana tu ibana.” 28  Didok natorop i ma tu Jesus, “Aha do sibahenonnami laho mangulahon ulaon na sian Debata?” 29  Dialusi Jesus ma nasida, “Laho mangulahon ulaon na sian Debata, patudu hamu ma haporseaonmuna tu halak na sinuruna i.” 30  Dung i didok nasida ma tu ibana, “Aha ma tanda halongangan* sibahenonmu asa huida hami jala asa porsea hami tu ho? Aha do na laho ulahononmu? 31  Mangallang manna do angka ompunami tingki di padang pasir,* songon na tarsurat i, ‘Dilehon Ibana do roti sian banua ginjang laho allangon ni nasida.’” 32  Dung i didok Jesus ma tu nasida, “Ndang si Musa na mangalehon roti sian banua ginjang tu hamu, alai Damang i do na mangalehon tu hamu roti na tutu sian banua ginjang. 33  Ai roti na sian Debata, i ma ibana na turun sian banua ginjang jala na mangalehon hangoluan tu portibi on.” 34  Dung i didok nasida ma tu ibana, “Tuan, sai lehon ma tu hami roti sisongon i.” 35  Didok Jesus ma tu nasida, “Ahu do roti hangoluan i. Manang ise na ro tu ahu ndang na laho male be, jala manang ise na patuduhon haporseaon tu ahu ndang na laho mauas be. 36  Songon naung hea hudok tu hamu, nang pe diida hamu ahu alai ndang porsea hamu tu ahu. 37  Sude na nilehon ni Ama i tu ahu, na laho ro do i tu ahu. Jala ndang palaoonku manang ise na ro tu ahu. 38  Ai turun pe ahu sian banua ginjang ndang na laho mangulahon lomo ni rohangku, alai laho mangulahon lomo ni roha ni na marsuru ahu i do. 39  Lomo ni roha ni na marsuru ahu, i ma asa unang mago nanggo sahalak pe sian sude na nilehonna tu ahu, alai asa paheheonku do nasida di ari parpudi. 40  Ai on do lomo ni roha ni Damang, asa manang ise na manjalo Anak i jala na patuduhon haporseaon tu ibana dapotna ma hangoluan saleleng ni lelengna. Jala paheheonku ma ibana di ari parpudi.” 41  Gabe marungut-ungut ma angka halak Jahudi taringot tu ibana ala na nidokna i, “Ahu do roti na turun sian banua ginjang.” 42  Jala didok nasida ma, “Nda Jesus anak ni si Josep i ibana? Nda tatanda do amana dohot inana? Alai boasa ma dohononna, ‘Na turun do ahu sian banua ginjang’?” 43  Didok Jesus ma tu nasida, “Paso hamu ma ungut-ungutmuna i. 44  Ndang adong manang ise na boi ro tu ahu, anggo so Ama na marsuru ahu i na manogu ibana, jala paheheonku ma ibana di ari parpudi. 45  Songon na Sinurat ni Angka Panurirang, ‘Ajaran ni Jahowa ma nasida sude.’ Ro do tu ahu manang ise naung manangihon jala naung marsiajar sian Ama i. 46  Alai ndang adong jolma naung hea mangida Ama i. Holan na ro sian Debata do naung hea mangida Ama i. 47  Tutu do na hudok on tu hamu, manang ise na porsea dapotna ma hangoluan saleleng ni lelengna. 48  “Ahu do roti hangoluan i. 49  Mangallang manna do angka ompumuna tingki di padang pasir,* alai mate do nasida. 50  On do roti na sian banua ginjang i, manang ise pe boi do mangallang i jala ndang na laho mate be. 51  Ahu do roti na turun sian banua ginjang i. Manang ise na mangallang roti on, mangolu ma ibana saleleng ni lelengna. Roti silehononku, i ma dagingku, na naeng lehononku asa mandapot hangoluan portibi on.” 52  Gabe marsoal ma halak Jahudi sama nasida, ninna ma, “Boha ma bahenon ni ibana mangalehon dagingna i allangonta?” 53  Dung i didok Jesus ma tu nasida, “Tutu do na hudok on tu hamu, molo ndang dipangan hamu daging ni Anak ni jolma i jala ndang diinum hamu mudarna, ndang dapotmuna hangoluan. 54  Manang ise na mangallang dagingku dohot na manginum mudarhu dapotna ma hangoluan na saleleng ni lelengna, jala paheheonku ma ibana di ari parpudi. 55  Ai sipanganon na tutu do dagingku, jala siinumon na tutu do mudarhu. 56  Manang ise na mangallang dagingku jala na manginum mudarhu tongtong ma ibana marsada dohot ahu, jala ahu marsada dohot ibana. 57  Ama na mangolu i do na marsuru ahu jala ahu mangolu alani Ibana. Songon i ma, manang ise na mangallang ahu mangolu do alani ahu. 58  On do roti na turun sian banua ginjang, ndang songon roti na niallang ni angka ompumuna i, ai mate do nasida. Manang ise na mangallang roti on, mangolu ma saleleng ni lelengna.” 59  Dihatahon Jesus do angka hata on tingki mangajari ibana di sinagoga* di Kapernaum. 60  Dung dibege nasida i, godang ma sian angka sisean ni Jesus i na mandok, “Ndang tarjalo hatana i. Ise ma na olo manangihon i?” 61  Alai, diboto Jesus do na marungut-ungut angka siseanna alani hatana i. Didok ibana ma tu nasida, “Na gabe tartuktuk do hamu alani hatangki? 62  Lam boha ma molo diida hamu nangkok Anak ni jolma i tu inganan haroroanna hian? 63  Tondi parbadia do na mangalehon hangoluan, ndang daging na so marguna i. Aha na huhatahon tu hamu sian tondi parbadia do i jala i do na mangalehon hangoluan. 64  Alai adong do deba sian hamu na so porsea.” Ai sian mulana, nunga diboto Jesus manang ise na so porsea jala ise na laho manjehehon ibana. 65  Didok ibana ma muse, “Alani i do hudok tu hamu, ndang adong manang ise na boi ro tu ahu anggo so diloas Ama i.” 66  Alani i, godang ma sian angka sisean ni Jesus na mulak tu ulaon ni nasida hian jala ndang diihuthon nasida be ibana. 67  Gabe disungkun Jesus ma tu apostel na 12 i, “Ndang dohot hamu naeng laho?” 68  Dialusi si Simon Petrus ma, “Ale Tuan, tung tu ise ma hami laho? Di ho do hata hangoluan na saleleng ni lelengna. 69  Nunga porsea hami jala nunga huboto hami ho do na Badia ni Debata.” 70  Dung i dialusi Jesus ma nasida, “Nda 12 halak do hamu hupillit? Alai adong do sahalak sian hamu na gabe sibolis.”* 71  Sasintongna, si Judas anak ni si Simon Iskariot do na tinaringotanna disi. Ai nang pe sahalak sian apostel na 12 i ibana, gabe ibana do muse na manjehehon Jesus.

Surat na di toru

Manang “mukjizat”.
Hepeng logam perak ni halak Rom. Ida di Kamus.
Manang “mukjizat”.
As. “hira-hira tolu sahat tu opat mil”.
Manang “mukjizat”.
Manang “mukjizat”.
Manang “di halongonan”.
Manang “di halongonan”.
Manang “di jolo ni natorop”.
Di bahasa Junani hata “sibolis” patuduhon halak na paroa-roahon donganna.