Johannes 5:1-47

  • Sahalak baoa dipamalum di Betesda (1-18)

  • Jesus mandapot huaso sian Amana (19-24)

  • Begeon ni na mate ma soara ni Jesus (25-30)

  • Barita taringot tu Jesus (31-47)

5  Dungkon i, adong ma perayaan ni halak Jahudi jala borhat ma Jesus tu Jerusalem.  Disi, jonok tu Harbangan Biru-biru adong do sada kolam paridian na digoari Betesda di bahasa Heber. Adong do lima inganan manisio di paridian i.  Torop do disi marpeakan na marsahit, na mapitung, na pangpang dohot na lumpu.  *——  Disi adong ma sahalak baoa naung 38 taon marsahit.  Diida Jesus ma ibana peak disi jala diboto do naung leleng ibana marsahit. Gabe didok Jesus ma tu ibana, “Olo do ho malum?”  Dialusi na marsahit i ma, “Tingki gunsang aekna ndang adong na mamboan ahu masuk tu kolam i Amang. Tingki naeng masuk ahu tusi, nunga parjolo masuk na asing.”  Didok Jesus ma tu ibana, “Hehe ma ho! Boan ma tikkarmi* jala mardalan ma ho.”  Laos satongkin i, malum ma baoa i. Diboan ma tikkarna* i jala mardalan ma ibana. Ari Sabbat do tingki i. 10  Dung i didok halak Jahudi ma tu na dipamalum i, “Ari Sabbat do saonari. Alani i, ndang boi boanonmu tikkarmi.”* 11  Alai dialusi ibana ma nasida, “Halak na pamalumhon ahu i do na mandok tu ahu, ‘Boan ma tikkarmi* jala mardalan ma ho.’” 12  Disungkun nasida ma ibana, “Ise do halak na marsuru ho mamboan i jala mardalan?” 13  Alai ndang diboto halak na malum i ise na pamalumhon ibana, ai ndang tarida be Jesus alani torop ni jolma na disi. 14  Dung i pajumpang ma Jesus dohot baoa i di bagas joro jala didok ma tu ibana, “Saonari nunga malum ho. Alani i unang be ulahon dosa, asa unang masa tu ho na umposi.” 15  Dung i laho ma baoa i, dipaboa ibana ma tu halak Jahudi, Jesus do na pamalumhon ibana. 16  Mulai sian i ma sogo roha ni halak Jahudi tu Jesus, ala dipamalum ibana do na marsahit di ari Sabbat. 17  Didok Jesus ma tu nasida, “Tongtong do karejo Damang sahat tu saonari, jala ahu pe tongtong do songon i.” 18  Alani hatana i, lam marsitutu ma halak Jahudi mangalului dalan laho mambunu Jesus. Ai didok roha nasida, ndang holan ari Sabbat be dialo ibana, alai dohot do alani hatana na mandok Amana do Debata. Marhite i, dipados ibana do dirina tu Debata. 19  Alai songon on ma alus ni Jesus tu nasida, “Tutu do na hudok on tu hamu, ndang adong manang aha pe na niulahon ni Anak i mangihuthon sangkapna sandiri. Alai na niidana diulahon Ama i, holan i do diulahon ibana. Ai manang aha na niulahon ni Ama i, laos songon i do diulahon Anak i. 20  Dihaholongi Ama i do Anak i jala dipatuduhon do sude na niulana tu ibana. Patuduhonon ni Ama i dope tu Anak i angka ulaon na umbalga sian i, asa longang rohamuna. 21  Songon Ama i na pahehehon halak na mate jala pangoluhon nasida, Anak i pe pangoluonna do manang ise lomo ni rohana. 22  Ai ndang diuhumi Ama i manang ise pe, alai dilehon do tu Anak i huaso laho manguhumi saluhutna. 23  Asa sude pasangaphon Anak i dos songon nasida pasangaphon Ama i. Manang ise na so pasangaphon Anak i, ndang dipasangap nasida Ama na marsuru ibana. 24  Tutu do na hudok on tu hamu, manang ise na manangihon hatangku jala porsea tu Ama na marsuru ahu, dapotna do hangoluan na saleleng ni lelengna. Jala ndang mate manang diuhumi be ibana, alai dapotna ma hangoluan. 25  “Tutu do na hudok on tu hamu, na ro ma tingkina jala saonari ma i, begeon ni angka na mate ma soara ni Anak ni Debata jala mangolu ma manang ise na mamparrohahon i. 26  Marhuaso do Ama i laho mangalehon hangoluan jala dilehon ibana do huaso laho mangalehon hangoluan tu Anak i. 27  Jala dilehon Ama i do tu ibana huaso laho manguhumi, ai ibana do Anak ni jolma i. 28  Unang ma longang rohamuna, ai na ro ma tingkina begeon ni saluhut na di kuburan* i ma soarana 29  jala kaluar ma nasida. Angka sibahen na denggan hehe tu hangoluan jala angka sibahen na jahat hehe laho diuhumi. 30  Ai ndang adong na boi huulahon mangihuthon sangkaphu sandiri. Hombar tu na nidok ni Ama i do ahu manguhumi, jala tigor do panguhumanki ala ndang hubahen mangihuthon sangkaphu, alai sangkap ni na marsuru ahu i do na huihuthon. 31  “Molo holan ahu sandiri do na paboahon taringot tu diringku, ndang sintong na hupaboa i. 32  Alai adong do halak na asing na paboahon taringot tu ahu, jala huboto do sintong na pinaboana i taringot tu ahu. 33  Disuru hamu do angka halak mandapothon si Johannes jala nunga dipaboa ibana hasintongan i. 34  Sasintongna, ndang porlu di ahu paboaon ni halak taringot tu ahu, alai hupaboa pe on tu hamu asa boi do hamu malua. 35  Songon lampu na galak jala na marsinondang do si Johannes, alai satongkin do las rohamuna tu sinondangna i. 36  Alai rumingkot do na hupaboa sian na pinaboa ni si Johannes. Ai ulaon na nilehon ni Ama i laho pasidungonku, angka i do na huulahon jala on ma na patuduhon na sinuru ni Ama i do ahu. 37  Jala Ama na marsuru ahu i pe dipaboa do taringot tu ahu. Ndang hea dibege hamu soarana manang diida hamu rupana, 38  jala ndang disimpan hamu hatana i di rohamuna. Ai ndang porsea hamu tu na sinuruna i. 39  “Dipareso hamu do Surat na Badia, ala dirimpu hamu marhite i dapotmu hangoluan na saleleng ni lelengna. Hape taringot tu ahu do na pinaboa ni Surat na Badia i. 40  Alai ndang olo hamu ro tu ahu, asa dapotmuna hangoluan i. 41  Ndang hulului hasangapon sian jolma. 42  Alai tangkas do huboto ndang adong holong ni rohamuna tu Debata. 43  Marhite goar ni Damang do ahu ro, alai ndang dijalo hamu. Hape molo ro halak marhite goarna sandiri, dijalo hamu do halak i. 44  Songon dia ma hamu boi porsea tu ahu molo hamu sama hamu do na masipasangapan jala ndang dilului hamu hasangapon na sian Debata na sasada i? 45  Unang ma dirimpu hamu na laho patuduhon salamuna ahu tu Damang i. Si Musa na hinaporseaanmuna i do na patuduhon salamuna marhite angka na sinuratna i. 46  Sasintongna, molo porsea do hamu tu si Musa, porsea ma nian hamu tu ahu. Ai taringot tu ahu do na sinuratna. 47  Alai molo so porsea do hamu tu na sinuratna, songon dia ma hamu boi porsea tu na hudok i?”

Surat na di toru

Ida Mateus 17:21, surat na di toru.
Manang “podomanmi”.
Manang “podomanna”.
Manang “podomanmi”.
Manang “podomanmi”.
Di bahasa Junani, hata “kuburan” di ayat on hombar do tu hata marningot.