Johannes 21:1-25

  • Dipataridahon Jesus dirina tu angka siseanna (1-14)

  • Dipapos si Petrus holong ni rohana tu Jesus (15-19)

    • “Lehon ma mangan anak ni biru-birungki” (17)

  • Na laho masa tu sisean haholongan ni Jesus (20-23)

  • Hata panutup (24, 25)

21  Dung salpu i, dipataridahon Jesus ma muse dirina tu angka siseanna di Laut Tiberias. Songon on ma na masa tingki dipataridahon Jesus dirina tu nasida.  Marpungu do disi si Simon Petrus, si Tomas (na laos digoari si Kembar), si Natanael na sian Kana na di Galilea, angka anak ni si Sebedeus dohot dua halak sisean na asing.  Didok si Simon Petrus ma tu nasida, “Naeng laho ma ahu manangkup dengke.” Didok nasida ma tu ibana, “Dohot ma hami.” Dung i laho ma nasida marparau, alai ndang adong dapot ni nasida manang aha pe saborngin i.  Tingki laho torang ari, jongjong ma Jesus di topi ni laut. Alai ndang diboto angka sisean i na Jesus do i.  Dung i disungkun Jesus ma tu nasida, “Adong do siallangon* di hamu anaha?” Dialusi nasida ma, “Ndang adong!”  Didok Jesus ma tu nasida, “Sampakkon hamu ma jala i tu siamun ni parau i asa dapotmuna dengke.” Disampakkon nasida ma jala i, gabe ndang tartarik ni nasida be jala i alani godang ni dengke i.  Didok sisean na hinaholongan ni Jesus i ma tu si Petrus, “Tuan do i!” Dung dibege si Simon Petrus na Tuan do i, dipangke ma abit luarna, ai ndang marbaju-baju hian ibana. Dung i manimbung ma ibana tu laut.  Alai ro ma angka sisean na asing marparau na gelleng. Disarat nasida ma jala na gok dengke i, ai ndang pola dao nasida sian darat, hira-hira 90 meter* do daona.  Dung sahat nasida di topi ni laut, diida nasida ma adong dengke dohot roti di atas ni gara. 10  Didok Jesus ma tu nasida, “Boan ma deba tuson dengke na dapotmuna i.” 11  Dung i nangkok ma si Simon Petrus tu parau. Ditarik ibana ma jala tu darat, gok do jala i marisi dengke na balga, godangna 153 ekor. Nang pe godang dengke i, alai ndang maribak jala i. 12  Didok Jesus ma tu nasida, “Ro ma hamu mangan!” Alai ndang adong sian angka sisean i na barani manungkun “Ise do ibana?” Ai nunga diboto nasida Tuan i do i. 13  Dibuat Jesus ma roti jala dibagihon ma tu nasida, songon i ma muse dibahen tu dengke i. 14  On ma na patoluhalihon Jesus pataridahon dirina tu angka siseanna dung hehe ibana sian na mate. 15  Dung sae nasida mangan, didok Jesus ma tu si Simon Petrus, “Simon, anak ni si Johannes, humolong do roham tu ahu sian apala angka on?” Dialusi si Simon ma, “Olo Tuan, diboto ho do holong ni rohangku tu ho.” Didok Jesus ma tu ibana, “Lehon ma mangan anak ni biru-birungki.” 16  Didok Jesus ma muse paduahalihon tu ibana, “Simon, anak ni si Johannes, holong do roham tu ahu?” Ninna ibana ma mangalusi, “Olo Tuan, diboto ho do holong ni rohangku tu ho.” Ninna Jesus ma tu ibana, “Parmahani ma anak ni biru-birungki.” 17  Didok Jesus ma muse patoluhalihon tu ibana, “Simon anak ni si Johannes, holong do roham tu ahu?” Gabe lungun ma roha ni si Petrus ala nunga tolu hali disungkun Jesus songon i. Alani i didok si Petrus ma, “Tuan, saluhutna do diboto ho. Diboto ho do holong ni rohangku tu ho.” Didok Jesus ma tu ibana, “Lehon ma mangan anak ni biru-birungki. 18  Tutu do na hudok on tu ho, tingki poso ho, ho sandiri do na mamangkehon bajum jala laho do ho manang na tudia lomo ni roham. Alai molo dung matua ho, lehononmu ma tanganmu jala halak ma mamangkehon bajum, boanonna ma ho tu inganan na so dihalomohon roham.” 19  Didok Jesus pe songon i, laho patuduhon songon dia do parmate ni si Petrus ala pasangaphon Debata. Dung i didok Jesus ma muse, “Tongtong ma ihuthon ahu.” 20  Dibereng si Petrus ma tu pudi, diida ibana ma sisean na hinaholongan ni Jesus mardalan mangihuthon nasida. Ibana do sisean na hundul di lambung ni Jesus tingki mangan di borngin i jala na manungkun, “Ise do na laho manjehehon ho Tuan?” 21  Dung diida si Petrus ibana, disungkun ma Jesus, “Boha do taringot tu ibana Tuan?” 22  Didok Jesus ma tu ibana, “Molo lomo rohangku mangolu ibana sahat tu na ro ahu, boasa pola pingkirhononmu i? Tongtong ma ihuthon ahu.” 23  Gabe sar ma barita di tonga-tonga ni angka siihuthon Jesus na mandok ndang na laho mate sisean i. Alai ndang adong didok Jesus songon i, na nidok ni Jesus, “Molo lomo rohangku mangolu ibana sahat tu na ro ahu, boasa pola pingkirhononmu i?” 24  Ibana do sisean na paboahon dohot na manurathon hata on jala taboto do sintong na pinaboana i. 25  Mansai godang dope na binahen ni Jesus, alai molo sude disurathon sada-sada, ndang siat be sude gulungan i di portibi on.

Surat na di toru

Manang “dengke”.
As. “hira-hira 200 hasta”.