Johannes 18:1-40

  • Dijehehon si Judas Jesus (1-9)

  • Dipangke si Petrus podangna (10, 11)

  • Jesus diboan tu si Hannas (12-14)

  • Na parjolo sahali si Petrus ndang mangakkui Jesus (15-18)

  • Jesus di jolo ni si Hannas (19-24)

  • Na paduahon jala na patoluhon si Petrus ndang mangakkui Jesus (25-27)

  • Jesus di jolo ni si Latus (28-40)

    • “Ndang sian portibi on Harajaonku” (36)

18  Dung sae didok Jesus sudena i, laho ma ibana dohot angka siseanna tu porlak na di bariba ni Rura Kidron.  Si Judas na manjehehon Jesus i, diboto ibana do inganan i, ala jotjot do Jesus marpungu dohot angka siseanna disi.  Diboan si Judas ma tusi sarombongan tentara dohot angka petugas na sinuru ni angka malim kepala* dohot halak Parise. Diboan nasida do obor, lampu, dohot sinjata.  Ala diboto Jesus do manang aha na naeng masa tu ibana, maju ma ibana jala disungkun ma nasida, “Ise do na niluluanmuna?”  Dialusi nasida ma, “Jesus halak Nasaret i.” Dialusi Jesus ma, “Ahu do i.” Disi do si Judas na manjehehon Jesus i jongjong rap dohot nasida.  Alai tingki didok Jesus tu nasida, “Ahu do i,” mundur ma nasida jala martinggangan ma nasida.  Disungkun Jesus ma muse nasida, “Ise do na niluluanmuna?” Dialusi nasida ma, “Jesus halak Nasaret i.”  Didok Jesus ma, “Nunga hupaboa tu hamu ahu do i. Molo ahu do na niluluanmuna, loas hamu ma laho halak on.”  Gabe saut ma hata na nidokna i hian, “Ndang adong na mago nanggo sahalak pe sian nasida na nilehonmi tu ahu.” 10  Disintak si Simon Petrus ma podangna, diroro ma hatoban ni sintua ni malim jala ditallik ma pinggol siamunna. Si Malkus do goar ni hatoban ni sintua ni malim i. 11  Alai didok Jesus ma tu si Petrus, “Pasarung ma podangmi. Nda ingkon minum do ahu sian mangkuk na nilehon ni Ama i tu ahu?” 12  Ditangkup angka tentara, komandan militer, dohot angka petugas ni halak Jahudi ma Jesus. Dung i ditali ma ibana. 13  Diboan nasida ma Jesus parjolo tu si Hannas. Ibana do simatua ni si Kayapas, sintua ni malim di taon i. 14  Sasintongna ibana do si Kayapas na hea mandok tu halak Jahudi, tumagon do mate sahalak jolma laho paluahon bangso i. 15  Diihuthon si Simon Petrus dohot sahalak sisean na asing ma Jesus. Ditanda sintua ni malim do sisean na asing i. Dung i, rap masuk ma ibana dohot Jesus tu alaman ni sintua ni malim i. 16  Alai jongjong do si Petrus di luar, di harbangan i. Dung i, kaluar ma sisean na ditanda ni sintua ni malim i mangkatai tu panjaga ni pintu, jala diboan ma si Petrus masuk. 17  Disungkun hatoban borua na manjaga pintu i ma tu si Petrus, “Nda dohot do ho sisean ni baoa i?” Dialusi si Petrus ma, “Daong.” 18  Ala ngali do ari, dipagalak angka hatoban dohot angka petugas i ma api jala jongjong ma nasida mansisulu* di lambung ni api i. Jongjong do nang si Petrus mansisulu rap dohot nasida. 19  Disungkuni malim kepala* ma Jesus taringot tu angka siseanna dohot na niajarhonna. 20  Dialusi Jesus ma ibana, “Patar do ahu mangkatai di jolo ni natorop. Tongtong do ahu mangajari di sinagoga* dohot di bagas joro, inganan parpunguan ni sude halak Jahudi. Ndang hea martabuni-tabuni ahu mangkatai. 21  Boasa pola sungkunonmuna ahu? Sungkun hamu ma halak na hea mambege na huhatahon i. Diboto nasida do aha na hudok.” 22  Dung didok Jesus songon i, dipastap sahalak petugas na jongjong disi ma bohi ni Jesus, ninna ma, “Songon i do dohononmu mangalusi malim kepala?”* 23  Dialusi Jesus ma ibana, “Molo adong na sala na hudok i, paboa* ma dia na sala. Alai molo sintong do na hudok i, boasa pastaponmu ahu?” 24  Dung i disuru si Hannas ma nasida mamboan Jesus tu si Kayapas sintua ni malim i, laos tartali dope tangan ni Jesus di tingki i. 25  Tingki i jongjong dope si Simon Petrus mansisulu. Didok nasida ma tu ibana, “Nda dohot do ho siseanna?” Alai ndang diakkui* si Petrus i, jala ninna ma, “Daong.” 26  Adong do disi sahalak naposo ni sintua ni malim, sisolhot ni halak na tinallik ni si Petrus i pinggolna. Didok ibana ma: “Nda huida do ho rap dohot ibana di porlak i?” 27  Alai tong do ndang mangakku si Petrus jala pintor martahuak ma manuk. 28  Sogot manogot i, diboan nasida ma Jesus sian jabu ni si Kayapas tu jabu ni gubernur. Alai ndang masuk nasida tu jabu ni gubernur i, asa unang ramun nasida jala boi mangallang sipanganon Paska. 29  Dung i kaluar ma si Latus mandapothon nasida, ninna ma, “Hajahaton aha do diulahon ibana?” 30  Dialusi nasida ma si Latus, “Ai molo ndang parjahat ibana, ndang pasahatonnami ibana tu ho.” 31  Dung i didok si Latus ma tu nasida, “Boan hamu ma ibana jala uhumi hamu ma ibana hombar tu patikmuna.” Didok halak Jahudi i ma tu ibana, “Ndang marhak hami laho mambunu sasahalak.” 32  Gabe saut ma na nidok ni Jesus taringot tu songon dia parmatena. 33  Dung i masuk ma muse si Latus tu jabu ni gubernur, dijou ma Jesus jala disungkun ma ibana, “Raja ni halak Jahudi do ho?” 34  Dialusi Jesus ma, “Sian roham do sungkun-sungkunmi manang na adong do halak paboahon tu ho taringot tu ahu?” 35  Dialusi si Latus ma, “Ai na dirimpu ho do halak Jahudi ahu? Bangsomi dohot angka malim kepala* do na pasahathon ho tu ahu. Aha huroha diulahon ho?” 36  Dialusi Jesus ma, “Ndang sian portibi on Harajaonku. Molo sian portibi on Harajaonku mangalo do angka naposongku asa unang dipasahat ahu tu halak Jahudi. Alai ndang sian portibi on Harajaonku.” 37  Dung i disungkun si Latus ma, “Antong tutu do ho raja?” Dialusi Jesus ma, “Tutu, songon na nidokmi ma, raja do ahu. Alani i do ahu tubu jala ro tu portibi on, ai ingkon paboaonku do hasintongan i. Manang ise na mangoloi hasintongan i, tangihononna do soarangku.” 38  Didok si Latus ma, “Aha ma i hasintongan i?” Dung didok ibana songon i, kaluar ma ibana mandapothon halak Jahudi jala ninna ma tu nasida, “Ndang adong dapothu na sala sian ibana. 39  Asing ni i, somal do hupalua tu hamu sasahalak tingki Paska. Lomo do rohamuna molo hupalua Raja ni halak Jahudi i?” 40  Dung i gogo ma didok nasida, “Unang ma ibana, si Barabas ma palua!” Hape pangarampok do si Barabas.

Surat na di toru

Ida di Kamus.
Manang “mandadang”.
Ida di Kamus.
Manang “parguruan”. Ida di Kamus.
Ida di Kamus.
Manang “patudu”.
Manang “disoadahon”.
Ida di Kamus.