Johannes 16:1-33

  • Na laho mate ma angka sisean ni Jesus (1-4a)

  • Na laho bahenon ni tondi parbadia (4b-16)

  • Hasusaan ni angka sisean muba gabe las ni roha (17-24)

  • Nunga ditaluhon Jesus portibi on (25-33)

16  “Hupaboa do angka i tu hamu asa unang tartuktuk hamu.  Palaoon ni halak ma hamu sian sinagoga.* Sasintongna, na ro ma tingkina songon na marhobas tu Debata ma didok roha ni manang ise na mambunu hamu.  Dibahen nasida pe songon i, ala ndang ditanda nasida Ama i dohot ahu.  Alai hupaboa pe angka i tu hamu asa molo masa i, ingotonmuna ma naung hea hupaboa i tu hamu. “Ndang hupaboa dope i tu hamu sian mulana, ala rap dope ahu dohot hamu.  Saonari, na laho ma ahu tu Ibana na marsuru ahu. Alai ndang adong sahalak pe sian hamu na manungkun tudia ahu laho.  Ala hupaboa angka i tu hamu, gabe mansai lungun ma rohamuna.  Nang pe songon i, hudok ma na sasintongna tu hamu, parohon na denggan do tu hamu molo laho ahu. Ai molo ndang laho ahu, ndang ro pangurupi i tu hamu. Alai molo laho ahu, suruonku ma i tu hamu.  Molo dung ro i, tangkas ma patuduhononna tu portibi on taringot tu dosa, taringot tu na sintong, dohot taringot tu panguhuman ni Debata.  Na parjolo taringot tu dosa, ai ndang porsea nasida tu ahu. 10  Dung i taringot tu na sintong, ai na laho ma ahu tu Ama i jala ndang idaonmuna be ahu. 11  Dung i muse taringot tu panguhuman ni Debata, ai nunga diuhumi parhuaso ni portibi on. 12  “Godang dope sidohononku tu hamu, alai ndang boi dope diantusi hamu i saonari. 13  Alai molo dung ro ibana,* i ma tondi parbadia na papatarhon hasintongan, urupanna ma hamu mangantusi hasintongan i. Ai ndang sian ibana na nidokna i, alai na binegena do na pinaboana jala paboaonna ma tu hamu angka na laho masa. 14  Pasangaponna ma ahu, ai paboaonna ma tu hamu naung jinalona sian ahu. 15  Sude ampuna ni Ama i, ampunangku do i. Alani i do hudok, paboaonna ma tu hamu naung jinalona sian ahu. 16  Satongkin nai ndang idaonmuna be ahu, alai satongkin nai idaonmuna ma muse ahu.” 17  Adong ma manang na piga sian angka siseanna i mandok sama nasida, “Aha do lapatan ni hatana i? Didok ibana, ‘Satongkin nai ndang idaonmuna be ahu, alai satongkin nai idaonmuna ma muse ahu,’ jala ‘na laho ma ahu tu Ama i’.” 18  Didok nasida ma, “Aha do lapatan ni hatana na mandok, ‘satongkin nai’? Ndang taantusi na nidokna i.” 19  Diboto Jesus do na naeng sungkunon ni nasida ibana. Alani i didok ibana ma tu nasida, “Na masisungkunan do hamu, ala hudok, ‘Satongkin nai ndang idaonmuna be ahu, alai satongkin nai idaonmuna ma muse ahu’? 20  Tutu do na hudok on tu hamu, na laho tangis ma hamu jala mangandungi, alai marlas ni roha ma portibi on. Susa ma pangkilalaanmuna, alai muba ma hasusaanmuna i gabe las ni roha. 21  Susa do pangkilalaan ni sahalak ina molo dung jumpang tingkina naeng tubu-tubuan.* Alai dung tubu-tubuan ibana, ndang diingot be hasusaanna i. Ai nunga las rohana ala naung tubu sahalak jolma tu portibi on. 22  Songon i ma nang hamu, susa do pangkilalaanmuna saonari, alai idaonku ma hamu muse jala las ma rohamuna. Jala ndang adong na boi mambuat las ni rohamuna i. 23  Di tingki i, ndang adong be sisungkunonmuna tu ahu. Tutu do na hudok on tu hamu, molo dipangido hamu manang aha tu Ama i, lehononna do i tu hamu di bagasan goarhu. 24  Sahat tu saonari, ndang adong dope dipangido hamu manang aha di bagasan goarhu. Pangido hamu ma asa dapotmuna i, dung i gok ma las ni rohamuna. 25  “Marhite tudosan do huhatahon on sude tu hamu. Na ro ma tingkina, ndang marhite tudosan be ahu mangkatai tu hamu, alai tangkas ma paboaonku tu hamu taringot tu Ama i. 26  Di tingki i, pangidoonmuna ma tu Ama i di bagasan goarhu. Na hudok disi, ndang na ahu na mangido tu Ama i na ringkot di hamu. 27  Ai holong do roha ni Ama i tu hamu, ala holong do rohamuna tu ahu jala porsea do hamu na sinuru ni Debata do ahu. 28  Na sinuru ni Ama i do ahu umbahen na ro tu portibi on. Saonari, tadingkononku ma portibi on jala laho ma ahu tu Ama i.” 29  Didok angka siseanna i ma, “Saonari, nunga tangkas be dipaboa ho jala ndang marhite tudosan be ho mangkatai. 30  Nunga huboto hami be saonari, diboto ho do saluhutna. Jala ndang porlu be sungkunon ni halak ho, ai diboto ho do pingkiran ni nasida. Alani i ma hami porsea na ro sian Debata do ho.” 31  Didok Jesus ma tu nasida, “Nunga porsea be hamu saonari? 32  Na ro ma tingkina jala nunga ro i, marserak ma hamu jala mulak tu jabumuna be. Tadingkononmuna ma sasada ahu. Alai ndang tading sasada ahu, adong do Ama i mandongani ahu. 33  Hupaboa do angka on tu hamu asa dapotmuna hadameon marhite ahu. Susa do hamu bahenon ni portibi on, alai unang ma mabiar hamu! Ai nunga hutaluhon portibi on.”

Surat na di toru

Manang “parguruan”. Ida di Kamus.
Hata “ibana” di ayat 13 dohot 14 dos do tu hata “pangurupi” di ayat pitu. Dipangke Jesus do on laho manggombarhon tondi parbadia (hagogoon).
Manang “partus”.