Johannes 13:1-38

  • Disunsi Jesus pat ni angka siseanna (1-20)

  • Dipaboa Jesus taringot tu si Judas na laho manjehehon ibana (21-30)

  • Parenta na imbaru (31-35)

    • “Molo masihaholongan hamu” (35)

  • Surirang taringot tu si Petrus na so mangakkui Jesus (36-38)

13  Andorang so Perayaan Paska, nunga diboto Jesus naung jumpang tingkina naeng tadingkononna ma portibi on laho mandapothon Ama i. Dihaholongi Jesus do angka siseanna na adong di portibi on jala dihaholongi do nasida sahat ro di ujungna.  Di borngin i rap mangan do nasida, alai nunga dirajai Sibolis roha ni si Judas Iskariot anak ni si Simon laho manjehehon Jesus.  Nunga diboto Jesus naung dipasahat Ama i saluhutna tu tanganna. Diboto ibana do na sian Debata ibana jala na ingkon mulak do ibana tu Debata.  Di tingki na mangan i nasida, jongjong ma Jesus jala dibungka ibana ma abit luarna. Dung i dibuat ma anduk jala dialithon tu gontingna.  Dibahen ibana ma aek tu baskom, disunsi* ibana ma pat ni angka siseanna i jala dilap dohot anduk na di gontingna i.  Dung i sahat ma Jesus tu si Simon Petrus. Didok si Petrus ma, “Naeng sunsionmu do pathu, Tuan?”  Dialusi Jesus ma ibana, “Ndang saonari antusanmu na hubahen i, haduan pe.”  Didok si Petrus ma tu Jesus, “Ndang loasonku sunsionmu pathu, Tuan.” Didok Jesus ma, “Molo ndang husunsi* patmi, ndang boi ho rap dohot ahu.”  Didok si Simon Petrus ma, “Tuan, unang ma holan pathu sunsi dohot ma tanganku nang ulungku.” 10  Didok Jesus ma tu ibana, “Manang ise naung maridi nunga ias be dagingna, alani i holan patna nama na porlu disunsi.* Ai ias do hamu, alai ndang sude hamu ias.” 11  Ai diboto Jesus do ise na laho manjehehon ibana. Alani i do didok ibana, “Ndang sude hamu ias.” 12  Dung sae disunsi* Jesus pat ni nasida, dipangke ibana ma muse abit luarna i. Hundul ma muse ibana jala didok ma tu nasida, “Diantusi hamu do na hubahen i tu hamu? 13  Dijou hamu do ahu ‘Guru’ dohot ‘Tuan’ jala tingkos do na nidokmuna i. 14  Nang pe ahu Tuan jala Guru, husunsi* do patmuna. Alani i, hamu sama hamu pe patut do manunsi pat ni donganmuna. 15  Nunga hupatuduhon sitiruon tu hamu, asa ulahononmuna songon na hubahen i tu hamu. 16  Tutu do na hudok on tu hamu, ndang umbalga hatoban sian tuanna. Jala ndang umbalga halak na disuru sian na marsuru ibana. 17  Saonari nunga diboto hamu angka i, alai marlas ni roha ma hamu molo diulahon hamu i. 18  Ndang tu hamu sude hatangkon, ai hutanda do na hupillit. Alai masa pe i, asa saut do hata ni na tarsurat i, ‘Halak na rap mangan dohot ahu, i do mangalo ahu.’* 19  Hupaboa do i saonari tu hamu andorang so masa dope i. Asa molo dung masa i, porsea ma hamu ahu do na pinaboa ni na tarsurat i. 20  Tutu do na hudok on tu hamu, manang ise na manjalo halak na husuru, na manjalo ahu do i. Jala manang ise na manjalo ahu, na manjalo Ibana na marsuru ahu do i.” 21  Dung didok Jesus songon i, marsak ma ibana, jala tangkas ma didok, “Tutu do na hudok on tu hamu, adong do sahalak sian hamu na laho manjehehon ahu.” 22  Masiberengan ma angka sisean i, ala ndang diboto nasida ise na nidok ni Jesus. 23  Sahalak sian sisean i, na hinaholongan ni Jesus, hundul jonok tu* ibana. 24  Dibahen si Simon Petrus ma tanda tu sisean i jala ninna ma, “Ise do na nidokna i?” 25  Dung i lam dipajonok sisean i ma tu Jesus jala ninna ma, “Tuan, ise do na nidokmi?” 26  Ninna Jesus ma mangalusi, “Manang tu ise hulehon roti na husornophon on, i ma ibana.” Dung i disornophon ibana ma roti i, jala dilehon ma i tu si Judas anak ni si Simon Iskariot. 27  Dung dijalo si Judas roti i, dirajai Sibolis ma rohana. Ninna Jesus ma tu ibana, “Hatop ma ulahon na laho sibahenonmi.” 28  Alai ndang adong sian na hundul disi na mamboto boasa didok Jesus songon i tu ibana. 29  Ala si Judas do na maniop kotak ni hepeng, dirimpu na deba ma na disuru Jesus ibana manuhor na porlu tu perayaan i manang mangalehon hepeng tu na pogos. 30  Dung dijalo si Judas roti i, pintor kaluar ma ibana jala nunga borngin tingki i. 31  Dung laho si Judas, didok Jesus ma, “Saonari dipasangap ma Anak ni jolma i jala marhite ibana dipasangap ma Debata. 32  Pasangapon ni Debata ma Anak ni jolma i jala hatop ma i bahenonna. 33  Hamu angka ianakhonku, ndang leleng be ahu rap dohot hamu. Luluanmuna ma ahu, alai songon na hudok tu halak Jahudi, dohononku ma i muse tu hamu saonari, ‘Ndang boi hamu ro tu inganan sitopotonki.’ 34  Hulehon ma tu hamu parenta na imbaru, masihaholongan ma hamu. Songon ahu na mangkaholongi hamu, hamu pe ingkon masihaholongan ma. 35  Molo masihaholongan hamu, botoon ni sude jolma ma na siseanku hamu.” 36  Disungkun si Simon Petrus ma Jesus, “Tuan, naeng tudia do ho laho?” Dialusi Jesus ma, “Ndang boi dope ihuthononmu ahu saonari tu inganan sitopotonki. Alai ihuthononmu ma ahu haduan.” 37  Disungkun si Petrus ma muse, “Boasa ndang boi ihuthononku ho saonari Tuan? Rade do ahu mate humongkop ho.” 38  Dialusi Jesus ma, “Rade do ho mate humongkop ahu? Tutu do na hudok on tu ho, ndang martahuak dope manuk, nunga tolu hali dohononmu na so ditanda ho ahu.”

Surat na di toru

Manang “diburi”.
Manang “huburi”.
Manang “diburi”.
Manang “diburi”.
Manang “huburi”.
As. “diangkat ibana do tumitna mangalo ahu”.
As. “tu andora ni”.