Heber 9:1-28

  • Marhobas tu Debata di Inganan na Mansai Badia na di tano on (1-10)

  • Kristus masuk tu surgo mamelehon mudarna sandiri (11-28)

    • Parhitean ni parjanjian na imbaru (15)

9  Ai di parjanjian na parjolo i adong do angka aturan laho marhobas tu Debata jala adong do kemah laho manomba Debata di tano on.  Adong dua inganan di bagasan ni kemah i. Di inganan na parjolo dibahen ma inganan ni lampu, meja, dohot roti pelean. Digoari ma inganan on, Inganan na Badia.  Di pudi ni tire na paduahon di kemah i, adong ma inganan na asing na digoari Inganan na Mansai Badia.  Disi, adong do inganan ni daupa na sian mas dohot poti parpadanan na marlampis mas. Di poti i, adong do baskom na sian mas na marisi manna, tungkot ni si Aron na hea martumbur, dohot dua batu panuratan ni patik* i.  Di atas ni poti i adong do dua kerubim na marmulia na mangalinggomi tutup* ni poti i. Alai ndang tingkina saonari laho patorangkon i sude.  Dung dibahen sudena songon i, ganup ari masuk ma angka malim tu Inganan na Badia na adong di kemah i laho marhobas tu Debata.  Alai holan sintua ni malim do na boi masuk tu Inganan na Mansai Badia i sahali sataon. Ingkon boanonna do mudar na laho pelehononna tu Debata, bahen hasesaan ni dosana sandiri dohot dosa na niulahon ni bangso i sian na so pamotoan ni nasida.  Marhite tondi parbadia, tangkas do dipatuduhon na so bungka dope dalan tu Inganan na Mansai Badia i, saleleng adong dope kemah na parjolo i.  Laho manggombarhon tingki sisaonari on do kemah i. Nang pe adong dibahen disi aturan laho pasahathon silehon-lehon dohot pelean, alai ndang boi angka i mambahen sun denggan panggora ni roha ni halak na manomba Debata. 10  Dibahen do i di Patik ni si Musa jala hombar do i tu sipanganon, siinumon, dohot tu angka ulaon paiashon diri.* Holan tu pardagingon do angka aturan i, na marlangku sahat tu na jumpang tingkina padengganon ni Debata saluhutna. 11  Alai ro do Kristus gabe sintua ni malim mangalehon angka na denggan naung tahilala saonari. Masuk do ibana tu kemah na umbalga jala na dumenggan, na so pinajongjong ni jolma manang na so sian tano on. 12  Masuk do ibana tu Inganan na Mansai Badia i mamelehon mudarna sandiri, ndang mudar ni hambing manang mudar ni lombu jantan na poso. Masuk do ibana tusi sahali ro di saleleng ni lelengna, jala dapotna ma haluaon* na manongtong i di hita. 13  Antong, molo boi do mudar ni hambing manang mudar ni lombu jantan na poso jala abu ni lombu na dipispishon* tu halak na ramun mambahen nasida ias di jolo ni Debata, 14  nda dumenggan mudar ni Kristus sian i? Ai marhite panogu-noguon ni tondi parbadia na manongtong i, dipelehon ibana do dirina tu Debata gabe pelean na sun denggan. Mudarna i ma na paiashon panggora ni rohanta sian angka ulaon na so marguna, asa boi hita marhobas tu Debata na mangolu i. 15  Alani i do Kristus gabe parhitean ni parjanjian na imbaru. Gabe boi ma halak na tarjou i manjalo janji laho mangolu saleleng ni lelengna. Ai marhite hamamatena ditobus do nasida jala dipalua sian hasalaan na niulahon ni nasida tingki marlangku dope parjanjian na parjolo i. 16  Molo adong parjanjian, ingkon mate do na mambahen parjanjian i.* 17  Ai gabe sah do parjanjian i molo dung adong na mate. Alana, ndang marlangku parjanjian i molo mangolu dope halak na mambahen parjanjian i. 18  Alani i ndang marlangku parjanjian na parjolo i molo so adong mudar. 19  Ai ganup dipaboa si Musa parenta na adong di Patik i tu bangso i, dibuat ibana do mudar ni lombu jantan na poso, dohot mudar ni hambing jala dicampur ma i dohot aek. Dibuat ma imbulu na rara, dohot hau-hau,* dipispishon ma i tu buku* ni parjanjian i dohot tu sude bangso i 20  jala didok ma, “On ma mudar parjanjian na diparentahon ni Debata laho ihuthononmuna.” 21  Dohot do dipispishon si Musa mudar i tu kemah i dohot tu sude parkakas na dipangke tu ulaon na badia i.* 22  Sasintongna mangihuthon Patik, hira sude do dipabadia marhite mudar jala molo ndang adong mudar diusehon, ndang adong hasesaan ni dosa. 23  Alani i, songon i ma dipabadia angka na manggombarhon na di banua ginjang i. Alai ingkon pelean na dumenggan do dibahen laho pabadiahon angka na di banua ginjang i. 24  Ndang masuk Kristus tu Inganan na Mansai Badia na pinajongjong ni jolma. Ai holan manggombarhon Inganan na Mansai Badia na sasintongna do i. Alai masuk do ibana tu surgo, tu jolo ni Debata humongkop hita. 25  Dibahen ibana pe songon i ndang na laho mulak-ulak ibana mamelehon dirina, songon sintua ni malim na ganup taon masuk tu Inganan na Mansai Badia i laho mamelehon mudar ni binatang.* 26  Ai molo songon sintua ni malim i do, ingkon mulak-ulak ma ibana marsitaonon sian mulai ditompa portibi on.* Alai saonari, di panutup ni jaman* on, nunga dipatuduhon ibana dirina sahali ro di saleleng ni lelengna laho manesa dosa ni jolma marhite mamelehon dirina. 27  Holan sahali do jolma mate ro di saleleng ni lelengna, dung i diuhumi Debata ma. 28  Songon i do nang Kristus i, holan sahali do dipelehon ibana dirina laho manesa dosa ni godang halak. Jala harorona na paduahalihon i ndang na laho manesa dosa ni jolma, alai ro do ibana laho paluahon angka jolma na paima-imahon ibana.

Surat na di toru

As. “parjanjian”.
Hata “tutup” di bahasa Junani boi do laho mandok pelean pardamean tu Debata.
As. “ragam ni pandidion”.
As. “tobusan”.
Manang “disampakkon”.
Manang “na gabe parhitean ni parjanjian i”.
Bahasa Junani, hyssopos. Ra on tubu di Palestina, timbona hira-hira 1,8 meter. Ida di Kamus.
Manang “tu gulungan”.
Manang “ulaon manomba Debata”.
As. “ndang mudarna sandiri”.
Ida surat na di toru na di 1 Petrus 1:20.
Manang “ajal ni hasiangan on”. Ida di Kamus.