Heber 5:1-14

  • Umtimbo do Jesus sian sintua ni malim na di tano on (1-10)

    • Malim na songon si Melkisedek (6, 10)

    • Marsiajar mangoloi do ibana sian sitaonon (8)

    • Gabe dalan haluaon na saleleng ni lelengna (9)

  • Sipasingot asa unang songon dakdanak (11-14)

5  Dipillit do ganup sintua ni malim sian tonga-tonga ni jolma laho mangurupi angka jolma manomba Debata. Jala sintua ni malim i ma na mamelehon silehon-lehon dohot pelean alani dosa ni angka jolma.  Boi do ibana marasi ni roha* tu angka halak na hurang parbinotoan, dohot tu halak na mangulahon na sala, ai ibana sandiri pe adong do hagaleonna.  Alani i, ingkon pelehononna do pelean tu dosana sandiri, songon pelean na binahenna tu dosa ni bangso i.  Ndang adong jolma na boi mandapot hasangapon sisongon i alani lomo ni rohana sandiri, alai ingkon Debata do na mamillit ibana, songon na masa tu si Aron.  Songon i ma nang Kristus, ndang na pasangaphon dirina ibana umbahen na gabe sintua ni malim. Alai Debata do na pasangaphon ibana. Ai adong do tarsurat, didok Debata tu ibana, “Anakku do ho; mulai sadari on amangmu ma ahu.”  Jala didok do di ayat na asing, “Ho do malim na saleleng ni lelengna na songon si Melkisedek.”  Tingki mangolu Jesus di portibi on,* dipasahat ibana do tangiangna dohot pangidoanna marhite angguk-angguk dohot ilu-ilu tu Debata, na boi paluahon ibana sian hamatean. Jala ditangihon do tangiangna, ala dihabiari ibana do Debata.  Nang pe anak ni Debata ibana, marsiajar mangoloi do ibana sian sitaonon na masa tu ibana.  Dung sun denggan ibana, gabe dalan haluaon na saleleng ni lelengna ma ibana tu sude na mangoloi ibana. 10  Ai nunga dipillit Debata ibana gabe sintua ni malim songon si Melkisedek. 11  Godang dope na naeng sipaboaonnami tu hamu taringot tu Kristus. Alai maol do i patorangon, ai lambat do hamu mangantusi.* 12  Ai mangihuthon lelengna nian,* nunga boi hamu gabe guru. Hape porlu dope hamu diajari taringot tu ajaran na parjolo sian hata ni Debata. Jala ingkon susu dope inumonmuna, ndang tarpangan hamu dope sipanganon na karas. 13  Angka halak na ingkon susu dope inumonna, dakdanak dope i. Ndang diboto i dope dia na sintong dohot na so sintong. 14  Alai sipanganon na karas, sipanganon ni halak na magodang do i, i ma halak na tongtong mamangke pangantusionna* asa tarlatik ibana laho mamboto dia na sintong dohot na sala.

Surat na di toru

Manang “lambok”.
As. “Tingki gabe jolma ibana”.
Manang “manangihon”.
Manang “Sasintongna”.
Manang “pingkiranna”.