Heber 4:1-16

  • Manat ma asa unang adong na so masuk tu ari paradianan ni Debata (1-10)

  • Angka poda asa boi masuk tu ari paradianan ni Debata (11-13)

    • Mangolu do hata ni Debata (12)

  • Jesus do sintua ni malim na bolon (14-16)

4  Ala dijanjihon Debata do tu hita, na boi dope hita masuk tu ari paradiananna i, manat ma hita asa unang adong sian hita na so boi masuk tusi.  Ai tu hita pe, dibaritahon do barita na uli songon na tu nasida i. Alai ndang songon haporseaon ni halak na manangihon i haporseaon ni nasida, gabe ndang marlapatan barita i di nasida.  Alai masuk do hita tu ari paradiananna i, ai tapatudu do haporseaonta. Taringot tu halak na so manangihon i, didok Debata do, “Tarrimas ma Ahu jala marsumpa, ‘Ndang boi nasida masuk tu ari paradiananki,’” nang pe nunga sae sude ulaon ni Debata mulai sian parmulaan ni portibi on.*  Ai didok Ibana do di sada ayat taringot tu ari papituhon i, “Maradi ma Debata di ari papituhon sian sude ulaonna.”  Jala didok Debata do muse, “Ndang boi nasida masuk tu ari paradiananki.”  Angka na parjolo mambege barita na uli i ndang boi masuk tu ari paradianan i, ala mangalo do nasida. Alai adong dope deba na boi masuk tusi.  Dung manang na sadia leleng, ditontuhon Debata ma muse ari na digoari “Sadari on” di psalmen ni si Daud, songon naung didok di surat on, “Sadari on, molo dibege hamu soarangku, unang ma pajogal hamu rohamuna.”  Ai molo nunga diboan si Josua bangso i masuk tu inganan paradianan i, ndang paboaon ni Debata be taringot tu ari na asing dungkon i.  Alani i, adong dope ari paradianan na songon ari sabbat tu naposo ni Debata. 10  Ai manang ise naung masuk tu ari paradianan ni Debata, nunga maradi ibana sian ulaonna sandiri, songon Debata naung maradi sian ulaonna. 11  Alani i, tabahen ma sian nasa gogonta asa boi hita masuk tu ari paradianan i. Asa unang adong sian hita na mangihuthon halak na so mangoloi i. 12  Ai mangolu do hata ni Debata jala marhuaso. Umtajom do i sian podang sidua baba. Boi do i manusuk jala manirang hosa sian daging, sumsum sian holi-holi. Jala boi patuduhon na adong di roha dohot na adong di pingkiranta. 13  Ai ndang adong na tinompa ni Debata na buni sian Ibana. Sude do patar jala bungka di jolo ni Debata na manguhumi hita hombar tu parniulaonta. 14  Ala nunga adong sintua ni malimta na bolon, i ma Jesus Anak ni Debata naung masuk tu surgo, tongtong ma tabaritahon haporseaonta taringot tu ibana. 15  Diantusi sintua ni malimta i do hagaleonta, ai nunga hea ibana manaon sude hasusaan ni jolma, alai ndang mardosa ibana. 16  Alani i, tapajonok ma dirinta tu habangsa ni Debata na patuduhon asi ni roha na mansai balga jala pos ma rohanta martangiang tu Ibana. Dung i tahilala ma asi ni rohana dohot haburjuonna* na mangurupi hita di tingki na tahaporluhon.

Surat na di toru

Ida surat na di toru na di 1 Petrus 1:20.
Manang “asi ni roha na mansai balga”. Ida di Kamus.