Heber 2:1-18

  • Lam marsitutu ma hita mamparrohahon (1-4)

  • Sude do dibahen tunduk tu Jesus (5-9)

  • Jesus dohot angka haha anggina (10-18)

    • Pamimpin ni haluaon ni nasida (10)

    • Sintua ni malim na marasi ni roha (17)

2  Alani i do ingkon lam marsitutu hita mamparrohahon angka naung tabege, asa unang maup hita.  Ai molo tutu do masa hata na dipasahat marhite suru-suruan, jala jaloon ni halak na so mangulahon dohot na mangalanggar patik i panguhuman na patut jaloonna,  songon dia ma hita boi malua molo ndang taparrohahon haluaon i? Ai Tuanta i sandiri do na parjolo paboahon haluaon i, jala angka na mambege i ma na paposhon rohanta taringot tusi.  Laos dohot do Debata paposhon rohanta marhite angka tanda halongangan* dohot marhite tondi parbadia na nilehonna hombar tu lomo ni rohana.  Ai ndang suru-suruan dibahen Debata mamarenta tano on di ari na naeng ro, i ma tano na tahatai saonari.  Alai adong do sahalak saksi na hea mandok, “Aha ma huroha jolma i, umbahen na diingot Ho ibana? Jala aha ma anak ni jolma i, umbahen na diparrohahon Ho ibana?  Dibahen Ho do ibana umtoru sian angka suru-suruan, dilehon Ho do hamuliaon dohot hasangapon tu ibana, jala dipillit Ho do ibana marhuaso tu angka na tinompam.  Sude do dibahen Ho tunduk tu toru ni patna.” Ala nunga dibahen Debata ibana mangarajai sudena i, ndang adong be na so dipatunduk tu ibana. Tutu, ndang taida dope saonari naung dirajai ibana sudena i.  Nang pe najolo dibahen do ibana umtoru sian angka suru-suruan, alai saonari taida do Jesus manjalo hasangapon dohot hamuliaon ala nunga marsitaonon sahat tu na mate. Jala alani asi ni roha ni Debata na mansai balga i, mate do ibana humongkop sude jolma. 10  Tu hamuliaon ni Debata do nasa na adong jala marhite Ibana do adong sudena i. Tama do bahenon ni Debata sun denggan Pamimpin ni haluaon ni nasida i marhite sitaonon, asa boi angka anakna i manjalo hamuliaon. Ai dipalua Debata do nasida marhite Pamimpin i. 11  Sada do Ama ni Jesus dohot Ama ni angka na dipabadia i. Alani i, ndang maila ibana mandok nasida angka haha anggina, 12  ai didok ibana do, “Baritahononku do goarmu tu angka haha anggingku, jala marende do ahu mamuji Ho di tonga-tonga ni punguan i.” 13  Didok do muse, “Tu Ibana do ahu marhaposan.” Jala didok do muse, “Ida ma! Dison do ahu rap dohot angka dakdanak na nilehon ni Jahowa tu ahu.” 14  Ala jolma* do “angka dakdanak” i gabe jolma ma ibana, asa marhite hamamatena, ripashononna ma Sibolis na parohon hamatean i. 15  Paluaonna ma sude halak na mabiar tu hamatean, i ma angka halak na diparhatoban biar ni roha tu hamatean saleleng ngolu ni nasida. 16  Pinompar ni si Abraham do na niurupanna, ndang angka suru-suruan. 17  Alani i, ingkon dos do ibana dohot “angka haha anggina” di saluhutna, asa boi ibana gabe sintua ni malim na marasi ni roha jala na marsihohot marhobas tu Debata. Jala lehononna ma pelean na mambahen jolma mardame tu Debata.* 18  Ai nunga hea ibana marsitaonon tingki diuji. Alani i boi do urupanna angka halak na marsitaonon alani pangunjunan.

Surat na di toru

Manang “mukjizat”.
As. “daging dohot mudar”.
Manang “na manesa dosa ni sude jolma”.