Galatia 5:1-26

  • Haluaon na dihilala halak Kristen (1-15)

  • Mangihuthon tondi parbadia (16-26)

    • Parulaon ni daging (19-21)

    • Parbue ni tondi parbadia (22, 23)

5  Nunga malua hita, ai nunga dipalua Kristus i hita. Alani i, hot ma hamu jongjong unang be olo hamu dipatunduk songon hatoban.  Ahu si Paulus mandok tu hamu, molo naeng disunat hamu, ndang marlapatan be Kristus i di hamu.  Sahali nai hupaingot ma sude halak na naeng disunat, ingkon ulahononna do saluhut Patik i.  Molo naeng mangulahon na sintong do hamu marhite patik i, nunga dao hamu sian Kristus jala nunga mandao hamu sian asi ni rohana na mansai balga i.  Alai anggo hita, mangkirim do hita mangulahon na sintong marhite tondi parbadia binahen ni haporseaonta.  Di angka halak na marsada dohot Kristus Jesus, ndang ringkot disunat manang na ndang. Alai na rumingkot haporseaon na dipatudu marhite holong i.  Nunga denggan naung diulahon hamu saleleng on.* Antong ise do na mangambati hamu mangihuthon hasintongan i?  Ndang sian Debata na manjou hamu ro pangajarion sisongon i.  Saotik pe ragi boi do mambahen kambang sabaskom adonan. 10  Pos do rohangku tu hamu na marsada dohot Tuan i, na dos do pangantusionta. Alai manang ise pe na manggugai hamu, jaloonna do panguhuman na patut di ibana. 11  Songon ahu ma angka dongan, molo hubaritahon dope taringot tu sunat, boasa sai ro paraloan tu ahu? Ai molo hubaritahon dope taringot tu sunat, ndang adong be na tartuktuk alani hau partinaonan i.* 12  Tu halak na manggugai hamu, tumagon ma dikasin nasida dirina be.* 13  Hamu angka dongan, nunga tarjou hamu asa malua. Unang ma bahen hamu haluaonmuna i gabe sidalianmuna mangulahon hisap-hisap ni daging. Alai marhobas jala masiurupan ma hamu marhite holong. 14  Ai nunga digohi sude Patik i di sada parenta, na mandok, “Ingkon haholonganmu do donganmu jolma doshon dirim.” 15  Molo masiharatan jala masiallangan hamu, jaga ma hamu, so tung masipasudaan hamu. 16  Alai hudok ma tu hamu, tongtong ma ihuthon hamu tondi parbadia asa unang diulahon hamu hisap-hisap ni daging i. 17  Maralo do hisap-hisap ni daging tu na dihalomohon ni tondi parbadia, jala maralo do tondi parbadia tu daging. Alani i, ndang boi be ulahononmu lomo ni rohamuna, ai maralo do na dua i. 18  Asing ni i, molo tondi parbadia do na manogu-nogu hamu, ndang patik i be na mangatur hamu. 19  Alai tangkas do tarida parniulaon ni daging, i ma seks na so patut,* ulaon na ramun,* ulaon ni halak na so umboto ila,* 20  manomba gana-ganaan, mardatu,* marmusu, marbada, mangiburu, muruk-muruk, marsalisi, mamola-mola, sekte-sekte, 21  late ni roha, mabuk, marpestai sahat tu na mabuk,* dohot angka ulaon na songon i. Songon naung hupasingot tu hamu, pasingotonku ma hamu muse, ndang parsidohot tu Harajaon ni Debata halak na mangulahon sisongon i. 22  Alai parbue ni tondi parbadia, i ma holong, las ni roha, dame, sabar,* haburjuon, pangalaho na denggan, haporseaon, 23  lambok ni roha, dohot mangorom diri. Ndang adong patik na maralo tusi. 24  Manang ise na gabe sisean ni Kristus Jesus, nunga dipamate* nasida sude angka giot-giot dohot hisap-hisap ni dagingna. 25  Molo taihuthon do panogu-noguon ni tondi parbadia di parngoluonta, taulahon ma hombar tu panogu-noguon ni tondi parbadia i. 26  Tapasiding ma parange ginjang ni roha, ndang olo talu, dohot masilatean.

Surat na di toru

As. “Nunga denggan parlojongmuna”.
Ida di Kamus.
Gabe ndang tama be nasida mangulahon patik na diihuthon nasida.
Manang “parmainanon”. Di bahasa Junani porneia. Ida di Kamus.
Ida di Kamus.
Di bahasa Junani aselgeia. Ida di Kamus.
Ida di Kamus.
Mabuk jala mangulahon ulaon na rorang.
Manang “lambas ni roha”.
As. “dipakkuhon tu hau”.