Epesus 3:1-21

  • Dohot do na so Jahudi tu rahasia na badia (1-13)

    • Jaloon ni halak na so Jahudi ma na songon dijalo Kristus (6)

    • Sangkap ni Debata na saleleng ni lelengna (11)

  • Manangiangkon halak na di Epesus asa mangulahon hombar tu parbinotoan ni nasida (14-21)

3  Ahu si Paulus, dipenjarahon alani Kristus Jesus, humongkop hamu na sian bangso na asing.  Tontu nunga dibege hamu naung hujalo tanggung jawab laho mangurupi hamu asa mandapot laba sian asi ni roha ni Debata na mansai balga i.  Marhite pangungkapon do dipaboa tu ahu rahasia na badia i, songon naung hutaringoti nangkin saotik.  Alani i molo dung dijaha hamu surat on, botoonmuna ma naung huantusi rahasia na badia taringot tu Kristus i.  Najolo, ndang dipaboa rahasia i tu angka jolma. Alai saonari, nunga dipaboa i marhite tondi parbadia tu angka apostelna na badia dohot tu angka panurirang.  On ma rahasia i: Jaloon ni angka halak na so Jahudi ma songon naung dijalo Kristus Jesus i, ala marsada nasida dohot ibana jala gabe sada punguan* ma nasida. Jaloon ni nasida ma baga-baga songon naung dijanjihon Debata tu hita alani barita na uli.  Ahu do na mangurupi hamu mangantusi rahasia na badia na hombar tu asi ni roha ni Debata na mansai balga i. Dilehon ibana do tu ahu silehon-lehon on laho patuduhon huasona.  Ahu ma na ummetmet sian sude angka na badia. Alai tu ahu do dilehon asi ni roha na mansai balga i. Alani i ma hupaboa tu angka bangso barita na uli taringot tu pasu-pasu na mansai balga na sian Kristus i.  Jala marhite ahu, sude ma jolma mamboto songon dia Debata na manompa saluhutna, pasauthon rahasia na badia naung leleng ditabunihon Ibana.* 10  Jala marhite huria, gabe diboto angka pamarenta dohot angka parhuaso na di banua ginjang i ma bisuk ni Debata na dipatuduhon sian marragam cara. 11  Hombar do on tu sangkap ni Debata na saleleng ni lelengna na laho pasautonna marhite Kristus Jesus Tuanta i. 12  Ala porsea hita tu Jesus, gabe pos ma rohanta martangiang tu Debata jala ndang ganggu be rohanta paboahon taringot tu ibana tu angka halak. 13  Alani i, hupangido ma asa unang marmetmet ni roha hamu alani hasusaan na hutaon humongkop hamu. Ai gabe sangap do hamu dibahen i. 14  Alani i ma ahu marsomba tu Ama i. 15  Ai alani Ibana do umbahen na adong sude keluarga na di surgo dohot na di tano on. 16  Martangiang do ahu tu Debata na marmulia i asa anggiat dipatogu rohamuna marhite tondi parbadiana, 17  jala marhite haporseaonmuna, anggiat ma maringanan Kristus i di rohamuna di bagasan holong. Anggiat ma togu jala marsihohot hamu di ginjang ni fondasi ni haporseaonmuna 18  asa songon sude angka na badia i, tangkas ma botoonmuna bidangna, ganjangna, timbona dohot bagas ni parbinotoan taringot tu Debata. 19  Jala asa diboto hamu holong ni Kristus na tumimbo sian sude parbinotoan. Dung i gabe adong ma di hamu sude parange ni Debata na tajalo sian Ibana. 20  Marhite huaso ni Debata na mangula di bagasan dirinta, bahenonna do gumodang sian na tapangido dohot na tapingkiri. 21  Di Ibana ma hasangapon na saleleng ni lelengna marhite huria dohot Kristus Jesus. Amen.

Surat na di toru

Manang “sada daging”.
As. “buni di bagasan Debata”.