2 Tessalonik 2:1-17

  • Halak na mangalo patik ni Debata (1-12)

  • Poda asa tongtong togu (13-17)

2  Alai angka dongan, taringot tu haroro ni Tuanta Jesus Kristus dohot taringot tu andigan hita pungu rap dohot ibana, hupangido hami ma tu hamu,  asa unang pintor guga pingkiranmuna manang ganggu rohamuna ala adong na mandok naung ro ari ni Jahowa i. Unang ma ganggu rohamuna, nang pe didok nasida barita i sian Debata, manang dibege hamu i sian sasahalak manang dijaha hamu i marhite surat na didok sian hami.  Unang olo hamu dililuhon* marhite manang aha pe. Ai andorang so ro ari i, parjolo do ro halak na marbalik mangalo hasintongan* i dohot halak na mangalo patik ni Debata, i ma jolma naung ditontuhon tu hamagoan.  Pangalo do ibana, dibahen do dirina tumimbo sian sude debata manang sian sude sisombaon. Ujungna, hundul ma ibana di joro ni Debata jala dipatuduhon ibana ma dirina di jolo ni natorop na ibana do debata.  Na so diingot hamu do naung hupaboa angka i tu hamu tingki rap dope ahu dohot hamu?  Jala saonari nunga diboto hamu ise na mangambati asa unang tarida halak na jahat i andorang so dapot dope tingkina.  Tutu, nunga diulahon ibana hajahaton i. Alai buni dope ulaonna i sahat tu na mate sude na mangambati i.  Dung pe i asa tarida halak na mangalo patik ni Debata i. Alai bunuon ni Jesus ma ibana marhite huaso na kaluar sian pamanganna* jala pasudaonna ma ibana di na patar ari haroro ni Tuan i.  Alai ro ma halak na mangalo patik ni Debata marhite huaso ni Sibolis.* Bahenonna ma tanda halongangan* na mangaliluhon, 10  dohot sude ragam ni hajahaton na paoto-otohon angka halak na laho tu hamagoan. Ai laho tu hamagoan do nasida, ala ndang dijalo jala ndang dihaholongi nasida hasintongan na parohon haluaon i. 11  Alani i do dipasombu Debata nasida dililuhon. Ujungna, porsea ma nasida tu angka gabus. 12  Hona uhum ma nasida sude. Ai dihalomohon nasida do hajahaton jala ndang dihaporseai nasida hasintongan. 13  Hamu angka dongan na hinaholongan ni Jahowa, ingkon mandok mauliate do hami tu Debata alani hamu. Ai nunga dipillit Debata hamu sian mulana tu haluaon. Dipabadia do hamu marhite tondi parbadia ala porsea do hamu tu hasintongan i. 14  Dijou Debata do hamu marhite barita na uli na hubaritahon hami tu hamu. Gabe dohot ma hamu mandapot hasangapon songon Tuanta Jesus Kristus. 15  Alani i ale angka dongan, togu ma hamu jala tongtong ma ihuthon hamu angka naung huajarhon hami tu hamu marhite na binegemuna sian hami manang marhite suratnami. 16  Sai anggiat ma Tuanta Jesus Kristus dohot Debata Ama i, na mangkaholongi hita, na tongtong mangapuli hita jala na mangalehon pangkirimon na sintong alani asi ni rohana na mansai balga, 17  mangapuli rohamuna jala mambahen hamu togu, asa boi hamu tongtong mangulahon jala mangkatahon angka na denggan.

Surat na di toru

Manang “diela-ela”.
As. “na manimbil”.
As. “hosa na kaluar sian pamanganna”.
As. “Setan”. Ida di Kamus.
Manang “mukjizat”.