2 Johannes 1:1-13

  • Hata pamungka (1-3)

  • Tongtong mardalan di bagasan hasintongan (4-6)

  • Manat ma tu angka panipu (7-11)

    • Unang pangkulingi (10, 11)

  • Marsangkap laho manjumpangi muse jala pasahathon tabe (12, 13)

1  Sian sintua.* Mandapothon ina na tarpillit dohot angka anakkonna, angka na huhaholongi situtu. Alai ndang holan ahu, dohot do sude na mananda hasintongan i,  ala tongtong do hasintongan i di bagasan hita jala dongananna do hita saleleng ni lelengna.  Didongani haburjuon,* asi ni roha, dohot hadameon na sian Debata Ama i dohot na sian Jesus Kristus Anak ni Ama i ma hita, di bagasan hasintongan dohot holong.  Mansai las do rohangku ala huida do deba sian anakkonmu mardalan di bagasan hasintongan, songon parenta na tajalo sian Ama i.  Saonari, hupangido ma tu ho inang asa masihaholongan hita. Ndang parenta na imbaru na husurat on tu ho, parenta naung adong hian do i di hita sian mulana i.  On do parenta songon naung binegemuna sian mulana: Tongtong ma patuduhon holong. Molo taihuthon angka parentana, i ma holong i.  Nunga godang angka panipu ro tu portibi on. Ndang diakkui nasida Jesus Kristus ro tu tano on gabe jolma. Panipu do nasida jala antikristus.  Manat ma hamu, asa unang mago naung huulahon hami tu hamu. Alai asa dapotmuna do sude pasu-pasu naung pinarade ni Debata tu hamu.  Manang ise na so hot di ajaran ni Kristus jala kaluar sian i, ndang ditanda ibana Debata. Alai manang ise na tongtong di ajaran ni Kristus, ditanda ibana do Ama dohot Anak i. 10  Molo adong na ro tu hamu halak na so mamboan ajaran ni Kristus, unang ma jalo hamu ibana di jabumuna jala unang pangkulingi hamu ibana. 11  Ai manang ise na mamangkulingi ibana, parsidohot do ibana tu ulaonna na jahat i. 12  Godang do nian na naeng husurat tu hamu, alai ndang bahenonku i marhite harotas dohot tinta. Hirim do rohangku naeng pajumpang jala mangkatai dohot hamu, asa gok las ni rohamuna. 13  Sahat ma tu ho tabe ni angka anak ni angkangmu na tarpillit i.

Surat na di toru

Manang “sahalak na matua”.
Manang “asi ni roha na mansai balga”. Ida di Kamus.