1 Timoteus 1:1-20

  • Hata pamungka (1, 2)

  • Sipasingot taringot tu angka halak na mangajarhon ajaran na sala (3-11)

  • Dipatuduhon do asi ni roha na mansai balga tu si Paulus (12-16)

  • Raja na manongtong (17)

  • ‘Ulahon ma na denggan sian nasa gogom’ (18-20)

1  Sian si Paulus na gabe apostel ni Kristus Jesus, mangihuthon parenta ni Debata Sipalua hita dohot mangihuthon parenta ni Kristus Jesus pangkirimonta i,  mandapothon si Timoteus* anakku na tutu di bagasan haporseaon. Anggiat ma dipatuduhon tu ho haburjuon,* asi ni roha, dohot hadameon na sian Debata Ama i dohot sian Kristus Jesus Tuanta i.  Songon naung hea hudok tu ho di tingki naeng borhat ahu tu Makedonia, hupangido ma muse tu ho asa tinggal ho di Epesus laho pasingothon angka halak na mangajarhon ajaran na sala,  nang halak na mangalehon rohana tu angka cerita na so tutu dohot tu angka tarombo. Holan parohon parsalisian do i jala ndang marguna. Ai ndang ro sian Debata angka i jala ndang boi i patoguhon haporseaon.  Sasintongna, hubahen pe sipaingot on asa adong do di hamu holong na sian roha na ias, sian panggora ni roha na denggan dohot sian haporseaon na tarida marhite parniulaon.  Alai na deba, ndang diulahon be angka i, gabe diihuthon nasida ma pangkataion na so marguna.  Naeng do nasida gabe guru na mangajarhon patik, alai ndang diantusi nasida na diajarhon dohot na dipartahanhon ni nasida i.  Alai taboto do, denggan do Patik i molo diulahon sude.  Ingot ma, dibahen pe patik i ndang tu halak na mangulahon na sintong. Alai dibahen do i tu halak na so olo mangoloi dohot tu pangalo, tu halak na so pasangaphon Debata dohot tu halak pardosa, tu halak na so marsihohot dohot tu halak na so manjalo angka na badia, tu sibunu amangna, inangna, manang halak na asing. 10  Dibahen do i nang tu halak na mangulahon seks na so patut,* tu baoa na mangulahon seks dohot baoa, tu panangko, tu pargabus, tu na so pasauthon sumpana,* dohot tu halak na mangulahon angka na maralo tu ajaran na sintong. 11  Ajaran na sintong i hombar do tu barita na uli na marmulia, na sian Debata na marlas ni roha i naung dipasahat tu ahu. 12  Mandok mauliate do ahu tu Tuanta Kristus Jesus na mangalehon gogo tu ahu. Dipillit ibana do ahu gabe parhobasna, ai diboto do na marsihohot ahu. 13  Hape ginjang do rohangku najolo, huleai do Debata jala hulelei naposona. Alai dipatuduhon do asi ni rohana tu ahu, ai huulahon pe i andorang so porsea do ahu jala ndang huboto na huulahon i. 14  Alai diusehon Tuhanta* do asi ni roha na mansai balga i tu ahu. Dilehon do nang haporseaon dohot holong na di bagasan Kristus Jesus. 15  Sintong jala boi do tahaporseai saluhut hata on: Ro do Kristus Jesus tu portibi on laho paluahon angka pardosa. Sian angka pardosa i, dosangku ma na gumodang. 16  Alai nang pe songon i, asi do roha ni Kristus Jesus tu ahu. Asa marhite ahu, boi ma patuduhononna hasabaronna. Dibahen ibana do ahu gabe sitiruon tu angka halak na naeng porsea tu ibana laho mandapot hangoluan saleleng ni lelengna. 17  Hasangapon dohot hamuliaon na saleleng ni lelengna ma di Raja na manongtong, na so boi mate, na so tarida, i ma Debata na sasada i! Amen. 18  Hupasahat do sipaingot on tu ho Timoteus anakku, mangihuthon angka surirang taringot tu ho. Asa marhite sipaingot i, tongtong ma ulahononmu na denggan sian nasa gogom, 19  huhut mampartahanhon haporseaon dohot panggora ni roha na denggan. Adong do deba na manadingkon angka i na mambahen sega haporseaon ni nasida. 20  Sian tonga-tonga ni nasida, i ma si Himeneus dohot si Aleksander naung hupasahat tu Sibolis,* asa unang dileai nasida be Debata.

Surat na di toru

Lapatanna, sahalak na pasangaphon Debata.
Manang “asi ni roha na mansai balga”. Ida di Kamus.
Manang “parmainanon”. Di bahasa Junani porneia. Ida di Kamus.
Manang “siose padan”.
Di bahasa Junani Kyrios. Ida di Kamus.
As. “Setan”. Ida di Kamus.