1 Tessalonik 3:1-13

  • Si Paulus paimahon di Atena (1-5)

  • Si Timoteus mamboan barita na denggan (6-10)

  • Manangiangkon halak Tessalonik (11-13)

3  Ala ndang sabar be hami mamboto baritamuna, didok rohanami dumenggan ma hami tinggal di kota Atena.  Dung i, husuru hami ma si Timoteus, donganta jala naposo ni Debata, na mamaritahon barita na uli taringot tu Kristus, laho patoguhon haporseaonmuna jala mangapuli hamu.  Asa unang adong sian hamu na gale haporseaonna alani angka hasusaan i. Ai diboto hamu do na ingkon masa do i tu hita.  Tingki rap dope hami dohot hamu, nunga dipaboa hami tu hamu na laho masa angka hasusaan tu hita. Jala tutu do i masa songon na binotomuna.  Ala ndang sabar be ahu laho mamboto baritamuna, husuru ma si Timoteus mandapothon hamu, asa huboto songon dia togu ni haporseaonmuna. Ai mabiar do ahu, atik boha naung diela-ela Sibolis hamu, gabe marisuang halojaonnami.  Alai saonari nunga mulak be si Timoteus tu hami. Diboan ibana do barita na denggan taringot tu haporseaon dohot holong ni rohamuna. Dipaboa ibana do tu hami na tongtong do diingot hamu hami, jala masihol do hamu naeng pajumpang dohot hami songon sihol ni rohanami naeng pajumpang dohot hamu.  Alani i angka dongan, tarapul do rohanami di sude sitaonon dohot hasusaannami, ala togu do haporseaonmuna tu Debata.  Lam togu* ma hami muse molo marsihohot do hamu mangihuthon Tuan i.  Mandok mauliate do hami tu Debata alani hamu. Ai las situtu do rohanami dibahen hamu. 10  Arian nang borngin, marsitutu do hami martangiang asa boi pajumpang dohot hamu. Asa boi hulehon hami na porlu tu hamu laho patoguhon haporseaonmuna. 11  Sai anggiat ma dilehon Debata Ama i dohot Tuanta Jesus dalan di hami laho pajumpang dohot hamu. 12  Sai anggiat ma lam ditambai Tuan i holong ni rohamuna sama hamu dohot holongmuna tu halak na asing, songon balga ni holong ni rohanami tu hamu. 13  Dung i gabe togu ma rohamuna, sun denggan jala badia hamu di jolo ni Debata di haroro ni Tuan Jesus dohot angka na badiana.

Surat na di toru

As. “Mangolu”.