1 Korint 6:1-20

  • Angka dongan mamboan parsoalanna tu pengadilan (1-8)

  • Halak na so adong parbagiananna di Harajaon ni Debata (9-11)

  • Pangke hamu ma dagingmuna pasangaphon Debata (12-20)

    • “Padao hamu ma dirimuna sian ulaon seks na so patut!” (18)

6  Molo adong na marsalisi di tonga-tongamuna, boasa ndang boanonmuna parsoalan i tu jolo ni angka na badia? Boasa barani hamu laho tu pengadilan asa gabe halak na so mangulahon patik ni Debata na manguhumi hamu?  Ai ndang diboto hamu, angka na badia i do na laho manguhumi portibi on? Ai molo hamu do na laho manguhumi portibi on, nda boi ma nian hamu manguhumi parsoalan na gelleng sisongon i?  Ai na so diboto hamu do hita na laho manguhumi suru-suruan? Antong molo songon i, boasa ndang boi hamu manguhumi parsoalan na somal masa di parngoluon on?  Molo adong parsoalan di parngoluonmuna sisaonari on na porlu diuhumi, pillitonmuna do halak na lea* diida huria laho manguhumi parsoalanmuna i?  Hudok pe songon i asa maila do hamu. Ai na so adong do di tonga-tongamuna na marbisuk, na boi manguhumi parsoalan ni angka dongan sahaporseaon?  Hape, laho do hamu tu pengadilan mangalo dongan sahaporseaonmuna di jolo ni halak na so mangulahon patik ni Debata!  Sasintongna, nunga talu hamu molo diboan hamu parsoalanmuna tu pengadilan. Boasa ndang sabar hamu tingki adong donganmuna mambahen na jahat tu hamu? Nda dumenggan do pasombuonmuna buaton ni donganmuna i na adong di hamu?  Hape hamu sandiri do na mambahen na jahat tu donganmuna jala na mambuat na adong di donganmuna i!  Ndang diboto hamu, na so adong parbagianan ni halak na so mangulahon na sintong di Harajaon ni Debata? Unang hamu lilu. Halak na mangulahon seks na so patut,* na manomba gana-ganaan, na mangalangkup, baoa na olo ditogihon mangulahon seks dohot baoa, baoa na mangulahon seks dohot baoa, 10  panangko, na hisap,* parmabuk, pangaleai, dohot pangarampok ndang adong parbagiananna di Harajaon ni Debata. 11  Adong do deba sian hamu na songon i pangalahona najolo. Alai di bagasan goar ni Tuan Jesus Kristus dohot marhite tondi parbadia, nunga dipaias, dipabadia, jala didok hamu mangulahon na sintong. 12  Boi do ahu* mangulahon manang aha pe, alai ndang sude marguna. Nang pe boi sude huulahon, alai ndang olo ahu gabe hatoban ni* manang aha pe. 13  Laho tu butuha do sipanganon jala butuha i laho tu sipanganon. Alai, paujungon ni Debata do na dua i. Ndang tu ulaon seks na so patut* pangkeon daging i, alai daging i pangkeon mangulahon ulaon ni Tuan i. Jala diparade Tuan i do na ringkot tu daging i. 14  Alai dipahehe Debata do Tuan i sian na mate jala paheheonna do hita sian hamatean marhite huasona. 15  Na so diboto hamu do dagingmuna i ruas ni daging ni Kristus? Ingkon buatonku ma ruas ni daging ni Kristus jala padomuonku i tu boru-boru na so hasea? Ndang boi i! 16  Na so diboto hamu do, manang ise na mangulahon seks dohot boru-boru na so hasea, naung gabe sada ibana dohot boru-boru i? Ai didok na tarsurat i do, “Gabe sada ma nasida na dua.” 17  Alai manang ise na marsada dohot Tuan i, gabe sapingkiran* ma ibana dohot Tuan i. 18  Padao hamu ma dirimuna* sian ulaon seks na so patut!* Sude dosa na asing na niulahon ni sasahalak diulahon do i di luar ni dagingna. Alai halak na mangulahon seks na so patut, mangulahon dosa tu dagingna sandiri. 19  Na so diboto hamu do? Dagingmuna i do joro ni tondi parbadia na jinalomuna sian Debata, na maringanan di hamu. Asing ni i, ndang hamu sandiri nampuna hamu, alai Debata do. 20  Ai arga do hamu dituhor Debata. Alani i, pangke hamu ma dagingmuna pasangaphon Debata.

Surat na di toru

Manang “na so tama”.
Manang “parmainanon”. Di bahasa Junani porneia. Ida di Kamus.
Na nidokna dison, i ma hisap di arta, tu hasangapon, dohot tu seks.
Manang “Mangihuthon uhum diloas do ahu”.
Manang “gabe dirajai”.
Manang “parmainanon”. Di bahasa Junani porneia. Ida di Kamus.
Bahasa Junani pneuma. Ida di Kamus.
Manang “Lari ma hamu”.
Manang “parmainanon”. Di bahasa Junani porneia. Ida di Kamus.