1 Johannes 4:1-21

  • Uji ma angka surirang (1-6)

  • Mananda jala mangkaholongi Debata (7-21)

    • “Holong do Debata” (8, 16)

    • Ndang adong biar di bagasan holong (18)

4  Hamu angka dongan na hinaholongan, unang ma porsea hamu tu sude surirang. Alai uji* hamu ma manang na sian Debata angka surirang i. Ai godang do saonari panurirang na so tutu* di portibi on.  Sian on ma botoonmuna molo surirang i sian Debata: Sude surirang na paboahon naung ro Jesus Kristus tu tano on gabe jolma, sian Debata do surirang i.  Alai sude surirang na so paboahon taringot tu Jesus, ndang sian Debata i. Surirang ni antikristus do i. Nunga dibege hamu na naeng ro nama i, jala nunga di portibi on i saonari.  Hamu angka anakkonku, sian Debata do hamu jala nunga ditaluhon hamu angka panurirang na so tutu.* Ai umbalga do Ibana na marsada dohot hamu sian ibana na marsada dohot portibi on.  Sian portibi on do angka panurirang na so tutu* i. Alani i, angka na di portibi on do dihatahon nasida jala ditangihon portibi on do nasida.  Sian Debata do hita. Manang ise na mananda Debata tangihononna do hita. Alai manang ise na so sian Debata, ndang tangihononna hita. Sian on ma taboto surirang i sintong manang na sala.  Hamu angka dongan na hinaholongan, tongtong ma hita masihaholongan. Ai sian Debata do holong i, jala ganup na marholong ni roha, anak ni Debata do i jala ditanda ibana do Debata.  Manang ise na so marholong ni roha, ndang ditanda ibana Debata, ai holong do Debata.*  Marhite on do Debata patuduhon holongna tu hita: Disuru Ibana do Anakna na sasada i tu portibi on asa boi hita mandapot hangoluan marhite ibana. 10  On do holong i: Disuru Debata do Anakna i gabe pelean pardamean tu angka dosanta, ndang alani na tahaholongi Debata, alai alani holongna do tu hita. 11  Hamu angka dongan na hinaholongan, molo songon on do holong ni roha ni Debata tu hita, ingkon masihaholongan ma nang hita. 12  Ndang adong naung hea mangida Debata. Alai molo tongtong hita masihaholongan, tongtong ma Debata di bagasan hita, jala gok ma holong ni rohana i di bagasan hita. 13  Marhite on do taboto na tongtong hita marsada dohot Ibana jala Ibana marsada dohot hita, ai dilehon Ibana do tondi parbadiana tu hita. 14  Asing ni i, nunga huida hami jala nunga hupaboa hami, naung disuru Ama i do Anakna gabe sipalua ni portibi on. 15  Manang ise na mangakkui Jesus i Anak ni Debata, tongtong ma Debata marsada dohot ibana jala ibana marsada dohot Debata. 16  Nunga taboto jala nunga tahaporseai na holong do roha ni Debata tu hita. Holong do Debata.* Manang ise na tongtong patuduhon holong ni roha, tongtong ma ibana marsada dohot Debata, jala Debata tongtong marsada dohot ibana. 17  Songon i ma gabe gok holong ni roha i di bagasan hita. Alani i, ndang mabiar be hita mangkatai di ari panguhuman. Ai songon ibana, songon i do nang hita di portibi on. 18  Ndang adong biar di bagasan holong. Ai dipadao holong ni roha na gok i do biar ni roha. Dirajai biar ni roha do hita. Alai sasintongna, ndang gok dope holong ni roha ni halak parbiar. 19  Marholong ni roha do hita ala parjolo do Debata mangkaholongi hita. 20  Molo adong na mandok, “Huhaholongi do Debata,” hape sogo rohana tu donganna, pargabus do ibana. Ai halak na so mangkaholongi dongan na niidana, ndang boi mangkaholongi Debata na so niidana. 21  On do parenta na tajalo sian Ibana: Manang ise na mangkaholongi Debata, ingkon haholonganna do donganna.

Surat na di toru

Manang “patangkas”.
Manang “panurirang pargapgap”.
Manang “panurirang pargapgap”.
Manang “panurirang pargapgap”.
Manang “ai haholongon do Debata”.
Manang “Haholongon do Debata”.