KII HALA A NKOBLA

Ibale nwaa bo nlôm ba ndiihe libii jap, ba ga hoñol bé i bagla kel yada, ndi hiki wada a nôgda le sobiina wé a yéne nye loñge lisolbene. Hala a mboñ le hiki sobiina a yé nkwook nkaa le ba ga ti libii jap lipém, to ibale mandutu ma mpémél bo.

Mam ma moni tole mahaa mape ma nla nyégsa ngim babiina i yén ntôñ. Ndi i yé loñge le bo iba ba ba ñômôk ikété gwéha, hiki wada a tinak nuu lipém.

LITIÑ LI BIBEL: “Munlôm a nlama bé bagla ni nwaa wé.”​—1 Korintô 7: 11MN.

“Ibale u ndiihe libii joñ, u nla neebe i nimis ngim mam. U yé bebee i nwéhél dihôha, ni i hôya tjo. U nlama bé tehe mindañ kiki manjom inyu mabos, ndi kiki jam li li nhôla bé i tibil yina.”​—Mika.

INYUKI HALA A YÉ NSEÑ

Ngéda ba mboma mandutu, ngim babiina i i ndiihe bé yegna yap (hala wee mbônga wap) i nhoo ndik kit le: ‘Me ntehe le me ni we di nla bé niñ ntôñ,’ ba mpala ki yéñ le ba bos libii jap.

“Ngandak bôt i mbiiba ni mahoñol mana le, ibale mam ma nke bé loñge, ba mbos. Ngéda bôt ba mbiiba ni mahoñol le ba ga bos, wee ibôdôl bibôdle nyen yegna yap i bi sedep.”​—Yôhanes.

JAM U NLA BOÑ

TIBIL WANBA

Ngéda jomol li mpam . . .

  • Baa u ntam inyuki u bi biiba ni nlô woñ tole nwaa woñ?

  • Baa u nhoñol le, ki i bé nseñ le u biiba ni mut numpe?

  • Baa u yé u mpot bibuk kiki bo le “m’a tjôô we” tole “m’a ke yak mut numpe nu a ndiihe me”?

Ibale u bi timbhe le ñ, to ndik inyu mbadga yada mu mambadga ma, wee yoñ bitelbene ibôdôl nano inyu lédés yegna yoñ.

KWEL NI SOBIINA WOÑ

  • Baa yegna yés libii i nhoi? Ibale ñ, inyuki?

  • Kii di nlama boñ ibôdôl nano inyu lédés yegna yés?

NDÉK MAÉBA

  • Tilna nlô woñ tole nwaa woñ bibañga bi gwéha

  • Unda le u ndiihe yegna yoñ ngéda u mbambal bifôtô bi nwaa woñ tole nlô woñ i homa woñ bôlô

  • Sébél nlô woñ tole nwaa woñ i téléfôn hiki kel ngéda u yé i homa woñ bôlô

LITIÑ LI BIBEL: “Jam Nyambe a ñat, mut a bagal bañ jo.”​—Matéô 19:6.