KII HALA A NKOBLA

Bañga nkwel i yé ngéda we ni man woñ ni mpôdôl mam ni nôgda, ni mam ni gwé i mahoñol manan.

INYUKI HALA A YÉ NSEÑ

Nkwel u nla ba jam li nlet, téntén ngéda mañge a nkondop. Kiki ini kaat ni hop Ngisi le Breaking the Code i nkal: “Bebek le hala a yé ndék ngéda le bon banan ba bé kal bé hiki jam li niñ yap ngéda ni bé kwel ni bo, ndi nano kiki ba nañ, ba nkal ndik bé i mam ba ngwés le ni yi.” Ndi maliga ma yé le, ha ngéda i nyen boñge ba gwé toi ngôñ i kwel ngandak ni bagwal bap!

JAM U NLA BOÑ

Ba bebee i kwel ni man woñ hiki ngéda le a gwé ngôñ. Boñ hala to ibale u nlama yén péé inyu kwélés man woñ.

“Hala a nla tinde we i bat le: ‘Inyuki nano nyen u ngwés kwélés me? Baa me bak bé ni we ngim kel yosô?’ Ndi baa di nlama tjelel ibale bon bés ba yiblene bés miñem nwap? Baa hala bé nyen hiki ngwal a mbem?”​—Lisa.

“Me mbéna hoo nañal, ndi me ni man wem di mbéna tibil kwel loñge i kosi juu.”​—Herbert.

LITIÑ LI BIBEL: “Mut nye ki nye a yiñil bañ ndigi nyetama loñge, ndi a yiñlak ki yo numpe.” ​—1 Korintô 10:24.

Nwas bañ le yom ipe i yoña we. Ngwal wada a nkal le: “Me yé me léba ngéda ipe le me yé hoñol mam mape ngéda bon bem ba nkwélés me. Ndi ba yé ba hoo yimbe le me ta bé emble bo​—ba kal ki me hala!”

Ibale u nôgda le téléfôn tole nkuu biliñgeliñge bi nla tééñga nkwel u gwé ni man woñ, lém gwo. Ni yoñ ngéda i emble i yom bon banan ba nkal, ni tibil ki nok i yom i ntééñga bo to ibale i litehge linan, mam ma, ma gwé bé nseñ.

“Di nlama unda bon bés le mam ba nôgda ma yé toi nseñ inyu yés. Ibale ba ntehe le di nyan mam ba nkal bés, ba ga kal ha bé ki bés mam map, tole ba ga ke i yéñ mahôla ipañ bôt bape.”​—Maranda.

“U unda bañ man woñ le jam a yé añle we li ñunbaha we to ibale jam li, li téé bé.”​—Antôni.

LITIÑ LI BIBEL: “Ni yihge lelaa ni nok.”​—Lukas 8:18.

Yéñ ngim mangéda i kwel ni man woñ. Boñge ba mbéna bé yible bagwal bap miñem nwap ngéda ba mbéñg-na mbom ni mbom.

“Di nla yoñ ngéda i emble bo to ibale di yé i hiôm ni matôa. Liyén bo i pañ li bi boñ le di kwel loñge iloo le di nun-ga mbom ni mbom.”​—Nikol.

Ngeñ je i nla ki ba loñge inyu kwel lôñni bon banan.

“Ngéda di nje, hiki mut a ñañal jam libe ni lilam li li mpémél nye i kel i. Hala a ñat bés, a nhôla ki hiki wada wés i yi le madutu ma ta bé jam li li mbéñge bés botama.”​—Rôbin.

LITIÑ LI BIBEL: “Hi mut a hook noga, a tiñhaga [ki] pot.”​—Yakôbô 1:19.