1, 2. (a) Kii i unda le likébla li gwé mahee i mis moñ? (b) Inyuki binoñ bi yé likébla likeñi li Djob?

LIMBE likébla likeñi u ma kôhna? Likébla li gwé bé le li ba die inyu boñ le li ba mahee i mis moñ. Ngéda likébla li nlona we maséé tole li yé jam u ban-ga toi ngôñ, u yé u ti mayéga inyu likébla li.

2 Ikété mam momasôna Djob a bi kébél bés, jam jada mu li nloo mana mape. Li yé likébla likeñi Djob a bi ti bôt ba binam. Munu pes ini, di ga nigil le Yéhôva a bi om Man wé, Yésu Kristô, inyu boñ le di niñ i boga ni boga. (Añ Matéô 20:28.) Ngéda Yéhôva a bi om Yésu munu isi kiki binoñ, a bi unda toi le a ngwés bés.

KII I YÉ BINOÑ?

3. Inyuki bôt ba binam ba nwo?

3 Binoñ bi yé njel Yéhôva a ngwélél inyu tohol bôt ba binam isi kogse i béba ni nyemb. (Efésô 1:7) Inyu nok inyuki binoñ bi yé nseñ, di nlama ndugi yi yom i bi tagbe i wom Éden, hala a yé dikôô di ñwii i len ini. Bagwal bés ba bisu, Adam bo Éva, ba bi ndogbene Djob. Inyule ba bi boñ béba, jon ba bi wo. Yak bés di nwo, inyule di bi kôdôl béba i Adam bo Éva.​—Béñge Ndoñi 9, i mamélél ma kaat.

4. Njee a bé Adam, ni kii a bééna?

 4 Ngéda Yéhôva a bi heg mut nu bisu le Adam, a bi ti nye ngim jam i nlôôha ba nseñ. A bi ti Adam niñ i peles. Nyuu yé ni mahoñol mé, ma bé peles. Kekikel a bé lama bé kwo kon, to un, to wo. Yéhôva a bé kiki isañ nu Adam inyule nyen a bi heg nye. (Lukas 3:38) Yéhôva a bé kwélés nye hiki ngéda. Djob a bi tibil toñle nye yom a mbat le a boñ, a ti ki nye loñge bôlô kiyaga.​—Bibôdle 1:28-30; 2:16, 17.

5. Bibel i nkal le Adam a bé “i ôñgba Nyambe,” hala a nkobla le kii?

5 Adam a bi héga “i ôñgba Nyambe.” (Bibôdle 1:27) Yéhôva a bi ti nye bilem gwé bilam kiki bo gwéha, pék, telepsép, ni ngui. A bi ti Adam kunde i yoñ makidik ni nyemede. Jon, Adam a bé bé kiki mashin. Djob a bi heg nye le a nla pohol i boñ loñge tole béba. Ibale Adam a pohol i nôgôl Djob, ki a bi niñ i boga ni boga ikété Paradis.

6. Ngéda Adam a bi ndogbene Djob, baa kii a bi nimis? Lelaa hala a ntihba bés?

6 Ngéda a bi ndogbene Djob, a kôhna ki mbagi i nyemb, Adam a bi nimis soso jam. A bi nimis maada ma tôbôtôbô a bééna ni Yéhôva, niñ yé i peles, ni liyééne jé i Paradis. (Bibôdle 3:17-19) Adam bo Éva ba bi pohol i ndogbene Djob, jon ba bééna ha bé botñem. Inyule Adam a bi boñ jam li, “béba i jôp nkoñ isi inyu mut wada, nyemb ki i lôl inyu béba, hala nyen nyemb i tôla bôt bobasôna inyule bobasôna ba boñ béba.” (Rôma 5:12) Ngéda Adam a bi boñ béba, a bi ‘sem’ nyemede, a yilha bés minkol mi béba ni nyemb. (Rôma 7:14) Baa botñem i yé inyu yés? Ñ.

7, 8. Kii i yé binoñ?

 7 Kii i yé binoñ? Binoñ bi ntihba mam ma tôbôtôbô ima. Li bisu li yé le, binoñ bi yé kiki ndamba ba nsaa inyu kobol mut, tole inyu témbna ngim jam u mbôk u nimis. Li nyônôs iba li yé le, binoñ bi yé kiki ndamba i kôli inyu saa yom i ñôbi.

8 Mut binam nye kiki nye a bé la bé saa inyu béba ikeñi Adam a bi boñ ngéda a lona bés nyemb. Ndi, Yéhôva a bi yible bés njel inyu kobol bés i mok mi béba ni nyemb. Di nigil mambe mahee binoñ bi gwé, ni lelaa di nla kôhna bisai ni njel binoñ.

LELAA YÉHÔVA A BI TI BINOÑ

9. Lelaa ba bé lama saa binoñ?

9 Mut to wada ipôla yés a nla bé saa binoñ inyu niñ i peles Adam a bi nimis. Inyuki? Inyule bés bobasôna di yé kwéha. (Tjémbi 49:8, 9) Inyu saa binoñ, i bé béda niñ i mut numpe nu a yé peles. Inyu hala nyen Yésu “a bi ti nyemede,” inyule a bééna niñ i yé peles, nlélém niñ Adam a bi nimis.​—1 Timôtéô 2:6.

10. Lelaa Yéhôva a bi ti binoñ?

10 Lelaa Yéhôva a bi ti binoñ? Yéhôva a bi om i Man a bi lôôha gwés munu nkoñ isi. Man nu le Yésu, a bé nye hégél i bisu. (1 Yôhanes 4:9, 10) Yésu a bi neebe i yék Isañ, ni liyééne jé nyoo ngii. (Filipi 2:7) Yéhôva a bi héa Yésu i ngii inyu om nye hana isi. Jon, a bi gwéé kiki peles mut, ngi béba.​—Lukas 1:35.

Yéhôva a bi ti Man nu a ngwés ngandak kiki binoñ inyu yés

11. Lelaa mut wada a nla ba binoñ inyu bôt ba binam bobasôna?

11 Mut nu bisu le Adam, a bi nimis niñ i peles  inyu yé ni inyu bôt ba binam bobasôna, ngéda a bi ndogbene Yéhôva. Baa mut numpe a bé le a kobol bon ba Adam i mok mi nyemb? Ñ. (Añ Rôma 5:19.) Yésu, nu a mah boñ bé béba, a bi ti niñ yé peles kiki binoñ. (1 Korintô 15:45) A bi gwélél niñ yé i peles inyu kobol bon ba Adam bobasôna i mok mi nyemb.​—1 Korintô 15:21, 22.

12. Inyuki Yésu a bé lama nok ngandak ndutu hala?

12 Bibel i ntoñle bés mandutu momasôna Yésu a bi kôhna ilole a nwo. Ba bi bép nye disôô bañga libébék, ba tômôl nye i kék i njiiha, ba boñ ki le a nok njôghe ndék ni ndék letee a wo. (Yôhanes 19:1, 16-18, 30) Inyuki Yésu a bé lama nok ngandak ndutu hala? Inyule Satan a bi kal le mut nye kiki nye a nla bé téñbe ni Djob ibale a nkôhna manoodana makeñi. Yésu a bi unda le peles mut i nla téñbe ni Djob to ibale a nok ndutu iloo héga. Noode hoñol lelaa Yéhôva a bi kônôl Yésu maséé!​—Bingéngén 27:11; béñge Ndoñi 15, i mamélél ma kaat.

13. Lelaa ba bi saa binoñ?

13 Lelaa ba bi saa binoñ? Yésu a bi ti Isañ sesema i niñ yé. I hilo 14 hi sôñ Nisan, i ñwii 33 mu kalénda i Lôk Yuda, Yéhôva a bi nwas le baoo ba Yésu ba nol nye. (Lôk Héber 10:10) Mbus dilo daa, Yéhôva a bi tugul Yésu, ha ni nyuu minsôn bé, ndi a bi tugul nye ni nyuu mbuu. Mbus, ngéda Yésu a bi témb yak Isañ i ngii, a bi unda Yéhôva sesema i niñ yé i peles, i a bi ti kiki binoñ. (Lôk Héber 9:24) Kiki a bi saa binoñ, a bi yible bés njel i nyodi isi kogse i béba ni nyemb.​—Rôma 3:23, 24.

 LELAA U NLA KÔHNA BISAI NI NJEL BINOÑ

14, 15. Kii di nlama boñ inyu kôhna nwéhél i bibéba gwés?

14 Di bi bôdôl bana bisai mu likébla likeñi li Djob. Di tehe bimbe bisai di nkôhna ni njel binoñ i len ini, ni i dilo di nlo.

15 Di nkôhna nwéhél inyu bibéba gwés. I yé ndutu i boñ loñge hiki ngéda. Di mboñ mahôha. Ngim mangéda ki, di mpot tole di mboñ mam ma téé bé. (Kôlôsé 1:13, 14) Lelaa di nla kôhna nwéhél? Di nlama toi tam bibéba di mboñ, di bat ki Yéhôva ni suhulnyu le a nwéhél bés. Ha ngéda i nyen di nla ba nkwoog nkaa le Djob a nwéhél bibéba gwés.​—1 Yôhanes 1:8, 9.

16. Kii di nlama boñ inyu bana kiññem i mpôp?

16 Di nla bana kiññem i mpôp. Ngéda ñem wés u mbép makeñi le di mboñ jam li yé libe, kiññem i yé i bôdôl kéés bés, di yé di nôgda wengoñle di gwé bé nseñ to mahee. Ndi, di nlama bé lehel ñem. Ibale di mbat Yéhôva nwéhél, di nla ba nkwoog nkaa le a ga emble bés, a nwéhél ki bés. (Lôk Héber 9:13, 14) Yéhôva a ngwés le di kwélés nye inyu to umbe ntén ndutu, ni le di toñle nye bibomb gwés. (Lôk Héber 4:14-16) Hala a nhôla bés i niñ ikété nsañ ni Djob.

17. Bimbe bisai di nla kôhna inyule Yésu a bi wo inyu yés?

17 Di gwé botñem i niñ boga. “Inyule nsaa béba u yé nyemb, ndi likébla li karis [tole loñgeñem] li Nyambe li yé niñ boga i Kristô Yésu Nwet wés.” (Rôma 6:23) Inyule Yésu a bi wo inyu yés, di nla niñ i boga ni boga, di ban-ga ki mbôô i mut nu a yé  peles. (Masoola 21:3, 4) Ndi, kii di nlama boñ inyu kôhna bisai bi?

BAA W’A UNDA LE U NEEBE BINOÑ?

18. Kii nyis bés le Yéhôva a ngwés bés?

18 Hoñol ki lelaa hala a yé le a tihba we, ngéda mut a ntéédana we loñge likébla. Binoñ bi yé likébla likeñi, jon di nlama ti Yéhôva mayéga ngandak inyu likébla li. Kaat Yôhanes 3:16 i nkal bés le: “Nyambe a lôôha gwés nkoñ isi, jon a tine pombe yé Man.” Ñ, Yéhôva a nlôôha gwés bés, jon a bi ti Man wé le Yésu nu a ngwés ngandak. Di nyi ki le yak Yésu a ngwés bés inyule a bi neebe i wo inyu yés. (Yôhanes 15:13) Lini likébla le binoñ, li nlama kwés we nkaa le Yéhôva bo Yésu ba ngwés toi we.​—Galatia 2:20.

Mu kii di mba di nigil i yi Yéhôva, hala nyen di ga yila liwanda jé, yak gwéha yés inyu yé i mba i nañ

19, 20. (a) Lelaa u nla yila liwanda li Yéhôva? (b) Lelaa u nla unda le u neebe sesema i binoñ bi Yésu?

19 Nano kii u nigil i yi gwéha ikeñi Djob a gwé inyu yoñ, lelaa u nla yila liwanda jé? Hala a ta bé jam li ntomb i ba liwanda li mut nu u nyi bé. Kaat Yôhanes 17:3 (MN) i nkal le di nla nigil i yi Yéhôva. Mu kii u mba u mboñ hala, hala nyen gwéha yoñ inyu Djob i mba i nañ, w’a bana ngôñ i lémél nye, w’a yila ki liwanda jé. Jon, ke ni bisu i nigil i yi Yéhôva ni njel yigil i Bibel.​—1 Yôhanes 5:3.

20 Unda le u neebe sesema i binoñ bi Yésu. Bibel i nkal le “Nu a nhémle Man a gwé niñ boga.” (Yôhanes 3:36) Lelaa u nla unda le u gwé hémle? Ngéda u mboñ mam Yésu a bi niiga bés. (Yôhanes 13:15) Di nla ndik bé kal ni nyo le di nhémle Yésu. Inyu unda le di neebe binoñ, di nlama boñ mam ma ñunda le  di gwé hémle. I kaat Yakôbô 2:26, di nigil le: “Hémle ngi minson i yé woga.”

21, 22. (a) Inyuki di nlama bé tôl Mbigda i nyemb Yésu hiki ñwii? (b) Kii di ga nigil i Bipes 6 ni 7?

21 U tôl bañ Bilôp bi Nwet. I u ilole a nwo, Yésu a bi niiga bés le di nlama bigda nyemb yé. Di mboñ hala hiki ñwii. Di nsébél jam li le Mbigda i nyemb Yésu tole “Bilôp bi Nwet.” (1 Korintô 11:20; Matéô 26:26-28) Yésu a nsômbôl bé le di hôya le a bi ti niñ yé i peles kiki binoñ inyu yés. Jon a bi kal le: “Boña hala ni hoñlege me mu.” (Añ Lukas 22:19.) Ngéda u ntôl bé Bilôp bi Nwet, u ñunda le u ngi hoñlak binoñ ni gwéha ikeñi Yéhôva bo Yésu ba gwé inyu yoñ.​—Béñge Ndoñi 16, i mamélél ma kaat.

22 Likébla lipe li gwéne bé bés mahee kiki binoñ. (2 Korintô 9:14, 15) Likébla likeñi li, li ga lona yak bisai inyu didun di bôt di di bi wo. Bipes 6 ni 7 bi nke unda bés lelaa hala a nla bôña.