“Me bi kôs bôlô i mondo. Hala bi boñ le lihaa jem li bôdôl niñ kii migwañ mi bôt. Ndi, hala a bi tinde ki me i bôdôl boñ mam ma téé bé sép. Me bi bôdôl yoñ ngaba i mañgand ma bibase. Mbus, me kaha ke i biboma bi pôlitik. Me bi sôk yak me kaha ke i kwéha base. Me bi boñ 40 ma ñwii ibabé le me téé likalô to ke i makoda. Kii ngéda i bé tagbe, hala nyen yak me bé kônde hoñol le Yéhôva a nla bé nwéhél me. Me bé la bé nwéhél memede, inyule me bé yi maliga, ndi me kôôba yoñ njel ibe.”—Marta.

HALA a yé mbegel keñi ngéda kiñ ñem yoñ i nkéés we. Kiñe David a bi tila le: “Bibôñôl gwem bibe bi ntagbe ngi ño wem; Bi ñidil me kii mbegee i ñét.” (Tjémbi 38:5) Ngim bikristen bi yé nkwoog nkaa le Yéhôva a yé mbén i nwéhél bo, jon hala a nlôôha tééñga mahoñol map. (2 Korintô 2:7) Baa hala a yé toi maliga? To ibale u bi boñ béba iloo héga, baa u nhoñol le u yé haa ngandak ni Yéhôva? Baa u nhoñol le a ga nwéhél bé we kekikel? To! U hoñlak bañ hala.

“Loga, me nsoohe, di kaa [tole di nôgla]”

Yéhôva a ntjôô bé mut nu a ntam bibéba gwé. Ndi, a nke yéñ nye. Yésu a bi ti ngén i man nimlaga. A bi toñol le, Yéhôva a yé kii Isañ nu gwéha, nu man a bi tjôô ndap lihaa, a bôdôl niñ u mpuñgu. Mbus ngéda, man nunu a bi yoñ makidik i témb i ndap. “Kii a ngi yii nonok, isañ a tehe nye. A kônha nye ngoo, a ubi ngwéé, a hôba nye kiñ,” a sambla ki nye ni gwéha. (Lukas 15:11-20) Baa u gwé ngôñ i kôôge bebee ni Yéhôva, ndi u nhoñol le u “ngi yii” haa ni nye? Kii isan mu héga Yésu a bi yoñ, ñem konangoo u Yéhôva u ntinde nye i hoñol we. A yé ki bebee i leege we.

Ndi ibale u nhoñol le Yéhôva a nla bé nwéhél we inyule bibéba gwoñ bi nloo héga, soho béñge yom Yéhôva a nkal i kaat Yésaya 1:18: “Loga, me nsoohe, di kaa. To i ba ya le bibéba binan bi kôibak tjôôm, gw’a pôp kikii pem; to bi bak bi kuyi ndoom, gwa’ yila bipuba wengoñle mahuu ma ntômba.” Ñ, ngim bibéba bi nla ba kii bi kôyôp bi môô ngii puba mbot. Ndi, yi le Yéhôva a nla sas yak bibéba bi.

Yéhôva a ta bé maséé i tehe we u nkônde nok ndutu inyule kiñ ñem yoñ i ngi kééhak we. Ndi, inyu boñ le Yéhôva a nwéhél we, ni le u kôhna hogbe ni ñem nwee, kii u nlama boñ? Béñge mana mam ima Kiñe David a bi boñ. Kii bé jam li bisu a bi boñ? Nyemede a bi kal le: “M’a pahle Yéhôva matjank mem.” (Tjémbi 32:5) Bigda le Yéhôva a bi mal sébél we i kôôge nye bebee ni njel masoohe, ni i kodol mam ni nye. Soho, kôôge nye bebee. Pahal bibéba gwoñ, u toñle ki Yéhôva mahoñol moñ. Yom i bi tagbe i niñ David i bi tinde nye i soohe le: “Sas matjank mem.” Ndi, a kal ki le: “A Nyambe, ñem u nyodop, u yé ki nsôhga, w’a yan bé wo.”—Tjémbi 51:3, 19.

Kii yé mam ma nyônôs ima? David a bi kôhna mahôla ni njel mpôdôl Djob a bi téé, le Natan. (2 Samuel 12:13) I len ini, Yéhôva a mbôñôl mimañ mi likoda. A bi niiga bo lelaa ba nlama hôla bilôk biké bi bi ntam bibéga gwap, ni hôla ki bo i témb ba mawanda ni nye. Ngéda u ga  tehe mimañ, ba ga gwélél Bibel ni masoohe ma ma ntihba ñem, inyu hôyôs ñem woñ. Mbus, mam ma momasôna ma ga hôla we i témbna mbôô woñ inyu mam ma mbuu.—Yakôbô 5:14-16.

Yéhôva a ngwés le yak we u bana hogbe i nlôl ni kiñ ñem i mpôp

“Nu litjank jé li nwéhlana a yé kimasoda”

U nla hoñol le pahal bibéba gwoñ ni ke i tehe mimañ li yé jam li nlet ngandak i boñ. David nyemede a bi bana minlélém mi mahoñol. Inyu ngim ngéda, a bi “mom nwee” inyu mam mabe a bi boñ. (Tjémbi 32:3) Ndi i mbus, a bi neebe i tam bibéba gwé, ni i kodol njel yé.

Ikété bisai bikeñi David a bi kôhna, li bisu li bé le, a bi témbna maséé mé. Jon a bi tila le: “Nu litjank jé li nwéhlana a yé kimasoda, nu béba yé i nhuba.” (Tjémbi 32:1) A bi soohe ki le: “A Nwet, yibil bibép gwem, ndi hilémp hiem hi’a añal bibégés gwoñ.” (Tjémbi 51:17) Ngéda David a bi kôhna hogbe inyule Djob a bi nwéhél nye, hala a bi tinde nye i hôla bôt bape i yi Yéhôva.

Yéhôva a ngwés le yak we u bana hogbe i nlôl ni kiñ ñem i mpôp. A nsômbôl ki le u añle bôt bape bitééne gwé ni ñem woñ wonsôna, ikété maséé ibabé le kiñ ñem yoñ i ôm we nsohi. (Tjémbi 65:2-5) U hôya bañ le, a nsômbôl le “bibéba binan bi séha, le ndi ngéda hogbe y’a ba i nlôl bisu bi Nwet.”—Minson mi baôma 3:19.

Hala nyen i bi bôña ni Marta. A ñañal le: “Man wem a bi waa bé ômle me mimbamle. Ndék ni ndék, me bi témb me bôdôl bana maada malam ni Yéhôva. Ndi inyu témb, yom i bé nene me nledek ngandak i bé le, me bat nwéhél inyu bibéba gwem gwobisôna. Me bi sôk me kôôge Yéhôva bebee ni njel masoohe, me bat ki nye le a nwéhél me. Memede me yé nheleg le 40 ma ñwii ma bi tagbe ilole me ntémb yak Yéhôva. Niñ yem yomede i ñunda le to i mbus ngandak ñwii, mut nu a mbagla ni likoda, a nla ki sélél Djob, ni bana maada malam ni nye.”