Yésu a niiga banigil bé ngandak mam. Ndi a bana ndik ño buk wada le Ane Djob

YÉSU a loo boñ kii hana isi? Nyemede a kal le: “Me nlama añle yak minkoñ mimpe miñañ minlam mi ane Nyambe; inyule jon me bi ôma.” (Lukas 4:43) Ane Djob yoñ i bé ño buk u minkwel mi Yésu. Béñge le gwom bina a bi niiga bi bi mbéñge Ane ini.

1. Yésu a ga ba Kiñe. Yésu nyemede a kal le nyen a yé Mésia likak. (Yôhanes 4:25, 26) A unda ki le nyen a yé Kiñe mpôdôl Daniel a tehe i yiinda. Yésu a kal baôma bé le kel yada a ga yén i “yééne ane i lipém jé.” A kal ki le yak bo ba ga yén i bi yééne bi ane. (Matéô 19:28) A o unu ntôñ bikiñe le “bémba titigi.” A niiga ki le a gwé “mintômba mimpe” mi mi ta bé ikété ntôñ bikiñe.​—Lukas 12:32; Yôhanes 10:16.

2. Ane Djob i ga lona ngembe telepsép. Yésu a niiga le Ane Djob i ga mélés ngitelepsép i i nloo yosôna ngéda i ga pubus jôl li Yéhôva Djob. Hala nyen i ga jôa mahindi Satan a hoo jo i wom Éden. (Matéô 6:9, 10) Yésu a bi éba le a ta bé ntodol bôt inyule hiki kel, a bé niiga bôlôm ni bôdaa, mi ngwañ ni diyeyeba ibabé mbagla. Tolaki Lôk Israél yon i bé bôt ba bisu a bé lama niiga, a bi ke hôla yak bôt ba Samaria ni ba biloñ bipe. Yésu a bé mahéñha ni baéga ba bibase ba dilo tjé inyule a bé todol bé mut nye ki nye.

3. Ane Djob i yoñ bé ngaba i mam ma nkoñ isi. Yésu a bi niñ i ngéda pôlitik i bé ngui ngandak, inyule loñ ipe yon i ba énél loñ yé. Ndi ngéda bôt ba noode nyégsa nye le a jôp i pôlitik, a bi ôt ngwé. (Yôhanes 6:14, 15) A kal mut pôlitik wada le: “Ane yem i ta bé i nkoñ isi unu.” (Yôhanes 18:36) A kal ki banigil bé le: “Ni ta bé ba nkoñ isi.” (Yôhanes 15:19) A sôña ki bo le, to i ba ya i sôñ nye, ba gwélél bañ bijôl bi gwet.​—Matéô 26:51, 52.

“A ke minkoñ ni mambai, a añlak, a kalak miñañ minlam mi ane Nyambe.”​—Lukas 8:1

4. Ane Kristô i kéhne ngii gwéha. Yésu a bôn le a ga ti bôt noi, a hôyôs ki mbegee yap. (Matéô 11:28-30) A bé boñ yom a mpot. Gwéha i bé tinde nye i ti maéba ma nhôla i keñgle nduña, i bana maada malam ni bôt bape, i yôi njômbi nkus ni ba masé i niñ. (Matéô, bipes 5-7) Mu kiki nyemede a bé unda gwéha, mintén mi bôt nwomisô mi bé kwo nye nyu, yak bet ba bé kôhna ndéénga, ba yik le a ga ti bo mahôla ni loñgeñem, a ti ki bo lipém. Kinje loñge Kiñe Yésu a ga ba!

Ndi Yésu a gwélél ki soso njel ipe i añal ñañ Ane Djob. A boñ ngandak bihélha bimam. Inyuki? Di béñge le jam li.

—Biniigana bini bi nyôñna i bikaat bi Matéô, Markô, Lukas, ni Yôhanes.