Di nigil mam ma mbéñge mañge wanda nu a bi tohol nyandôm wé. Nyandôm mañge wanda nu a bé ñôma Paul. Di nyi bé jôl li mañge wanda nu, ndi di nyi le a bi boñ ngim jam ni ngandak makénd. Baa u gwé ngôñ i yi kii a bi boñ?—

Paul a bé i mok i Yérusalem. Ba bi gwel nye inyule a bé añal ñañ nlam inyu Yésu. Ngim bibéba bi bôt i bé oo Paul, jon ba bi ô jimb libe. Ba kal le: ‘Di bat le ñane bisônda, a lona Paul i bisu bi ntôñ bakéés bakeñi. Di ga solop mu njel, ngeñ Paul a mba a ntagbe, di ga nol nye!’

Man manyañ Paul a nyelene Paul ni ñane bisônda jimb

Man munlôm nu manyañ Paul nu muda a bi nok i jimb li. Kii a bé le a boñ? A bi ke i ndap mok, a solol jo yak Paul. Nlélém ngéda, Paul a kal nye le a ke, a kal ñane bisônda hala. Baa u nhoñol le hala a bé ntombok jam inyu man manyañ Paul i pot i bisu bi ñane bisônda?— To, inyule ñane bisônda a bé bañga mut. Ndi man manyañ Paul, nye a bé makénd, jon a bi pôdôs ñane bisônda.

Ñane bisônda a bé yi loñge loñge i jam a bé lama boñ. A kot bebee le 500 bisônda inyu tééda Paul! A kal bo le ba kena Paul i Kaisaréa ni juu. Baa Paul a bi pei?— Ñ, bibéba bi bôt bi, bi bé bé le bi tihba nye! Béba yap jimb i bi kwo.

Ñañ unu u niiga we kii?— Yak we u nla ba makénd kiki man manyañ Paul. Di nlama ba makénd ngéda di mpôdôs bape inyu Yéhôva. Baa u ga ba makénd i ke ni bisu i pot inyu Yéhôva?— Ibale u mboñ hala, u yé le u tohol niñ i mut.