I nkoñ i loñ Asiria le Ninivé, bôt ba bi nai ni boñ béba. Yéhôva a ep mpôdôl Yôna nyoo i Ninivé inyu béhe bo le ba héñha maboñok map. Ndi Yôna a bi ke homa numpe. A bi yoñ sitima i bé kena nye Tarsis.

Ngéda sitima i bé i tuye, soso mbebi i kahal hôñ, baluk sitima ba kon woñi ngandak. Ba soohe mop map, ba badak le: ‘Inyuki lini jam li mpémél bés?’ I sôk bañ, Yôna a kal bo le: ‘Men me mboñ béba. Me nke bôlô Yéhôva ngwéé. Leña me i tuye, ndi soso mbebi a’ telep.’ Baluk sitima ba bé gwés bé leñ Yôna i lép, ndi a bi nyégsa bo nyuu i boñ hala. Ngéda ba bi leñ nye i tuye, mbuk mbebi a telep.

Yôna a bi hoñol le a ga wo. Kiki a bé yin, yin ni yin ikété tuye, a soohe Yéhôva. Jon Yéhôva a bi om njok hiobi. Hi mil Yôna, ndi hi bi nol bé nye. Ikété libum li hiobi, Yôna a soohe le: ‘Me mbôn le me ga nôgôl we hiki ngéda.’ Yéhôva a bi tééda Yôna i niñ ikété libum li hiobi dilo diaa, i mbus hiobi hi lo Yôna i nkoñ, ipañ tuye.

Baa kiki Yéhôva a bi péyés Yôna, hala a bé kobla le a bé lama ha bé ke i Ninivé? To. Yéhôva a bi tiimba kal nye le a ke nyoo.  Lini lisañ, Yôna a bi nôgôl Yéhôva. A pam bañ nyoo, a kal bibéba bi bôt bi le: ‘Mbus 40 ma dilo, Ninivé a ga tjiba.’ Ndi jam li hélha li bi bôña: bôt ba Ninivé ba bi emble, ba héñha ki maboñok map. Kiñe Ninivé i bi kal bôt bé le: ‘Ni sébél Djob, ni tam ki bibéba binan. Bebek, a ga tjé bé bés.’ Kiki Yéhôva a bi tehe le ba ntam bibéba gwap, a bi tjé ha bé Ninivé.

Yôna a bi unup le tison i ntjiba ha bé. Hoñol ki: Yéhôva a bi bana wongut ni konangoo inyu Yôna, ndi Yôna a bi kônôl bé bôt ba Ninivé ngoo. Yôna a nyodi tison, a ke a yén i si yie i bebela yada ba nsébél le, bék, a kahal huñbe. Ndi kiki bebela i nwo, Yôna a kônde unup. Jon Yéhôva a bi kal nye le: ‘We u ntôñ ini bebela iloo bôt ba Ninivé. Me bi kônôl bo ngoo, jon ba mpei.’ Kii hala a niiga bés? Bôt ba Ninivé ba bé nseñ ngandak iloo to imbe ntén bebela.

“Yéhôva a . . . nwo ngut inyu nan inyule a ngwés bé le to mut wada a nimil, ndi a ngwés le bôt bobasôna ba pam i hiel miñem.”​—2 Pétrô 3:9, MN