Ke i miñañ

Ke i miño mi bibuk

YIGIL 10

Lelaa u nla yimbe base i maliga?

Lelaa u nla yimbe base i maliga?

1. Baa base maliga i yé ndik yada?

“Bé yihnana inyu bapôdôl ba bitembee.”​—MATÉÔ 7:15.

Yésu a niiga ndik banigil bé bañga base yada. I yé kiki ngim njel i nkena niñ boga. Yésu a bi kal le : “Ndék yon i léba” njel i. (Matéô 7:14) Djob a neebe ndik bibégés inoñnaga ni bañga yé i maliga. Ba bobasôna ba ngwélél Djob ni maliga ba yé ndik ikété base yada.​—Yôhanes 4:23, 24; 14:6; Efésô 4:4, 5.

Béñge vidéô Baa Djob a neebe bibase gwobisôna?

2. Kii Yésu a bi kal inyu bikristen bi bitembee?

“Ba nkal le ba nyi Nyambe, ndi ba tañbaga nye ikété minson nwap.”​—TITÔ 1:16.

Yésu a bi béhe banigil bé le bapôdôl ba bitembee ba ga héñha biniigana gwé. Ba ga nene kiki bañga bikristen. Bôt ba yé ikété bibase gwap ba nkadba le ba yé bañga bikristen. Ndi matam map ma nyelel mimbe mintén mi bôt ba yé. Ndik base i maliga yotama yon i gwé bañga bikristen. Bilem ni maboñog map mon ma unda le ba yé mahéñha ni bibase bi bitembee.​—Matéô 7:13-23.

3. Lelaa di nla yimbe bañga bikristen?

Di wan mana matam matan:

  • Bañga bikristen ba nôgôl Bibel kiki lipôdôl li Djob. Ba noode noñ matiñ ma Bibel. Bañga base i yé mahéñha ni kwéha base inyule kwéha base i noñ biniigana bi bôt ba binam. (Matéô 15:7-9) Bañga bikristen bi niiga bé yom yada, bi boñok yom ipe.​—Yôhanes 17:17; 2 Timôtéô 3:16, 17.

  • Bañga banigil ba Yésu ba nti jôl li Djob le Yéhôva lipém. Yésu a bi ti jôl li Djob lipém ngéda a bi niiga bôt i yi jo. A bi hôla bôt i yi Djob, a niiga ki bo i soohe le Jôl li Djob li tééba mapubi. (Matéô 6:9) I homa woñ liyééne, imbe base i niiga bôt jôl li Djob?​—Yôhanes 17:26; Rôma 10:13, 14.

  • Bañga bikristen ba ñañal ñañ nlam i béñge Ane Djob. Djob a bi ep Yésu le a tjam ñañ nlam inyu Ane. Ngi Ane Djob, niñ boga i ta bé. Yésu a bi ke ni bisu i pot inyu Ane letee ni kel a bi wo. (Lukas 4:43; 8:1; 23:42, 43) A bi kal banigil bé le ba tjam ñañ nlam u Ane Djob. Ibale mut wada a mpôdôs we inyu Ane i, baa w’a hoñol le a yé imbe base?​—Matéô 24:14.

  • Banigil ba Yésu ba ta bé ba nkoñ isi. U nla yimbe bo inyule ba yoñ bé ngaba ni pôlitik, ba nkodba bé ki to inyu jôs ngomén. (Yôhanes 17:16; 18:36) Ba nigle bé maboñog ni mahoñol mabe ma nkoñ isi.​—Yakôbô 4:4.

  • Bañga bikristen ba gwé gwéha i mbuma ñañ ipôla yap. Bañga i Djob i niiga bo i ti matén momasôna lipém. Tolaki bibase ba bitembee bi mbéna nit gwét ipôla matén, bañga bikristen ba ntjél boñ hala. (Mika 4:1-3) I mahéñha, bañga bikristen ba nti ngéda yap ni bigwel moo gwap sesema inyu hôla, ni ti bôt bape makénd.​—Yôhanes 13:34, 35; 1 Yôhanes 4:20.

4. Baa wa nla yimbe base i maliga?

Imbe base i nyôñôl biniigana gwé gwobisôna ikété Bibel? Imbe base i nti jôl li Djob lipém? Imbe base i ntéé likalô li Ane Djob kiki mpom botñem i bôt ba binam? Bôt ba imbe base ba yoñ bé ngaba ni gwét, ba gwéhnaga bo ni bo? Baa u hoñol lelaa?​—1 Yôhanes 3:10-12.