“Engbana ni . . . longeñem, ni suhusnyu, ni ñemlima, ni u wongut.”Kôlôsé 3:12

Ngéda bôt ba mbiiba, ba mbot lihaa li mondo. To hala kiki u nlama ke ni bisu i gwés bagwal boñ ni i ti bo lipém, ñwaa woñ, tole nlô woñ, nyen a nyila mut woñ nu bisu hana isi. Hala a nla ba ndutu i neebe inyu lihaa joñ. Ndi matiñ ma Bibel ma nla hôla we i yi bagal mam, inyu boñ le u tééda nsañ ipôla ndap yoñ lihaa ni lihaa joñ likeñi, yak ni bakil boñ.

 1 BÉÑGE LIHAA JOÑ LIKEÑI YAK BAKIL BOÑ, NI MIS MALAM

JAM BIBEL I NKAL: “U tinak isoñ bo nyuñ lipém.” (Efésô 6:2) To i ba yaga le u yé nañag mut, u nlama diihe ni ti bagwal boñ lipém hiki ngéda. Yi ki le yak nlô woñ tole ñwaa woñ a nlama ti bagwal bé lipém. Kiki “gwéha i nkila bé njôñ,” u kon bañ woñi le, maada malam nlô woñ tole ñwaa woñ a gwé ni lihaa jé, ma ga ôbôs libii joñ.1 Korintô 13:4; Galatia 5:26.

JAM U NLA BOÑ:

  • Keñgle bibuk bi nkéñbaha mam kiki bo le: “Hiki ngéda, bagwal boñ ba nyan me” tole “nyuñ a ngwés nga bé hiki jam me mboñ”

  • Noode tehe mam kiki nlô woñ tole ñwaa woñ a ntehe mo

 2 NOÑ MAKIDIK NI NYOÑ

JAM BIBEL I NKAL: “Mut a’ yék isañ bo nyañ, a adbe nwaa wé, boba b’a ba nsôn wada.” (Bibôdle 2:24) Ngéda u mbiiba, bagwal boñ ba nla hoñol le ba ngi gwé makidik i yoñ i ngii yoñ. Hala a ntinde bo i ha nyo mu libii joñ iloo kiki ba kôli boñ.

Bé bo iba bon ni nlama téé miñwaa, mi mahaa manan ma nlama bé lela. Mbus, ni nlama kal bo hala ni gwéha. Ni nla kal bo jam li yé toi bé ñem ibabé i babaa bo. (Bingéngén 15:1) Suhulnyu, ni ñemlima, ni wongut bi ga hôla we i bana maada malam ni lihaa joñ, yak ni bakil boñ. Ha nyen u ga noñ yom Bibel i nkal: “Ni hônbanaga bé ni bé ikété gwéha.”Efésô 4:2.

JAM U NLA BOÑ:

  • Ibale u nôgda le lihaa joñ tole bakil boñ ba nlôôha ha manyo map mu libii joñ, kwélél mu ni ñwaa woñ tole ni nlô woñ i loñge ngéda

  • Bé bo iba ni nôgla lelaa ni ga sañgal mam