Ni kôna bakôdôlbum i nlôl makak inyu hémle ni nihbe.” ​LÔK HÉBER 6:12.

1, 2. Inyuki i yé nseñ le di lédés hémle yés i len ini? Ti hihéga.

HÉMLE. Kinje loñge lem lam! Ndi hiki ngéda di mboma buk ini, i yé loñge le di at yo ni ini buk ipe le: “Pala!” Ibale hémle i nhañba bés, di nlama pala yéñ i bana yo. Ndi ibale di gwé yo, di nlama pala yoñ bitelbene le di sôñ yo, di lédés ki yo. Inyuki di nkal hala?

2 Hégda le u yé tagbe ikété soso ñoñ. Nyus malép i gwé we kiyaga. Ibale u nsôk u léba malép, u nlama sôñ mo le hiañgaa hi boñ bañ le ma sa. U nlama ki yônôs téédana yoñ i malép letee u pam i het u nke. I len ini, nkoñ isi u yé wengoñle ñoñ i pes mbuu, homa bañga hémle i nhañ kiki malép ma nhañ i ñoñ; homa hémle i nsa ibale di nsôñ bé yo, to lédés yo. Jon di nlama pala boñ. Nlélém kiki malép ma yé nseñ inyu niñ, di nla bé niñ i pes mbuu ibale di gwé bé hémle.​—Rôma 1:17.

3. (a) Kii Yéhôva a bi ti bés inyu lédés hémle yés? (b) Mambe mam ima di nlama ki bigda?

3 Yéhôva a nyi le i mbéda bés hémle nano. A nyi ki le hala a nlet i bana hémle ni i tééda yo. Inyu hala nyen a bi ti bés ndémbél i bôt ba hémle di nlama kôna. Yéhôva a bi tinde ñôma Paul i tila le: “Ni kôna bakôdôlbum i nlôl makak inyu hémle ni nihbe.” (Lôk Héber 6:12) Inyu hala ki nyen ntôñ u Yéhôva u nti bés makénd i ligip i kôna ndémbél i bôlôm ni bôda ba hémle, ndik kiki di ntehe munu kaat yés. Nano, kii ipe di nla ki boñ? Di bigda mam ima: (1) Di waa bañ lédés hémle yés; (2) Di tibil tééda botñem yés ikété mahoñol més.

4. (a) Kii i ñunda le Satan a yé ñoo hémle? (b) Ndi inyuki di nlama bé lehel ñem?

4 U waa bañ lédés hémle yoñ. Satan a yé ñoo nu bisu nu hémle. A bi yilha nkoñ isi kiki ñoñ u u nol hémle. Kiki a gwééba iloo bés, baa di nlama lehel ñem le di nla bé lédés hémle yés? To jam! Yéhôva a yé liwanda li bôt ba nyéñ bana bañga hémle. A nkal bés le lôñni mahôla mé, di nla kolba Nsohop, le ndi a ke bés ngwéé. (Yakôbô 4:7) Ibale di nyoñ ngéda hiki kel inyu lédés hémle yés, wee di yé kolba Satan. Lelaa di nla boñ hala?

5. Baa bôlôm ni bôda ba Bibel ba bi gwééna hémle? Toñol.

 5 Kiki di ntehe, i bôlôm ni bôda ba hémle Bibel i mpôdôl, ba bi gwééna bé yo. Niñ yap i ñéba bés le hémle i yé litam li mbuu mpubi u Yéhôva. (Galatia 5:22, 23) Ba bi soohe inyu bat mahôla, Yéhôva a lédés hémle yap. Di nigle bo, di yik le ngéda bôt ba mbat Djob mbuu mpubi, ba boñok ki mam ma nkiha ni masoohe map, Yéhôva a nlôôha ti bo wo. (Lukas 11:13) Baa di nla kônde jam mu ngii?

6. Lelaa di nla tibil ôt nseñ i lisoñgol li miñañ mi Bibel?

6 Munu kaat ini, di nyoñ ndigi ndék dihéga di bôt ba hémle. Ndi dihéga dipe di yii! (Lôk Héber 11:32.) Di nla yoñ ngéda i wan niñ i hiki wada wap. Ibale di nyoñ bé ngéda i tibil tém miñañ nwap, di ga la bé ôm hémle yés siñ siñ. Inyu tibil ôt nseñ i lisoñgol jés, di nlama béñge mam ma nkéña ñañ u. Ibale di nhôya bé le ba bé ‘bôt ba binam kiki bés,’ dihéga tjap di ga ba maliga i mis més. (Yakôbô 5:17) Ikété miñem nwés, di noode hégda lelaa ba bi nôgda ngéda ba bi boma manoodana tole mandutu ma ma mpôôna més.

7-9. (a)  Kii bagwélél ba Djob ba kôba ba yé le ba nôgda ibale bon ba gwéélak Yéhôva kiki bés i len ini? (b) Inyuki di nlama lédés hémle yés ni njel minson?

7 Di nla ki lédés hémle yés ni makidik di nyoñ. Ngo, “hémle ngi minson, i yé woga.” (Yakôbô 2:26) Noode hégda maséé bôt ba kôba ba yé le ba nôgda ibale bon ba gwéélak Yéhôva kiki bés!

8 Kiki hihéga, Abraham a bé sémél Yéhôva bisesema i ñoñ, i ngii muu ma ngok. Ibale ba nkal nye nano le a béghak Yéhôva lôñni bagwélél ba Djob bape ikété mandap ma Ane tole i makoda ma ndôn, het ba nti minkwel, ba toñlak loñge loñge mimbônga mi a bi “tehe yaga nyoo nonok,” ki a nôgda lelaa? (Lôk Héber 11:13.) Élia a bé gwélél Yéhôva isi énél i béba kiñe. Ibale ba nkal nye len le nson wé u ta ha bé i nol bibéba bi bapôdôl ba Baal, ndi le a nlama yuuga bôt inyu añle bo miñañ minlam mi nsañ ni mi hogbe, ki a nôgda lelaa? Maliga ma yé le, bôlôm ni bôda ba kôba b’a ba maséé iloo héga i gwélél Yéhôva kiki bés i len ini.

9 Di kônde ni lédés hémle yés ni njel minson. Ibale di mboñ hala, di mba toi di nkôna ndémbél yap. Kiki di nkal i majubul ma kaat ini, di mba di nôgda le di  nkônde yila mawanda map. I dilo di nlo, di ga niñ yaga ni bo, ba ba ki bañga yés mawanda.

10. Mambe maséé di ga bana i Paradis?

10 Tibil tééda botñem ikété mahoñol moñ. Bahémle ba kôba, ba bôlôm ni ba bôda, ba bi yôñôl ngui mu botñem i nlôl ni Djob. Baa yak we u mboñ hala? Hégda le maséé u nla bana i leege bahémle ba kôba ngéda ba nlo i “bitugne . . . inyu ba ba téé sép.” (Añ Minson mi baôma 24:15.) Mambe mambadga u nla bana ngôñ i bat bo?

11, 12. I mbok yondo, kii w’a bat (a) Abel? (b) Nôa? (c) Abraham? (d) Ruth? (e) Abigail? (f) Ester?

11 Ngéda w’a boma Abel, baa w’a bat nye lelaa bagwal bé ba bé? Tole w’a bat nye le: “Baa u bi pot ni bikérubim bi bé tat lijubul li wom Éden? Baa ba bi timbhe to we?” Kii w’a bat Nôa? U nla bat nye le: “Baa u bé kon Néfilim woñi? Lelaa u bi boñ ndi u tééda binuga bi gwobisôna ñwii wada ikété nkuu?” Ndi ibale Abraham nyen u mboma, u nla bat nye le: “Baa u bi tehe Sem? Njee a bi boñ we le u yi Yéhôva? Baa i nyodi i Ur li bi lédél we?”

12 Hégda ki ngim mambadga u yé le u bat bôda ba hémle i mbus bitugne gwap. “A Ruth, kii yo i bi tinde we i gwélél Yéhôva?” “A Abigail, baa u bi kon woñi i kal Nabal le u bi hôla David?” “A Ester, Bibel i ñañle bés ñañ nan, we ni Mardôkai, ikepam ngim homa. Kal le me kii i bi yik tagbe?”

13. (a) Mambe mambadga i bôt ba nlo i bitugne ba yé le ba bat we? (b) Ngéda u nhégda le w’a tehe bôt ba hémle ba kôba, lelaa u nôgda?

13 Maliga ma yé le yak bôt ba hémle ba kôba ba ga bana ngandak mambadga i bat bés. Kinje maséé di ga bana i toñle bo lelaa dilo di nsôk di bi tagbe, ni lelaa Yéhôva a bi sayap litén jé mu nledek ngéda u! Ibabé pééna, b’a ba maséé ngandak i yi lelaa Yéhôva a bi yônôs makak mé momasôna. Ha ngéda i, di mbana ha bé i hégda lelaa bagwélél ba Djob ba Bibel ba bé. Di mba di ntehe bo ni mis més i Paradis! Jon boñ biliya gwoñ gwobisôna i tééda bo yômi i mahoñol moñ. Kônde kôna hémle yap, le ndi we ni bo ni gwélél Yéhôva ngem yada, kiki bañga mawanda, i boga ni boga!