Kaat Matéô 26:1-75

  • Biprisi bi ñôô jimb inyu nol Yésu (1-5)

  • Ba nkôp Yésu labinda (6-13)

  • Pasa i nsôk; ba nliibana nye (14-25)

  • Bilôp bi Nwet bi ntééba (26-30)

  • A nkal i bisu bi ngéda le Pétrô a’ tañba nye (31-35)

  • Yésu a nsoohe i Gétsémané (36-46)

  • Ba ngwel Yésu (47-56)

  • Bikééhene i bisu bi Ntôñ bakéés bakeñi (57-68)

  • Pétrô a ntañba Yésu (69-75)

26  Ndi i ngéda Yésu a bi mal pot i mam mana momasôna, a kal banigil bé le: 2  “Ni nyi le Pasa i yé noma,+ ni le b’a gwélha Man mut inyu nol nye i kék.”+ 3  I mbus, baéga biprisi ni mimañ mi litén ba kodba i kotoo i ndap prisi keñi, nu a gwé jôl le Kaifa,+ 4  ba ôô jimb+ inyu gwel* Yésu ni mandon* ni inyu nol nye. 5  Ndi ba bé kal le: “I ngéda ngand bé, inyu boñ le hala a lona bañ yubda ikété limut.” 6  I ngéda Yésu a bé i Bétania, ikété ndap Simôn nu a bi kon lô,+ 7  muda wada a kôôge nye bebee lôñni pôs alabasta* i i bééna labinda i i nhee diye, a bôdôl kôp yo i ngii ño wé mu kiki a bé je.* 8  Kiki banigil ba ntehe hala, ba unup, ba kal le: “Inyuki a ñôbôs labinda yañga? 9  Inyule ba bak le ba nuñul yo ngandak moni, ba ti nwo diyeyeba.” 10  Kiki a nyi jam ba bé pot, Yésu a kal bo le: “Inyuki ni nyéñ tééñga muda nunu? Ngo a mbôñôl me loñge jam. 11  Inyule ni gwé diyeyeba ngéda yosôna,+ ndi n’a bana bé me ngéda yosôna.+ 12  Kiki muda nunu a nkôp nyuu yem labinda, a mboñ hala inyu kôôba me inyu majôna mem.+ 13  Me nkal bé maliga le, hiki homa ba ñañal ñañ nlam unu ni nkoñ ’isi wonsôna, b’a añal yak i jam i muda nunu a mboñ inyu hoñlene nye mu.”+ 14  Ndi wada mukété jôm ni iba, nu ba nsébél le Yuda Iskariôt,+ a ke yak baéga biprisi+ 15  a kal le: “Ibale me mboñ le ni gwel nye, n’a ti kii me?”+ Ba bôn nye 30 ma batjañtjañ ba silba.+ 16  Jon ibôdôl ha ngéda i, a bi waa bé yéñ loñge njel inyu gwélha nye. 17  I kel bisu i ngand* Bret bi ngi-séñha,+ banigil ba lo yak Yésu, ba bat le: “Numbe homa u nyéñ le di kôôbana we inyu boñ le u je Pasa?”+ 18  A kal le: “Kena ikété tison, yak mut hisém, ni kal nye le: ‘Malét a nkal le: “Ntéak ngéda inyu nyemb yem u nkôôge bebee, m’a lôôs Pasa lôñni banigil bem i ndap yoñ.”’” 19  Banigil ba bi boñ yaga kiki Yésu a bi kal bo, ba kôôba ki Pasa. 20  I ngéda kôkôa i bi kwo,+ a bé a yii i téblé ni 12 banigil.+ 21  I ngéda ba bé je, a kal le: “Me nkal bé maliga le, wada ikété nan a’ liibana me.”+ 22  Kiki hala a ntééñga bo iloo hihéga, hiki wada wap a bôdôl kal nye le: “A Nwet, me bé nu, hala bé?” 23  A timbhe le: “Nu a nyube woo wé ikété séya lôñni me, nyen a’ liibana me.+ 24  I yé maliga le Man mut a yé ke i nyemb ndik kiki i yé ntilga inyu yé, ndi ngoo+ ni nu a nliibana Man mut!+ I bé le i ba loñge inyu yé le a gwéé bañ.”+ 25  Ndi Yuda, nu a bé kôôba i liibana nye, a kal le: “A Rabi, me bé nu, hala bé?” Yésu a kal nye le: “Wemede nyen u nkal hala.” 26  I ngéda ba bé ba ngi jek, Yésu a yoñ bret, kiki a nsoohe,* a bek yo,+ a ti yo banigil bé, a kal le: “Yoña, jena. Yimbne i nyuu yem ini.”*+ 27  A yoñ yak libôndô, a ti mayéga, a lôôs bo jo, ndi a kal le: “Bébobasôna, nyona mu,+ 28  inyule yimbne i ‘matjél mem+ ma malômbla’+ ini, ma ma nlama kuba inyu nwéhél i bibéba+ bi ngandak bôt.+ 29  Ndi me nkal bé le, kekikel m’a nyo ha bé malép ma matam ma nkôô wai, letee ni kel m’a témb me nyo wai yondo lôñni bé ikété Ane i Tata wem.”+ 30  Sôk i nsôk, kiki ba mal tôp tjémbi di bibégés, ba pam inyu ke i Hikôa Ôlivé.+ 31  I mbus, Yésu a kal bo le: “I u unu, bébobasôna n’a baage inyu jam l’a pémél me, inyule i yé ntilga le: ‘M’a kek ntééda mintômba, yak mintômba mi bémba mi tjama.’+ 32  Ndi i ngéda m’a tuglana, m’a bôk bé i bisu nyoo i Galiléa.”+ 33  Ndi Pétrô a timbhe, a kal nye le: “To ibale bana bape bobasôna ba mbaage inyu jam l’a pémél we, me me yé mbén i baage!”+ 34  Yésu a kal nye le: “Me nkal we maliga le, i u unu, ilole nlôm kôp a ñoñ, w’a tañba me ngélé aa.”+ 35  Pétrô a kal nye le: “To ibale me nlama wo ni we, me yé mbén i tañba we.”+ Yak bana banigil bape bobasôna ba kal nlélém jam. 36  I mbus, Yésu ni banigil bé ba pam i wom ba nsébél le Gétsémané,+ ha nyen a kal bo le: “Yéna hana, me me nke nyoo inyu soohe.”+ 37  Kiki a nyoñ Pétrô ni bon ba Sébédéô bo iba, a bôdôl nôgda nduña ikeñi, yak ñem u bôdôl siida nye.+ 38  Ha nyen a kal bo le: “Me nôgda nduña ikeñi wengoñle nduña i nyemb. Ni yégle hana, ni yén ki péé lôñni me ibabé waa.”+ 39  Kiki a nke ni bisu ndék, a ôm mbom ’isi, a soohe le:+ “A Ta, ibale hala a nla bôña, boñ le libôndô lini+ li ke me haa. Ndi sômbôl yem bé yon i bôña, ndik sômbôl yoñ yon i bôña.”+ 40  A témb yak banigil, a koba le ba nke ’ilo, a kal Pétrô le: “Baa ni nla bé yén péé to ngeñ yada lôñni me?+ 41  Yéna péé ibabé waa,+ ni waa bañ to soohe+ inyu boñ le ni kwo bañ ikété manoodana.+ Mbuu u nyamnda yaga ni ngôñ, ndi minsôn mi mbomb.”*+ 42  Inyu ngélé i nyônôs iba, a ke, a soohe le: “A Ta, ibale hala a nla bé bôña le li ke me haa ibabé le me nyo jo, wee sômbôl yoñ yon i bôña.”+ 43  I mbus, a témb a lo, a koba bo ba yé i ke ’ilo, inyule mis map ma bé yét. 44  Ndi a yék bo, a témb a ke, a soohe ki inyu ngélé i nyônôs aa, a tiimba pot nlélém jam. 45  I mbus a témb yak banigil, a kal bo le: “I ntén ngéda unu, ni noi, ni kenek ’ilo? Nuna-ki, ngeñ i nkôôge bebee le ba ti Man mut i moo ma baboñbéba. 46  Telbana, di kenek. Nuna-ki, nu a nliibana me a nkôôge bebee.” 47  I ngéda a bé a ngi podok, nuna-ki, wada ikété jôm ni iba le Yuda, a lo lôñni limut likeñi li li bééna paminsoñ ni bikék. Baéga biprisi ni mimañ mi litén bon ba bi ep i bôt ba.+ 48  Ndi nu a bi liibana nye a bi ti bo yimbne, a kal le: “I mut me nsos limañ, wee nye nu; gwela nye.” 49  Ha nyen a tagbe ngélé yada yak Yésu, a kal le: “Me nyéga, a Rabi!” I mbus, a sos nye limañ. 50  Ndi Yésu a bat nye le: “A mut wem, inyuki u yé hana?”+ Ha nyen ba bi lo, ba ha Yésu moo, ba gwel nye. 51  Ndi nuna-ki, wada ikété ba ba bé lôñni Yésu a sambal woo wé, a sodol pansoñ yé, a kek nkol u prisi keñi, a kit nye ôô.+ 52  Ha nyen Yésu a kal nye le: “Timbis pansoñ yoñ i homa wé,+ inyule ba bobasôna ba nyoñ pansoñ, b’a tjiba ni pansoñ.+ 53  Tole u nhoñol le me nla bé soohe Tata wem le a ômle me nano nano iloo 12 mintôñ* mi biañgel?+ 54  Ndi ibale me mboñ hala, lelaa Bitilna bi ga yon bi bi kal le haana nyen mam ma nlama bôña?” 55  Ha nyen Yésu a kal mamut le: “Baa ni mpam i gwel me ni paminsoñ lôñni bikék wengoñle me yé ntonba? Hiki kel, me bé yén i témpel inyu niiga,+ ndi ni bi gwel bé me.+ 56  Ndi i mam mana momasôna ma mbôña inyu yônôs Bitilna bi bapôdôl.”+ Ha nyen banigil bobasôna ba bi tjôô nye, ba ke ngwéé.+ 57  I bôt ba bi gwel Yésu ba kena nye yak prisi keñi le Kaifa,+ i homa bayimbén ni mimañ mi litén ba bi kodba.+ 58  Ndi Pétrô a bi waa bé noñ nye, a bak haa, letee ni i kotoo i ndap i prisi keñi. I ngéda a bi jôp ikété kotoo, a yén ni bagwélél ba ndap inyu tehe lisuk li jam li.+ 59  Ndi baéga biprisi ni Ntôñ bakéés bakeñi* wonsôna ba bé yéñ mbôgi i bitembee inyu ôm Yésu nsohi kayéle ba nol nye.+ 60  Ndi ba bi kôhna bé mbôgi to yada, to hala kiki ngandak bôt ba mbôgi bitembee i bi lo.+ I mbus, bôt ba mbôgi iba ba lo, 61  ba kal le: “I mut nunu a bi kal le: ‘Me nla bôk témpel Nyambe, ndi me ntémb me oñ yo dilo daa.’”+ 62  Ha nyen prisi keñi i bi telep, i kal nye le: “U gwé bé yom i kal? U nok bé minsohi i bôt bana ba ñôm we?”+ 63  Ndi Yésu a yén nwee.+ Jon prisi keñi i kal nye le: “Me nti we oda le u kum soñ i bisu bi Nyambe, u kal bés too u yé Kristô, Man Nyambe!”+ 64  Yésu a kal nye le: “Kiki wemede u nkal, me yé nye. Ndi me nkal we le, ibôdôl nano, n’a tehe Man mut+ a yii i woo walôm u lipémba,+ a lôlak i ngii ond i ngii.”+ 65  Ha nyen prisi keñi i was mambot mé ma ngii, i kal le: “A ñôbôs jôl li Nyambe! Baa di ngi gwé ki ngôñ ni bôt ba mbôgi? Nuna-ki! Bébomede ni nok kiki a ñôbôs jôl li Nyambe. 66  Bé ni nhoñol lelaa?” Ba timbhe le: “A kôli ni nyemb.”+ 67  Ha nyen ba bi tjôle nye matai i su,+ ba ôm ki nye bikut.+ Bape ba bép nye mabai i su,+ 68  ba kalak le: “A Kristô, kal ni bés njee a mbép we ibale u yé mpôdôl?” 69  Ndi Pétrô a bé a yii i mbégdé ikété kotoo; ha nyen hingonda* hiada hi bi lo nye ipañ, hi kal nye le: “Yak we u bak ni Yésu, mut Galiléa!”+ 70  Ndi a tañ i bisu bi bôt bobasôna, a kal le: “Me nyi bé me yom u yé pot ha.” 71  I ngéda a bi ke i man ndap nu lijubul li lipénd, hingonda hipe hi yimbe nye, hi kal i bôt ba bé ha le: “I mut nunu a bak lôñni Yésu, mut Nasaret.”+ 72  Yak ha, a tañ, a kum soñ le: “Me nyi bé i mut nu!” 73  I mbus ndék ngéda, i bôt ba bé ba téé ha homa nu ba lo, ba kal Pétrô le: “Nkaa u ta bé, yak we u yé toi wada wap inyule tén yoñ hilémb* i nyelel we.” 74  Ha nyen a bi bôdôl kum soñ, a tiihege, a kalak le: “Me nyi bé i mut nu!” I nlélém ngéda, nlôm kôp a oñ. 75  Ha nyen Pétrô a bi hoñol jam Yésu a kal le: “Ilole nlôm kôp a ñoñ, w’a tañba me ngélé aa.”+ I mbus, a pam i mbégdé, a ee iloo hihéga.

Ndoñi

^ Tole “inyu ha nye moo.”
^ Tole “likeñge.”
^ Ba bé gwélél ngok yada ba nsébél le alabasta inyu bañ i pôs i. Béñge Ndoñi bibuk.
^ Tole “a bé a kôñi i téblé.”
^ Tole “Kel yada ilole ngand i mbôdôl.” I dilo di Yésu, ba bé béna yoñ kel Pasa kiki kel bisu i ngand Bret bi ngi-séñha.
^ Tole “a sayap yo.”
^ Ni hop Grikia, “Nyuu yem ini.” Buk i Grikia le “éstin” i ngwéélana hana inyu kal le: ‘i nkobla,’ ‘i yé ndoñi’ tole ‘i yé yimbne.’
^ Tole “Mut a nla bana ngôñ i boñ jam, ndi nyuu yé i bana bé ngui i boñ jo.”
^ ntôñ wada u bisônda u Lôk Rôma u bééna ipôla 4 000 ni 6 000 di bisônda, hala a bé yaga nsoñgi nkeñi.
^ Tole “Sanédreñ.”
^ A bé ngwélél mu ndap i prisi keñi.
^ Tole “lipodok joñ.”

Kunde i nwet matila inyu lipémhak lini