Kaat Markô 6:1-56
6 Kiki a nyodi ha, a ke i nkoñ wé,* yak banigil+ bé ba noñ nye.
2 I ngéda kel sabat i bi kola, a bôdôl niiga i ndap bibégés. Libim li bôt li li bé emble nye li hel, li kal le: “Hee i mut nunu a bi nigil i mam mana?+ Inyuki nyen a nkôhna i pék ini, ni inyuki nyen a mboñ i nya bihélha bi mam ini?+
3 Baa nye bé nyen a yé kapinda,+ man Maria?+ Baa lôknyañ bé le Yakôbô,+ Yôsep, Yuda ni Simôn?+ Baa lôknyañ i bôda i ta bé hana ni bés?” Jon ba bi tjél hémle nye.*
4 Ndi Yésu a kal bo le: “Mpôdôl a gwé lipém homa nyensôna, ndi a gwé bé lipém i nkoñ wé, i lihaa jé, to i ndap yé.”+
5 Jon a bi la bé boñ hélha jam jo ki jo nyoo, handugi i kéhi moo i ngii ndék bakokon ni i mélés makon map.
6 Ni maliga, a bi hel inyu ngitophémle yap. I mbus, a ke mu mambai ma momasôna, a niigaga.+
7 Kiki a nsébél jôm ni iba, a bôdôl ep bo iba iba,+ a ti yak bo ngui i pémés mimbuu mimbe.+
8 A ti ki bo oda le ba yoñ bañ yom yo ki yo inyu liké, to bret, to bot bijek, to moni* ikété biposa gwap,+ ba yoñ ndik ntoñgo wotama,
9 a kal ki bo le ba haba bitamb, ndi ba yoñ bañ mambot ima.*
10 A kônde ki kal bo le: “To imbe ndap ni njôp, yéna ha letee ni nyodi ha homa nu.+
11 To numbe homa b’a leege bé bé, tole b’a emble bé bé, i ngéda ni mba ni nyodi ha, ni kumb lipum li biték li li yé mu makôô manan inyu ti bo mbôgi.”+
12 Ha nyen ba ke, ba kahal téé likalô le bôt ba nlama hiel miñem,+
13 ba pémés yak ngandak mimbuu mimbe,+ ba hoo ngandak bakokon môô, ba mélés ki makon map.
14 Ndi Kiñe Hérôdé a nok jam li, inyule jôl li Yésu li bi yiba ngandak, yak bôt ba kalak le: “Yôhanes Nsôble nyen a ntuge, inyu hala nyen a mboñ bihélha bi mam.”+
15 Ndi bahogi ba bé kal le: “Éliya nu.” Bape ki ba kalak le: “A yé mpôdôl wada kiki bapôdôl ba ngéda kôba.”+
16 Ndi i ngéda Hérôdé a bi nok jam li, a kal le: “Yôhanes nu me bi kit ño, nyen a ntuge.”
17 Hérôdé a bi bii Hérôdia, nwaa maasañ le Filipô. Nyemede Hérôdé nyen a bi ep le ba gwel Yôhanes, ba kañ nye, ba ha nye i ndap mok inyule hala nyen Hérôdia a bé gwés.+
18 Inyule Yôhanes a bé kal Hérôdé le: “I ta bé we kunde i bana nwaa maasoñ.”+
19 Jon Hérôdia a bé téédana nye hiun, a yéñék ki nol nye, ndi a bé la bé.
20 Inyule Hérôdé a bé kon Yôhanes woñi, a yik le a yé mut a téé sép+ ni mut Nyambe;* jon a bé sôñ niñ yé. Hiki ngéda a bé emble Yôhanes, a bé yi bé kii a boñ lôñni nye, ndi to hala a bé ke ni bisu i emble nye ni maséé.
21 Ndi loñge ngéda i bi kola i ngéda Hérôdé a bi naña ngand ligwéé jé+ inyu bangomin bé bakeñi, lôñni baane ba bisônda gwé ni bañga bôt i Galiléa.+
22 Ha nyen ngond Hérôdia i jôp, i sak, hala a lémél Hérôdé ni bôt ba bé je* lôñni nye. Kiñe i kal hingonda le: “Bat me to kii u ngwés, m’a ti we yo.”
23 A kum yaga soñ le: “To kii u mbat me, m’a ti we yo, me yé yak bebee i kap ane yem môga ima, me ti we jôga jada.”
24 Ha nyen a bi pam, a kal nyañ le: “Kii me bat?” Nyañ a kal le: “Ño u Yôhanes Nsôble.”
25 I nlélém ngéda, a pala ke yak kiñe, a bat nye le: “Me nsômbôl le nano nano, u ti me ño u Yôhanes Nsôble i nleha pan.”+
26 Hala a bi lôôha tééñga kiñe, ndi i bi gwés bé nim nye jam a bi bat inyule i bi kum soñ i bisu bi bakén* bé.
27 Jon i nlélém ngéda, kiñe i ep sônda yada ikété ba ba ntat nye, i ti nye oda le a lona ño u Yôhanes. Ha nyen a bi ke i ndap mok, a kit ño u Yôhanes,
28 a lona wo i nleha pan, a ti wo hingonda, yak hingonda hi ti wo nyañ.
29 I ngéda banigil bé ba bi nok i jam li, ba lo, ba yoñ mim wé, ba jô wo.*
30 Baôma ba kodba ni Yésu, ba añle nye mam momasôna ba bi boñ ni niiga.+
31 A kal bo le: “Lona bébotama i homa a yé nwee, ni noi ndék.”+ Inyule ngandak i bé lo, i kenek, ba bééna bé to ngéda i je.
32 Jon ba bi ke ni môñgô i homa nu a yé nwee inyu ba botama.+
33 Ndi bôt ba bi tehe bo ba nke, ngandak i yi ki hala, ha nyen bôt ba bi lôl i bitison gwobisôna, ba ke ngwéé ni makôô, ba bôk bo i bisu, ba pam nyoo.
34 Kiki a mpam nyoo, a tehe limut li bôt likeñi, a kon bo ngoo+ inyule ba bé kiki mintômba mi mi gwé bé ntééda bémba.+ Ha nyen a bôdôl niiga bo ngandak mam.+
35 Ndi kel i bé nkenek, banigil bé ba lo nye ipañ, ba kal nye le: “I homa nunu a yé ñoñ, yak kel i yé nkenek.+
36 Huuha bôt, kayéle ba kee i minkoñ ni mambai ma yé bebee le ba sômbôl bomede yom i je.”+
37 A timbhe bo, a kal le: “Tina bo bijek bébomede.” Ha nyen ba kal nye le: “Baa di nlama ke i somb bret bi 200 dinariô* inyu ti gwo limut le li je?”+
38 A kal bo le: “Ni gwé bret gwañen? Kena, ni béñge!” Kiki ba mbéñge, ba kal le: “Bret bitan, ni tjobi diba.”+
39 Ha nyen a kal bôt bobasôna le ba yén mintôñ mintôñ i ngii bikai.*+
40 Bôt ba yén, ba kodba mintôñ mi 100 bôt ni mintôñ mi 50 ma bôt.
41 Ha nyen a bi yoñ bret bitan ni tjobi diba, a pa mis i ngii, a sayap gwo.+ I mbus, a bek bret, a bôdôl ti gwo banigil le ba lôôs gwo bôt. A kap yak tjobi diba inyu bôt bobasôna.
42 Bobasôna ba je, ba nuu ki,
43 ba kot bikét, bi yon ikété 12 bisel ibabé soñgol tjobi.+
44 I bôlôm ba bi je bret ba bé 5 000.
45 Kunda yada i mbus ha, Yésu a kal banigil bé le ba jôp i môñgô, ba bôk nye bisu nyoo uu ngwañ i pes i Bétsaida, ndi nye a yégle inyu huuha limut.+
46 Ndi kiki a ntjôla bo, a bet hikôa inyu soohe.+
47 I ngéda kôkôa i bi kwo, môñgô u bé i ñemkété tuye, ndi nye a bak a ngi yii nyetama i nlélém homa.+
48 Ndi kiki a ntehe bo ba njoba i leñ pagô inyule mbebi i bé lôl bo bisu, a lo bo ipañ bebee ni maye ma kel,* a kenek ni makôô i ngii tuye; ndi a bé ke wengoñle a nyéñ tagbe bo.*
49 Kiki ba ntehe nye a nkil i ngii tuye, ba hoñol le: “Yiinda i!” Ba lond ni ngui.
50 Inyule bobasôna ba bi tehe nye, ba kon woñi. Ndi nlélém ngéda, a pôdôs bo, a kal le: “Ni bana makénd! Me nu; ni kon bañ woñi.”+
51 I mbus, a bet i môñgô ni bo, yak mbuk mbebi a mal. Ha nyen ba bi hel kiyaga,
52 inyule ba bé ngi nok i yom hélha jam a bi boñ inyu ti bret i kobla, ndi miñem nwap mi bé tiñha nok.
53 I ngéda ba bi yap, ba pam nyoo nkoñ u Génésarét, ba tjak môñgô ha bebee.+
54 Ndi kiki ba bi sôs ndigi i môñgô, bôt ba pala yimbe nye.
55 Ha nyen ba bi ôt ngwéé mu nkoñ u wonsôna, ba bôdôl lona bakokon i ngii binañi gwap, ba ken-ga bo i homa ba bi nok le a yé.
56 Ndi to hee homa a bé jôp ikété mambai, to bitison, to minkoñ, ba bé lona bakokon i bahoma ba bôm, ba soohege ki nye le ba tihba ndik to linjek li mbot yé ngii.+ Ba bobasôna ba bé tihba jo, makon map ma bé mal.
Ndoñi
^ Tole “nkoñ u binéñél gwé.”
^ Ni hop Grikia, “a yilna bo ngok baagene.”
^ Ni hop Grikia, “mamuna.”
^ Tole “handugi mbot ba hééba, ba yoñ bañ mbot ipe.”
^ Ni hop Grikia, “numpubhaga.”
^ Tole “ba kôñi i téblé.”
^ Tole “bôt ba bé je i nlélém téblé.”
^ Ni hop Grikia, “ba niñi wo ikété soñ mbigda.”
^ Béñge Ndoñi bibuk.
^ Ni hop Grikia, “ngii njoñgi bikai.”
^ Hala wee, ibôdôl i ngeñ 3:00 i juu ipam i ngeñ 6:00 i ngéda hiañgaa hi mpam.
^ Tole “a bé sômbôl tagbe bo.”
