Kaat Timôtéô bisu 6:1-21
6 I bôt ba yé minkol,* ba kee ni bisu i tehe bet bap kiki bôt ba kôli ni lipém jolisôna,+ le ndi kekikel bôt ba ôm bañ jôl li Nyambe to biniigana gwé nsohi.+
2 Handugi hala, i minkol mi gwé bet ba ba yé bahémle, ba yan bañ bet bap ndik inyule ba yé lôk kéé. Ndi ba nlama yaga kônde bana makénd i sélél bo, inyule i bôt ba nkôhna nseñ u loñge yap bôlô ba yé bahémle ni bagwéha.
Kee ni bisu i ti biniigana bini ni maéba mana.
3 Ibale mut a niiga hémle ipe, ndi a neebe bé biniigana bi maliga* bi bi nlôl yak Nwet wés Yésu Kristô, a neebe bé to biniigana+ bi bi nkiha ni ndéñbe i gwélél Nyambe,+
4 wee a yé nyonok ni ngôk, a nok bé to yom.+ Ñem u nkon ndik nye ngôñ momol* ni pééna inyu bibuk.+ I mam mana ma nlona tama, bisol, minsohi,* ni i hoñlene bôt mam mabe,
5 mindañ mi mi mal bé inyu disii di mam; i bôt ba nlona mindañ mini ba gwé mahoñol mabe,+ ba nyi bé maliga, ba hoñlak le ndéñbe i gwélél Nyambe i yé njel i kôhna yéñe.+
6 Ibabé pééna, ndéñbe i gwélél Nyambe i yé yaga njel i kôhna yéñe ikeñi,+ ibale di nyi kon maséé ni mam di gwé.*
7 Inyule di bi lona bé yom yo ki yo munu nkoñ ’isi, di nla bé to kena yom yo ki yo.+
8 Ndi hala kiki di gwé bijek* ni mbot,* wee d’a kon maséé ni i mam mana.+
9 Ndi i bôt ba nai ndik le ba mba mingwañ ba nkwo ikété manoodana, ikété hiandi+ ni ikété ngandak minheña mi bijôñ mi mi nôgha njôghe, mi ken-ga* ki bôt i tjiba ni i yimil.+
10 Inyule gwéha i moni i yé nkañ* u mam mabe momasôna; bôt bahogi ba ba ntumbba inyu yônôs i gwéha i, ba bi ke haa ni hémle, ba nôgha ki bomede njôghe homa nyensôna.+
11 Ndi we, a mut Nyambe, kee i mam mana ngwéé. Ndi noñ telepsép, ndéñbe i gwélél Nyambe, hémle, gwéha, hônba, ni ñemlima.+
12 Jok gwét bilam bi hémle; tibil yaga kabda niñ boga, inyu yo nyen u bi séblana, inyu yo ki nyen u bi tibil yaga bok mbôgi* i bisu bi ngandak bôt ba mbôgi.
13 Me nti we oda, i bisu bi Nyambe nu a ntééda mam momasôna i niñ, ni i bisu bi Kristô Yésu, nu a bi tibil yaga bok mbôgi* i mbamba kiki mut mbôgi i bisu bi Pôntiô Pilatô,+
14 le u nôgôl mbén i nya i yé ngi liton li mahindi ni i nya i yé ngi nsohi, letee ni i masoola ma Nwet wés Yésu Kristô;+
15 i masoola mana mon mpom Ñane nu maséé a’ unda i ntéak wé ngéda. Nyen a yé Kiñe i bikiñe ni Nwet nu bet,+
16 nyetama nyen a gwé niñ i i ntjiba bé,+ a nyééne ikété mapubi+ le mut to wada a nla bé kôôge bebee, mapubi le mut nye ki nye a yé ngi tehe, a nla bé to tehe.+ Lipém ni lipémba li boga bi ba lôñni nye. Amen.
17 Ti bôt ba yé mingwañ munu nkoñ ’isi unu* biniigana* le ba ba bañ lipamal,* ba bôdôl bañ to lingwañ li li nom bé ñem,+ ndi ba bôdôl ndik Nyambe ñem, nyen a ñumbe bés mam momasôna di nkônôl maséé.+
18 Kal bo le ba sal i boñ mam malam, ba ba mingwañ ikété minson minlam, ba ban-ga lem likap,* ba bak nkôôbaga i hôla,+
19 ba téédaga lisôô li nkus inyu bomede, hala wee hikuu hilam inyu dilo di nlo;+ le ndi ba tibil yaga kabda bañga niñ.+
20 A Timôtéô, tibil yaga tééda i jam ba bi bôdôl we ñem ndi ba ti we,+ u kenek haa ni biyôglô bi minkwel bi bi nhindis i jam li yé lipubhaga, u kenek ki haa ni pééna lôñni bôt ba nkal le ba gwé “yi,” ki le bitembee bi.+
21 Hala kiki bahogi ba bi unda le ba gwé i nya yi ini, ba bi tjôô hémle.
Konangoo i mbuma ñañ i Nyambe i ba lôñni we.
Ndoñi
^ Tole “ba yé isi kop nson minkol.”
^ Tole “biniigana bilam; biniigana bi bi yé nseñ.”
^ Tole “a nkon njék i momol.”
^ Tole “nyo mbe.”
^ Ni hop Grikia, “di kôli ni mam di gwé.”
^ Tole “yom i je.”
^ I nla ki ba, “homa lisolbene.” Ni hop Grikia, “yom inyu hôba.”
^ Ni hop Grikia, “yinis.”
^ Tole “nkañ wada.”
^ Ni hop Grikia, “pahal.”
^ Ni hop Grikia, “pahal.”
^ Tole “ba hoñol bañ libak likeñi.”
^ Tole “oda.”
^ Tole “hiai hini.” Béñge Ndoñi bibuk.
^ Tole “kap ni ñem wonsôna.”
